TALATU’U O ALEIPATA

12 May 2016

E tusa ai ma faamaumauga a Papalagi-fai mai e ui lava ina o le itumalo itiiti o Anoama’a sa pulea lava e Alii, ae sa tulaga ese ai lava Lufilufi. O Aleipata fai mai faamaumauga a Papalagi-o lona pulea atoatoa -sa i aao lava o Tulafale.

O i latou ia e pei o Matua e to’alua o Tafua ma Fuataga- e tusa ai ma tulaga maoa’e ma le taualoa sa la umia; e o’o lava i mataupu e faasino i taua- e tusa ai ma faamaumauga a Misi Situpe.

E lua vaega sa vaevaeina i ai Aleipata e tusa ai ma ia Tulafale; o le vaega e i luga o le mauti’eti’e e igoa o le “Itupa i Luga”, ma le vaega e i lalo o le mafola e igoa o le “Itupa i Lalo.”

O Fuataga na te pulea le vaega i luga o le maupu’epu’e, lea foi e faaigoa o le “Fale i Luga,” lea e aofia ai Vailoa ma Ulutogia. O le isi vaega e pulea e Tafua i Saleaaumua; lea sa avea i lea taimi ma “Laumua o Aleipata” atoa.

O Saleaaumua e faasino i ai nuu o loo totoe e pei o Satitoa, Mutiatele, Samusu, Amaile ma Ti’avea. O le vaega lenei e faaigoa foi i nisi taimi o le “Fale i Lalo.” O le Malo o ia vaega e lua sa faaigoa o le “Pule Aoao”.

O le faiga la o lea Malo e le aafia ai alii. E na o le to’alua lava e i ai lo la leo i le faiga o le Malo; ma e faaigoa o “Sa’ofetalai;” o i la’ua ia o “Saiumalu i Vailoa” ma “Laupola i Mutiatele.” Ua na o i la’ua lava ia e mafai ona la suia faaiuga a Matua; ma o lea faiga e ta’u o le “taia o aao o Matua”.

O Matua e to’alua-e fai ma sui o Aleipata i le Fono i Lufilufi-lea e le mafai ona ia faia se faaiuga -pe a toesea Matua. E i ai foi ma le leo o Matua i le tofia o le Tuiatua- ma i le faagasologa o le faiga o Toga- e talosagaina e Matua le “Ie o le Malo” mo i la’ua.

ADVERTISEMENT

Talu ai ona o Tafua ma Fuataga o Tulafale taua-la te le talia soo se ‘ietoga mai soo se isi matai alii o Aleipata. Sa faamatala e Misi Situpe le teena faapea e Tafua ma Fuataga o ‘ietoga mai isi matai-se’ia o’o lava ina fetagisi ia matai ma aioi atu e alolofa ave a latou ietoga pe afai e alolofa moni ia i la’ua!

O le pogai lea o le upu-“ua faa’ele’elea Fuataga ma Tafua  ona o le alolofa i alii o Aleipata…”Fai mai Misi Situpe-‘o iinei e iloa moni ai le tulaga uiga ese o Tafua ma Fuataga i lo la itumalo.” O a’a malolosi la o lenei sootaga o loo natia i totonu o le tofia o  le Tuiatua ma lona fuafuaina o le tautua a ona tagata.

O nisi la nei o faamaumauga a Misi Tana-Fai mai o Leifi ma Tautolo sa tautua ia Mata’utia Faatulou- o ia lea na usu ia Tulitulutulu ona maua ai lea o Letauā.

Sa tautua foi o ia ma lea to’alua i aso uma e ala i taumafa ma ‘ava. O le isi aso na fai atu ai:-“Ua lelei-ua ‘ou iloa lou amio lelei ma le faamaoni. O le mea -o le a ‘ou tuuina atu ia te oulua e to’alua le Malo atoa o Atua.

O la’ua la ia e to’alua na avea ma Matua o Aleipata. O Letaua e faapea na Tuiatua ma o le tamā o Leifi ma Tautolo. O le igoa o Aleipata e tusa ai ma Misi Tana-e afua mai se ulugalii o Alei ma Pata e faapea na o mai le Lagi.

O lea ulugalii e matua ‘aulelei lava; ma sa tausi i la’ua e le la fanau se’ia o’o ia feoti. O iinei la fai mai le Mau e afua mai ai le “atulala” o tagata Samoa-lea sa masani ona faatino e le Aiga o Mataafa i Amaile. I le avea la ma itumalo itiiti o Aleipata, o lona faalupega faapitoa lenei: “Tulouna Oe Saleaaumua; Tulouna Oulua le Falelua; Tulouna Oulua Matua o Leifi ma Tautoloitua.”

SALEAAUMUA: E aofia ai nuu o Vaipulau, Utufaalalafa, Lefogo, Laulala, Vaisuli, Vaipulau i le pitonuu i sisifo, lea foi e faaigoa o Si’uaniani-pe na o le sefulu minute mai Amaile. O Vaisuli sa nofo  ai se pelepitelo Katoliko ma ni Taupou Sa sa faia a’oga mo teine.

E anoano le la’au o le Pu’a i le matafaga. O Vaisuli pe sefulu minute lo la va ma Vaipulau, ae o le itu i sasa’e o Vaisuli o loo i ai ni taufusi se tele ma se auvai e tafe i le sami.

O le igoa o Saleaaumua e afua mai tua ia Aumua o le laina o le Tuiatua; ae fai mai Misi Palate atonu o iina e afua mai ai le igoa o Saleaaumua poo “sootaga faale-aiga.”

O Upu Taoto la o Saleaaumua e faapea:-“Tulouna Oe le Alalamalae; Tulouna Lau Afioga Mata’utia o le Sa’o Papa; Tulouna Lau Afioga Fanene ma Ifopo; Tulouna Lau Susuga i le Matua ‘Oa; Tulouna lau Tofa i le Matua Tafua; Tulouna le Lauti Laulelei ia te Oe Saleaaumua; Tulouna Lau Afioga  i le Matua Tafua; Alala mai lou Itupa; Tulouna Oe le Itu Letauā!.

12 May 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?