Leai se isi nofoaga e sili atu nai lo’o Samoa

SS
By Sarafina Sanerivi, 30 December 2016

O le finagalo o le tina ia Feagai Su’a mai le afioaga o Faleasi’u, e leai lava se isi atunu’u e sili atu nai lo’o Samoa.

Na ia ta’ua o le faigofie ma le to’afilemu o si o tatou atunu’u, o le itu aupito sili lea ona manaia.

O le tina ia Feagai e 30 ona tausaga. 

Na ia fa’ailoa mai i le Fofoga o Samoa lona fiafia tele i le matagofie o le olaga i Samoa.

“A tatou autilotilo nei i soifuaga o tagata Samoa, e ese le manaia ma le matagofie.

“E a la ona faigata le olaga mo nisi o le nofoa’i ma le lē sogasogā.

“E le fa’apea o tagata uma e tele tupe ma maua mea e tele. Ae a la ona mativa ma ola falolo le tagata, o le gaioi ma le lē galulue.

“O Samoa lava ia e faigofie le olaga auā o lo’o iai fanua ma ele’ele e mafai ona galulue ai tagata ma maua ai mea e tausi ai aiga ma fanau.”

Na ia ta’ua, o lo’o tele lava le mau atina’e e mafai ona faia e o tatou tagata e maua ai seleni e tausi ai o latou aiga.

ADVERTISEMENT

“E leai lava se mea e faigata ai le olaga i Samoa. E ola sa’oloto lava tagata ma e maua lava mea e tausi ai aiga mai fanua o aiga ma le sami e aunoa lava ma se tupe e alu ai.

“O le isi tulaga, e ese le manaia o Samoa e leai ni vevesi e pei o atunu’u i fafo e iai lava le toto masa’a i aso uma ma e fetaua’i foi isi malō.

“A fa’atusatusa atu le olaga i Samoa ma isi atunu’u, e sili atu lava le olaga i Samoa.

“E tele foi lava atina’e e mafai ona fesoasoani i le tausiga o aiga.

“E pei o fa’atoaga ma le faiga o meataulima. E tofu lava i tatou ma taleni mai le Atua, ma a oo foi ina tatou fa’aaogaina tatau lelei meaalofa ma fa’amanuiaga a le Atua, e fa’apena lava ona maua manuia o aiga.”

Na ta’ua e Feagai, o lana ia galuega o lo’o maua mai ai se alagatupe mo ia ma lona aiga.

“E fa’atau a’u ili, o koko, o fala ma isi lava mea e maua mai ai se tupe e tausi ai si o matou aiga.”

Peita’i, na ta’ua, o lo’o iai foi lava fa’afitauli o lo’o feagai ai pea ma si o tatou atunu’u.

“E le fa’apea e le’o iai ni fa’afitauli; o lo’o iai lava fa’afitauli i totonu o Samoa.

“E pei o le isi tulaga lea ua fa’atuputupula’ia i totonu o Samoa i le taimi nei o le tele ma le anoanoa’i lea o soligatulafono.

“Ua alualu lava i luma le tele o solitulafono i totonu o Samoa. Ma ou te talitonu lava a’u ia o le tagata lava ia e mafua ai ona tula’i mai nei fa’afitauli.

“A le mafuta lava le tagata ia  i le Atua, e le taitai ona feagai ma ni puapuaga.”

SS
By Sarafina Sanerivi, 30 December 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?