O LA’U TALA FO’I

14 February 2016

1. Matauina i Tala Fou le faaupuga a Tu’ula-o se sui faatu lea mo le Faiga Palota a le Itumalo o Lepa o loo loma nei -ma o le a tauva ai ma le Palemia. Fai mai a ia na te le mafai ona faato’ilaloina le Palemia-ae o le fesoasoani a le Atua ma lana ta’ita’iga-e mafai ai ona tupu soo se mea.

A tuu la i se tasi itu- e matua sa’o lelei le faaupuga a Tu’ula-talu ai o le Atua na te tofia le tagata ae le o le tofia e le isi tagata! Manaia le finagalo faaalia o lea sui faatu-ae ia manatua foi- fai mai le upu a le atunuu-…..”e mafai foi ona gau le sila i le fa’i!

O lona uiga la-o soo se mea lava e i ai le Atua-e mafai ona tino mai! Ae afai la e mafai ona tutupu vavega-e faapefea pe a uma ane le palota ua faia’ina le Palemia? E ui foi ina fai mai le Palemia e le o popole i lea faiga-palota-ae ia manatua lelei-e leai se mea e faigata i le Atua! Ma afai ua silafia e le Atua ua tatau ona fai se suiga mo le manuia o Samoa-e tino mai lava! O le a sou taofi?

2. Matauina foi i Tala Fou le finagalo faaalia o Alai’asa Elena Tovi’o Laufasa fai mai ua tatou manaomia se suiga mo se mea e sili ona lelei. Fai mai Alai’asa ua tatau ona toe fai auala galue-suavai poo paipa, faaleleia o a’oa’oga a le fanau ma auaunaga a le falemai faa-itumalo.

ADVERTISEMENT

O le saunoaga a Alai’asa  Elena- o ia auaunaga e le o lelei. Afai la e moni le finagalo o lea sui faatu mo le Faiga-Palota-o lona uiga-sa matua lafoa’i lava e le Malo ia galuega. A fua la i le tele o tupe o loo aumai nei e fai ai galuega tetele ae o lenei e le o lelei auala o lea itumalo –o lona uiga-e le’i faatinoina ia galuega mo le tulaga lelei lautele o vaega uma o le atunuu ae na o ni nai vaega poo itumalo foi o faipule o le malo! O le a sou taofi?

3. Matauina le anoano o sui faatutu mo le faiga palota o loo loma nei faatasi ai ma le tele o finagalo faaalia o le atunuu e uiga i ia sui faatutu! Afai la tatou te fesili poo le a le pogai o le fia avea o isi ma sui faatutu- e tasi lava le tali-o le fia avea ma Faipule o le Palemene.

O le itu taua la e tatau ona tatou tilotilo lelei i ai-pe o se sui faatu e mafai ona tumau i lana ta’utinoga i lona itumalo! A tatou tilotilo la i Vaega Faa-Upufai o loo i ai nei-o le HRPP lea ua savali i le 40 tausaga o pulea le malo o le atunuu-ma le Tautua Samoa Party lea o loo avea ma Itu Agai.

O itu taua la e tatau ona tatou faamamafaina mo lenei faiga-palota-“ua matua manaomia lava e Samoa se suiga! Suiga mai le a? Suiga mai le tulaga pagatia o loo i ai nei le atunuu- talu ai faiga pi’opi’o a le HRPP lea ua maumaua ai le faitau miliona ma miliona o tupe a le atunuu. E mafua la ona tatou faamamafa lenei itu tau faiga-pi’opi’o-ona o le pogai tonu lea ua pogai ai le mativa masaesae o le atunuuiI le taimi nei! A tatou tilotilo i le aitalafu a le atunuu i fafo-o lea ua $1.1 piliona.

O ai e totogiina? E totogi e le atunuu e amata atu i le taimi nei se’ia aulia isi tupulaga e 3.4, ma le 5. A tatou tilotilo i totonu o le atunuu-o lea ua totogi e tagata o le atunuu le aitalafu a le EPC, toe totogi e le atunuu suau’u ia e aumai e vili ai le eletise-ma toe totogi foi ma pili o latou moli!

A faapefea la ona le matitiva le atunuu? Afai la o se aiga e leai se tagata faigaluega-a faapefea ona tausi lea aiga? O le pogai lea ua le aooga ai nisi o fanau-ae ua o atu i luga o ala tetele e faatau atu oloa i le ao ma le po-ona o le tau tausiga o latou aiga! Afai la o lea ua savalia le 40 tausaga ae o lea lava e fai faiga pi’opi’o a le HRPP-o lona uiga-ua matua tatau ma onomea ona fai se suiga ina ia mafai ai ona lavea’ina le atunuu mai lenei tulaga mata’utia ua i ai-talu ai faiga pi’opi’o a taitai o le malo ma taupulepulega leaga a le aufaigaluega a le Malo! O ai la e fia palota i le mea e oti ai?

O ai se matua e fia palota i se mea e le manuia ai lana fanau?Ae o le itu e sili ona ta’ua- afai ua mafatia le atunuu talu ai faiga pi’opi’o a le malo-ae fai mai le Palemia e leai ni a latou faiga pi’opi’o-o se faigamalo la lea e mafai ona tatou faatuatuaina? O se faigamalo lea e mafai ona manuia ai le atunuu? O le a sou taofi?

14 February 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?