Mana’omia e Kapati se fesoasoani i lona fale

AL
By Aruna Lolani, 28 February 2017

“E leai se aoga e taumafai ai e sefe le tupe, ae e tatau lava ona fa’aalu i le aoga a la’u fanau.”

E faigata ona fa’atusatusa se olaga ose aiga e nonofo se fale laitiiti toe a le mafai ona e savali ai ma olaga o isi aiga.

O se fa’amatalaga lea ile Fofoga Samoa a le tama ia Kapati Poamo, 34 le matua o lona soifua mai Avao Savai’i ma Saleimoa. 

O lo’o mana’omia pea e Kapati se fesoasoani ile fa’ateleina o le latou fale mo lona aiga. 

“O a’u e le’o se tagata mau’oa ae o a’u o se tagata e galue malosi ma fai so’o se mea ou te iloa e aoga ma fesoasoani atu ile aoga a la’u fanau. O le mea na ou te fa’amuamua lava. 

“E leai ma se mea i lenei olaga e faigofie. O lona manatu fa’aalia lea,

“O le matou aiga e laitiiti lava tupe maua, e faigata a la ona taumafai e paketi uma a matou mea e fai fa’atasi ma le fausiaina o se matou fale fou. Aemaise a la pe’a iai fo’i aoga a tamaiti aua e tatau ona fa’amuamua le mea lena. 

“Na’o lo’u to’alua lava e faigaluega i le matou aiga. E fa’aaoga la le tupe na e maua i lana totogi mo mea’ai fa’apea fo’i le aoga ma pasese o tamaiti. 

“E fiu lava e paketi ina ia maua se tupe sefe mo se fale lelei ma mafanafana, ae e vave lave le alu ole tupe mo isi mea fai a le matou aiga.

O lo’o tauivi pea Kapati ile tau atina’eina o le aiga ae o lona to’alua e faigaluega i le kamupani a le Yazaki aua le su’eina o se tupe. 

ADVERTISEMENT

Ae le gata i le su’eina o se tupe mo le aiga i aso uma, ae fa’apea fo’i se tupe mo noataga. 

“Pei ole faigata lava ole olaga lea ou te va’ai ai, ia ole laitiiti o le tupe maua ae tele mea e mana’omia ai le tupe.” O lona manatu fa’aalia lea. 

“E iai mea a le nu’u ma le lotu e fai, o le tupe fa’aalu ile aoga a tamaiti ia ma mea e mana’omia e le aiga. O le tupe la e maua ile totogi a lo’u to’alua, e matua le lava a. 

“Ia ma o le mafua’aga na e le’o lelei a se matou fale i lenei taimi.

E ui lava ina le lelei lea tulaga mo Kapati ma lona aiga, ae e fa’amuamua pea e ia le lumana’i a lana fanau. 

“E a’o’oga uma la’u fanau.” 

“Po’o lea a la le mativa o lo’o ou iai, ou te fa’amuamua pea i le latou aoga. Ou te mana’o e tuputupu a’e ma ola ini olaga lelei atu na i lo’o le olaga o lo’o iai i le taimi nei. 

“E iloa lelei lava e la’u fanau le faigata ole olaga nei, a lelei la latou ma fa’au’u mai le aoga, e tele lava se suiga lelei latou te maua. 

E tusa ai ma le manatu fa’aalia a Kapati, o lona aiga ma le tele o aiga matitiva e le amana’ia e le malo. 

“Le taimi nei e le’o maua se fesoasoani mai le malo mo lo’u aiga. O lona manatu fa’aalia lea. 

“O lea a e tausi a e lo’u aiga latou ia. O se va’aiga matagofie pe’a fa’apea e amana’ia e le malo nai aiga ia e mana’omia se latou fesoasoani. 

“Ae peita’i e ui lava ina matou le maua se mea ae o le a matou taumafai pea.”

“E to’atele a tagata e tele  a latou tupe, ae e faigata ona maua nisi e lima foa’i ma le loto alofa po’o nisi fo’i e fia fesoasoani mai i tagata e vave mana’omia fesoasoani pei o matou.”

AL
By Aruna Lolani, 28 February 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?