Manatu O Le Fa’atonu - ‘Aua le faifai le ‘ulo i le kikaka

MK
By Mata'afa Keni Lesa, 02 August 2016

E mata’utia fo’i le mateletele a le Palemia i si Ali’i Komesina o Falepuipui ma ‘Au’aunaga Toe Fuata’ina, le Afioga a Taitosaua Edward Winterstein, i lona ofisa, i le vaiaso talu ai. 

O le mea moni, ua avea Taitosaua – pei fo’i o isi tagata-faigaluega a le malo – ma talitua’a o polo tu’u-mamao a ta’ita’i ma’ema’eā, ua manatu ane lava ua ia latou le pule ma le faitalia e ‘otegia ai ma ‘upu’upu tetele i so’o se tagata i lalo o le latou va’aiga i so’o se taimi i so’o se tulimanu o Samoa nei. 

E matua faigata lava lea tulaga ae maise pe a toe tomanatu i le mataga lea na fa’amalosia ai e se pagota na sola mai le to’ese, se tama’ita’i turisi mai fafo. Ua tele tala ua fai i lea mea mata’utia ma o le a le toe aloa lea ogasami. Peita’i, ua tatau lava ona iai se aoga o le mea na tupu, e toe timata ai le upega ma le fa’amoemoe maualuga, ia ‘aua ‘aua ne’i toe tupu! 

I Samoa i lenei aso, ua aga le to’atele o le atunu’u i tiute-fai ma fe’au masani, ma ua tu’utasi fo’i le silasila mo le aga’i i luma ma le lumana’i. 

Peita’i e foliga mai o lo’o matua faigata lava i le Ali’i Palemia, ona fa’agalo lana polokalame o le 60 Minute, lea lava ua o’o i isi mea e matua ‘ese mamao, a ua fa’asasao ai lava lona to’atama’i ma fa’ate’ia ai sia toe’aina o Taitosaua (tulou le suafa).

Fa’afofoga fo’i iai: “Ua tatau fo’i ona fai o se fa’ai’uga i le Komesina o Falepuipui, ona o lona fa’avalevalea ma le fa’atamala, ua mafua ai ona fa’alumaina le atunu’u.” 

E matua ogaoga lava, ae a?

Fa’atamala? Fa’avalevalea? A’o ai tonu lea ua mafua ai le ta’uvalea o Samoa? 

Moni o Taitosaua e fitoi tonu iai le va’aiga lelei o le Falepuipui i Tafa’igata, o ia e pulea lea nofoaga ma sa tatau ai lava ona silasila toto’a i le taofiofia o pagota mai le afaina ai o le mamalu lautele. O ia fo’i e tausolomua i so’o se fa’atinoga ma ua talafeagai ai fo’i la ona iai o sona ila ma tu’ua’ia ona o amioga a Lauititi Tualima ae maise isi pagota uma o lo’o sa’oloto soloatoa i le omai i fafo ma le falepuipui. 

Peita’i ane, e le tatau lava ona fa’asatauro na o ia pe afai o lo’o fa’aletonu le ta’ita’iga, le pulega atoa ma le faigamalo ua mafua ai ona tupu o lea fa’aletonu, lea ua matua faigata lava ia Tuila’epa ona toe fa’agalo. E le fou mea nei e tutupu mai Tafa’igata ma o le mea sa’o a, lea e le’i leva tele ona iai o Taitosaua. A’o fa’afitauli lava nein a tutupu mai aso-anamua, uma atu lea Komesina ma lea Komesina, o mea lava nei sa iai i le amataga. Ioe, e le fou. 

E le galo le Komisi Su’esu’e e le’i mamao atu, o ripoti a le Matagaluega Su’esu’e a le Iunaite Setete o Amerika ae maise le mau fa’amatalaga o fa’afitauli o lo’o iai i Taga’igata. 

O le fesili, o ai tonu e afua mai ai nei fa’aletonu?  

ADVERTISEMENT

E faigofia lava le tali; o le Malo. Le malo lea e vi’iloa nei e Tuila’epa ona o le tele o tausaga o pulea pea le atunu’u. O latou tonu lava ia, e mafua ai fa’afitauli nei ma o latou fo’i e fetaui iai le mau faitioga ua laulauvivilu ai le atunu’u ma le lalolagi.

Lona uiga, afai ua fa’atamala se tasi, o le malo tonu lava lena. Ioe le atunu’u e, na o se tagata-fa’avalevale e taumafai e lafilafi, e tau ‘alo’alo ma tu’ua’ia se pa i le falepuipui.  

E talitonu le fa’amoemoe, o nei fa’afitauli uma e afua mai ona o le sasala leaga o le malo, i le le-faia o ona tiute, le tu’ufau o faiga-pi’opi’o ma faiga fa’atautala ua mafua ai ona matua pagatia le tulaga o tatou falepuipui. Silasila i le fia miliona ua ma’umau, ae ‘ana fa’aaoga tatau mo le falepuipui.

Tupe ia na maua e le Pule ma Su’etusi Sili ma fa’amaonia i Ripoti a le Komiti o Ofisa a le Palemene (OPC), lea na fa’asalalau fa’afia e le nusipepa nei, faiga-pi’opi’o ma le fa’atautala, le le-lelei o pulega ma le fa’atamala o le ‘aufaigaluega a le malo. 

O ripoti na e mautinoa, na matua fa’alumalumaina ai Samoa nai lo se isi mea aua ua matua matilatila ai le va’aiga mataga o le malo. O se ila e le-toe mavae ua ‘amusia ai ma fesiligia faigamalo lelei, faiga malamalama ma mautali atu le malo e pei ona lalau ma lalau mai. 

Atonu ua manino lelei ai fo’i le mafuaga o le gugu pea o le Ali’i Palemia i ripoti nei, a’o lea ua si’ita ma fa’atutu-sese lona ma’ema’ea pei ona osofa’ia ai nei Taitosaua.  

Ae tatou malilie-gugu ia ma fa’apea ane i lenei aso, o le fua lava e te lulu, e te toe selesele. Aua o le tele lava o nei mau fa’afitauli – e aofia ai ma Tafa’igata – e faigofie lava ona fo’ia, pe ‘ana fai tonu e o ta’ita’i, mea sa folafola ma saunoa iai o le a fai.  

Lea tonu a, o le a le taua o le ripoti sa’o o le Su’etusi Sili i le Palemene a’o lea e leai se fofo o faia i mea o lala’u atu i ana ripoti? 

A’o ai la e mo’omia se Su’etusi Sili pe afai e le amana’ia ana ripoti? 

Le a le tāua o le fai o na Komiti fa’aPalemene ae le fa’aaogaina fautuaga o avatu ai? Ae a pe ana ‘aumai uma na tupe e ma’umau i le faiga o na ripoti, e ‘ave mo le ‘au-matitiva o le atunu’u? 

O le mea lea e talanoa atu ai, o faiga pi’opi’o nei, le fa’atautala ma le le-va’aia lelei o galuega a le malo e pei ona ripotia, e le tatau lava ona tu’ufaua. E le tatau ona tatanua i lalo o tauvela ae fa’apea mai ma fa’apea atu, o lo’o sologa lelei pea le Parataiso o Samoa. Ioe, o le mea tonu lena o lo’o tiga ai le atunu’u. 

Ae silasila fo’i la i le tatou Palemia lea e faimea-feato ma saunoa i ‘upu pei o le fa’atamala ma le fa’avalevale i le fa’atinoga o tiute.

Sole! Se soia le fetogia’ia fa’asoi o tua’oi le leaga.

Moni ai nai ‘olomatutua tuā, ‘aua le faifai le ‘ulo i le kikaka. Le a sou finagalo? 

Manuia lenei aso Samoa ma fa’amanuia Le Atua. 

MK
By Mata'afa Keni Lesa, 02 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?