Le-ta’alo Motuga a ua sauni le Tupu o Paris e vivini i Lonetona

VM
By Vatapuia Maiava, 19 May 2016

Ma’ea lelei ona fa’ailoa i tama o le To’afitu a le Manu, e ‘aua le toe mafaufau i le tulaga maualuga sa iai i le Aso Gafua, lea na siamupini ai i Paris, ae mata’itu le ta’amilosaga i Lonetona i le fa’ai’uga o le vaiaso nei. 

A o se tala fa’anoanoa lea mo le ‘Au, ona o le a le-mafai ona ‘auai Alamanda Motuga mo ta’aloga i Lonetona. O lo’o manunu’a fo’i Tila Mealoi ma Samoa Toloa ui o lo’o finau malosi le faia’oga, o Damian McGrath ina ia atoatoa ma malolosi lelei mo lea fa’amoemoe.

 “Pau lava lo’u popolega, o le fa’amanu’alia o tama a ua lalata mai le ta’amilosaga e sa’ili ai se avanoa mo le Olimepeka i Rio,” o lana saunoaga lea. “O lo’o matua manaia lava a matou koleniga i lenei taimi; ui ua fa’aletonu le tau’au o Alamanda ma o le a na o le sefulu-tasi ai tama o le a tauina le taua.

“O lo’o fa’aletonu fo’i Tila ma Samoa ae o lo’o iai lava le fa’amoemoe maualuga, e toe tula’i mai mo le ta’amilosaga mulimuli lenei i Lonetona. 

Ae o lo’o to’amalie lava le Ali’i Faia’oga.

O le toe tepa tasi i le ta’a’alo a le ‘Au i le vaiaso talu ai, na fa’aalia ai lona fiafia tele i tagata-Samoa ona o le lagolago sa tu’uina atu mo le ‘Au.

“O le su’ega-siamupini ma Fiti, o se ta’aloga faigata tele ma e matua ‘ese lagona na o’o iai,” o lana saunoaga lea. 

ADVERTISEMENT

“Na ‘ou iloa lava, e mafai ona matou finau malosi i le ‘afa mulimuli o le ta’aloga, ma e pei fo’i o le tapua’iga a Samoa, sa ‘ou matua mimita lava i le tulaga sa iai mafaufau o tama, sa le fa’avaivai ai ae sa finau malosi ma talitonu, latou te mafaia ona fa’afaia’ina le ‘Au a Fiti.”

Moni fo’i sa lami ai Fiti i le ta’aloga mulimuli a le Pool, ae na toe tula’i lava ma tali atu i le ta’aloga mulimuli lea na toe taui ai le faia’ina o Fiti i le su’ega-siamupini.

“Na matua fa’aletonu lava matou i le ta’aloga a le pool, ma o le tulaga tonu lena sa ‘ou fa’amamafa i tama, e taula’i iai le va’ai i tapenaga uma sa faia i le aso atoa,” o le fa’aaliga lea a Damian. 

 “Na ‘ou matua fa’amamafaina, le agaga-talitonu ia latou lava uma ma ia ‘aua lava ne’i ‘ela le va’ai i le avanoa lea e siamupini ai; o le alu ma le mafaufau talitonu e malo, e malo lava pei ona va’aia. O la’u fautuaga lena, ae fa’afetai, sa teu-mau i o latou fatu.” 

“’Ou te lagona lava le vaivai o le agaga i taimi o ta’aloga ae ‘ou te taumafai lava, e ‘aua le fa’ailoa atua i tama ona ‘ou te mana’o ia va’ava’ai mai, o lo’o to’amalie pea ma ‘aua ne’i afaina ai se tasi i o’u lagona na o a’u.” 

Na ta’ua fo’i e le faia’oga, talu ai o le a iai nai suiga laiti, e le avea lea ma tulaga e suia ai le ta’a’alo a le ‘Au, pau le tulaga o lo’o popole iai, o le matua tapena mo so’o se mea.

 “Na matua manaia lava a matou tapenaga, fa’apea fo’i le fuafuaga o ta’aloga uma,” o lana saunoaga lea.

“’Ou te fia momoli atu lava le fa’afetai tele i tagata-Samoa uma ona o fa’amanuiaga na ‘aumai.

“’Ou te iloa ua matua fiafia ma mitamita le atunu’u uma i ana tama-fanau nei; le manumalo ai i se Ipu i le tausaga o Ta’aloga a le Olimepeka, i le taimi ua taufai malolosi uma ‘au ina ia ‘ausia le maualuga lea ua manuia ai le Manu. 

“Na ta’a’alo uma tama ma le naunau ae maise o le talitonu i o latou tagata, ma ‘ou te talosaga atu ai, ia manatua pea matou uma i a tou tatalo – Fa’afetai tele lava.” 

VM
By Vatapuia Maiava, 19 May 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?