O la’u tala fo’i

22 December 2015

1. Matauina i Tala Fou o lea ua tofia Namulauulu Alama Ieremia e avea ma Faia’oga o le Manu Samoa. Sa le mafai la ona maua mai se faamatalaga e uiga i lea itu mai le Iuni Lakapi a Samoa.

Sa faapea ona le fia faaalia se finagalo o Namulauulu Alama Ieremia e uiga i lea tulaga.

E faapea o le Laulau na faia lea faaiuga-sa taiulu ai le sa avea muamua ma kapeteni o le Olopeleki o Graham Mourie-ma o le faaupuga fai mai e sili atu lava ona lelei ma talafeagai Namulauulu mo lea tofiga i lo se tasi o le 20 tagata na talosaga mo lea tulaga. E ui foi ina sa i ai nisi tagata talosaga mai fafo mo lea tulaga-ae fai mai e sili atu ai lava Namulauulu.

Ia afai la ua ‘autasi ia Namulauulu talu ai o ia le tagata e sili ona agavaa mo lea tulaga-faamata la o le a tuu ai ia Namulauulu tapenaga uma mo lana ‘au-aemaise ai o le tofiga o lana ‘au? O le isi fesili taua lava-faamata la o le a galulue faatasi ai le Faiaoga fou o le Manu Samoa ma le Iuni Lakapi a Samoa?

O le fesili la e silisili ona taua-aisea ua le mafai ai ona sui ma le Komiti o le Iuni Lakapi a Samoa? Afai ua sui le Faiaoga fou o le Manu Samoa-o le itu e sili ona taua o le sui lea o le Komiti Faatonu a le Iuni Lakapi ina ia mafai ai ona faatino mea uma e manaomia e le Faia’oga fou  mo le Manu Samoa? O le a sou taofi? 

2. Matauina foi i Tala Fou le faaiuga o le Tauvaga mo le Tausala o le Lalolagi-ma e ui lava ina le avea Latafale ma Tausala o le Lalolagi-ae tapena pea ma sauniuni mo le lumanai’. O le mea sili o lena ua e tofo i ai ma e le faapea o le a uma ai le lalolagi! Afai la ua le taulia le faamoemoe o Latafale-o le mea sili lava-o lea ua tatou iloa- e le o se manu’a mai fafo-a’o le manu’a lava mai fale!

ADVERTISEMENT

O faiva uma fai mai a tapua’ia e manuia; ae o le faiva o Latafale-e tele mea o le le manuia-ae toe tautaulia. E faapefea ona manuia pe afai e tausolomua taitai o lona lava atunuu-ona fetu’u ma faa’amu’amu ia te ia?O lea la ua iloa lelei lava e le lalolagi le va’ava’a o taitai o lenei atunuu-e o’o lava i mataupu e gata i tamaitai ona tautala i ai—o fai lava i ai upu! A faapefea la ona titina lenei mea o le sauaina o tamaitai-pe afai e silasila mai le atunuu e tausolomua i ta’ita’i o Samoa ona pei e ula i aia tatau a tamaitai? O le a sou taofi?

3. A matau atu i Faaaliga a le Aufaifaatoaga i Upolu nei ma Savaii-e ma’eu le uiga ese o le tulaga ua i ai nei faaeleeleaga a le atunuu! 

O le vaai la mo le lumana’i-o le tulaga lava lea o le a i ai le ‘aufaifaatoaga i aso o i luma! O le uiga o le manatu-e maumau le afu maligi o le aufaifaatoaga-ae na o Samoa nei lava e faatau ai a latou faaeleeleaga. O lona uiga- o nei faaeleeleaga uma-sa tatau ona auina atu i fafo e pei ona sa i ai muamua. O le fa’i, talo, taamu, ufi ma isi mea-sa mafai ona la’u atu i fafo ma maua mai ai tupe mo le aufaifaatoaga! 

O le fesili la-aisea ua le mafai ai e le Malo ona avatu nei oloa uma i fafo ina ia maua ai ni tupe a le aufaifaatoaga? Na amata mai lava le Malo o Samoa o ave nei faaeleeleaga uma i fafo-ma sa tele tupe a le aufaifaatoaga sa maua mai ai aemaise ai o le atunuu lautele-ma o le pogai lena na faatu ai le Ofisa o le Komesina o Fefaatauaiga i Niu Sila-ma sa faafoe foi e se tasi sa lauiloa i le 2AP i aso ua mavae!

Afai la sa mafai e taitai ua mavae ona auina atu faaeleeleaga a le atunuu i fafo-aisea ua le mafai ai e le faigamalo i le taimi nei? E faapefea la ona aveese le mativa lea ua afaina ai le atunuu lautele pe afai e le mafai ona auina atu a latou faaeleeleaga i fafo!

E tatau i le faigamalo ona na iloa o le tele o ana lafoga ia ua pologa ai le atunuu-o le tele foi o ana faiga pi’opi’o ua atili ai ona pagatia le atunuu! 

A faapefea la ona le matitiva tagata! E fai mai e gagau le vao ma fai faatoaga-ae a selesele faatoaga e le mafai ona aveina i fafo? 

O le a la lou taofi? O se mea tatau pe leai lea o loo fai e le Malo-o le le auina atu lea o fua o faatoaga a le ‘aufaifaatoagai fafo ina ia maua ai ni a latou tupe e tausi ai o latou aiga-ma le tutuli soo o tamaiti e faatau atu oloa i luga o ala tetele! O le a sou taofi?

22 December 2015

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?