Ripotia e Vatapuia Maiava

Fa’aliliu e Maiava

Na matua fa’ate’ia se tina na fa’atau sana taga-polesi i se faleoloa i Vailele, ina ua taunu’u atu i le fale, e tele atu isi mea na avatu fa’atasi ai i le pepa-polesi mo ia.

O le tina lea – e mana’o e fa’ailoa o ia o Suga – na pei e va’ai i ni aitu ina ua tatala atu le pepa-polesi, ae fitifiti solo ane tama’i-manu nini’o pei ni loi.

“E masani lava ona ‘ou fa’atau ai i le faleoloa lea ae o le taimi muamua lea ua tupu ai se mea fa’apea i a latou oloa,”o lana fa’aaliga lea.

Ui la i le fa’ate’ia o Suga, ae o lo’o malamalama lava lona finagalo, se’i tu’u se avanoa i le faleoloa e fai ai se fa’amatalaga.

 “Na ‘ou fo’i iai ma fesili mo le pule ae fai mai, e le o iai. Ae na ‘ou fa’aali lava iai le pepa-polesi lea ma ‘ou fai iai e toe ‘aumai la’u tupe.”  Ae uma ane, ua tonu ia Suga e sili pe a toe fo’i ma ‘ave le taga-polesi.

“Na ‘ou fai iai o le a ‘ou alu e ‘ave i le Matagaluega o le Soifua Maloloina,” o lana fa’aaliga lea ma fa’aopoopo mai, na ia tu’u ai le numera o lana telefoni, lona igoa, aiga ma le nu’u e sau ai. “Na ‘ou fia iloa po’o le a le isi a latou mea o le a fai.  Na ‘ou fa’apea ai o le a matua popole ma salamo peita’i, e foliga mai e le mamafa ia latou, e le kea iai, pei e le fia-kona mai.

“E le’i telefoni mai lava.” 

Fai mai Suga, lea ua iloa nei, e iai faleoloa e le popole lava i mea fa’apea ma oloa latou te fa’atau atu. 

 “E tatau ona iloa e le mamalu o le atunu’u, ituaiga faleoloa nei ma tagata e le popole lava latou i oloa latou te fa’ataua. E matua le-malamalama lava nei tagata i tulaga fa’aPorofesa o mea fa’apenei ae maise fo’i la, le ‘au’aunaga talafeagai e ao ona tu’uina atu i tagata fa’atau lautele. E matua le-taliā lava tulaga fa’apenei.” Sa fa’afeso’ota’i atu Tusi Tuimanatu, le Ta’ita’i o le ‘Aufaigaluega o le Faleoloa ma fa’amaonia ai sa fa’atau e Suga se taga-polesi mai le latou faleoloa peita’i, latou te le-iloa pe fa’apei ona o’o iniseti ma manu-nini’i i totonu o le taga. 

“E matua matou le-‘ilafia lava se mea na tupu aua e le’i te’a le taimi e fa’aaoga ai oloa ia,” o le fa’amatalaga lea a Tusi. “Na matou su’esu’ea ta’itasi uma pusa-polesi nei ina ua taunu’u mai le fa’asea  ma e foliga mai, e pau lava lea o le taga o lo’o a’afia i iniseti.” 

Fai mai Tusi, o le taga lea sa fa’atau mai se faleoloa si’i-atoa ae fa’anoanoa ai ona ua fa’atau e Suga le afifi tonu lea fa’apea ua leaga.

“E le’i iai lava se manatu e siakia lelei pusa uma nei e fa’atau mai le faleoloa si’i-atoa,” o lana fa’aaliga lea. “O le mea o le a fai, o le a toe fa’afo’i iai pusa nei ma taumafai e toe fa’aola mai le tupe na fa’atau ai.” 

Sa feso’ota’i atu fo’i ia Tugaga Sini, se ofisa i le Faleoloa Si’i-atoa ma ta’ua ai, latou te le-iloa lava se mea e uiga i lea mata’upu.

“A iai ni fa’afitauili tau oloa mai ia matou, e tatau lava ona tou o-mai i’ine ma ‘aumai se tou fa’asea,” o le fa’aaliga lea mai ia Tugaga.

“A o le taimi nei lava, ‘ou te le’i fa’alogo lava i se tala e uiga i oloa na ta’ua.”