Laiti mea na fa’aleagaina: Taunu’uga o su’esu’ega na fai

IL
By Ilia L. Likou, 09 June 2016

E le-tele na’ua se a’afiaga o le si’osi’omaga sa iai ina ua pa ma mu se tasi o tane-suau’u i luga o le Uafu i Matautu, lea na maliu ai se tasi o le ‘aufaigaluega a le Kamupani Suau’u – le Petroleum Product Supplies Ltd. - i le amata o le tausaga nei. 

O le fa’ai’uga lena a se Vaega Fa’apitoa sa su’esu’eina a’afiaga o le si’osi’omaga mai lea fa’alavelave, na matua tētemū ai ma popole le to’atele o le atunu’u ma tapunia ai fo’i le taulaga atoa i lena aso i le masina o Aperila.  

O le Vaega Su’esu’e lea sa aofia ai sui mai le Matagaluega o Puna’oa Fa’aleNatura ma le Si’osi’omaga, le Fa’alapotopotoga o Su’esu’ega Fa’aSaienitisi a Samoa, le Vaega mo le Si’osi’omaga o le  Pasefika, le Matagaluega o Tupe fa’apea Inisinia Fa’apitoa e to’alua mai vaega-tuma’oti.

I se ata o le ripoti a le Vaega Su’esu’e lea na ‘auina atu i le Komiti Faufautua mo Fa’alavelave Fa’afuase’i - lea fo’i na fa’ao’omai i le Samoa Observer - o lo’o ta’ua ai e fa’apea, latou te le’i silasila tonu pe na fa’alogoina fo’i se nanamu o se suau’u-tiso na masa’a mai le tanu na mu. 

Moni sa matua fa’aleagaina ma mu le tino o le tane, ae leai ma se “va’aiga o se suau’u masa’a pe sisina atu i isi nofoaga tua’oi ae maise ai le nofoaga o fa’aputu iai pusa-la’u-oloa i sasa’e ma sisifo ma le tua’oi i sauté ma le sami. Sa fautuaina le ta-loka uma o tane-suau’u i le nofoaga atoa o lo’o iai tane-suau’u.”

O le fa’ai’uga la lea o le su’esu’ega, e la’iitiiti lava se a’afiaga o le si’osi’omaga na iai.

ADVERTISEMENT

 “I le mae’a ai ona asia o le nofoaga lea na tupu ai le mu fa’apea talanoaga sa faia ma sui o le Matagaluega o Tupe, ua fa’amalieina ai le matou vaega, e le tele na’ua se a’afiaga o le si’osi’omaga na iai ae maise o nofoaga e tu-lalata iai,” o se vaega lea o le Ripoti.

“E fautuaina ai: Le leai o se isi iloiloga o a’afiaga o le si’osi’omaga e tatau ona toe faia i le nofoaga na tupu ai le mu.” 

O le Aso 04 o Aperila i le 10.00 i le taeao, na lagona ai le pa-leotele i se tasi o tane e teuina ai le suau’u i luga o le uafu i Matautu-tai.

O lea pa leotele  na tupu ai se afi, ma fa’atotope atu loa iai le ‘Au-Fui-mu a le Pulega o Mu ma ‘Aua’unaga Fa’afuase’i. Na ‘ave’esea uma e vaega-galulue mo fa’alavelave fa’afuase’i, tagata uma sa i luga o le uafu fa’apea nofoaga e taulalata iai. 

E to’atasi se tagata-faigaluega o le kamupani-suau’u sa faigaluega i le tane-suau’u lea, na maliu ai i lea fa’alavelave. O le isi sa la to’alua, na togafitia ma toe te’a i tua i le aso lava lea. 

Sa vavave ona tapunia atoa le nofoaga ‘autu mo suau’u i Sogi i le aso lea, mo le puipuiga lava o tagata-lautele, o pisinisi ma faleoloa, le taulaga atoa ma le atunu’u. 

O le fa’amoemoe ‘autu o le Vaega mo Fa’alavelave Fa’afuase’i, o le taofiofia lea o le sosolo o le afi i isi tane-suau’u e lua o lo’o tutu-fa’atasi ai i le uafu.

Ina ua silafia e le Ali’i Palemia, Tuila’epa Sa’ilele Malielegaoi le fa’alavelave lea, sa ia ta’ita’ia ai loa ma fa’atonutonu galuega a le Komiti Faufautua mo Fa’alavelave Fa’afuase’i mai le Nofoaga ‘Autu o le Vaega Tinei Mu ma ia talosagaina ai loa se fesoasoani a Malo o Ausetalia, o Niu Sila ma le Iunaite Setete o Amerika, ne’i sosolo ma tele le mu. 

(Silasila i le Damage minimal, investigation finds mo le Ripoti a le Vaega Su’esu’e na tu’uina atu i le Komiti Faufautua mo Fa’alavelave Fa’afuase’i)

IL
By Ilia L. Likou, 09 June 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?