O le kapeteni fou o le Manu Samoa e le fou. Atonu e ono mafai ona avea o ia ma alii aupito itiiti i luga o le malae i le Aso To’anai pe a ta’a’alo le Manu ma Georgia i le Apia Park. 

O David Lemi, o se tama taalo ua leva o le Manu Samoa, sa avea foi ma kapeteni muamua o le ‘au. I lenei la taimi, o le a fesoasoani ia te ia Faatiga Lemalu i le avea ma Sui Kapeteni. 

 “E tumau pea ona avea ma faaaloalo ma se tulaga taualoa le avea ma kapeteni o le Manu,”o le faaaliga lea a Lemi i le Samoa Observer. “Atonu sa ‘ou le auai i le Ipu a le Lalolagi ae ou te talitonu sa i le Alii se fuafuaga tele mo a’u ma o lo’u toe taliu mai la i totonu o le ‘au a Samoa-o se mea lea  e matua uiga ese lava.

 “Ina ua malaga mai le faia’oga o Alama i Peretania, sa ma talanoa e uiga i lo’u fo’i atu i le Manu. Sa ‘ou le tali vave ia te ia talu ai-sa tuu atu tasi lo’u mafaufau i le taamilosaga sa ‘ou auai i lena taimi. Ae peitai-ina ua mae’a la’u taamilosaga-sa ‘ou toe faanatinati mai iinei ina ia auai faatasi ma tama.

“Ua ‘ou sau iinei ma le faamoemoe –ia tau lava ina avea ma vaega o le ‘au ae ina ua faailoa mai e Alama ia te a’u anapo ina ia ‘ou ta’ita’ia le ‘au-na ‘ou lagona le tulaga faaeaina.” E tusa ai ma Lemi, o loo lelei tapenaga a le ‘au e tusa ai ma tapenaga i le agai atu i le taaloga faitauina i le faaiuga o le vaiaso.

O loo matua galulue felagolagoma’i tama i se tulaga lelei,” o lana faaaliga lea. “Ae ou te manatu-o lea tulaga e o faatasi ma le aganuu a Samoa, ua na o i matou lava o tama taalo tuai ia ua toe o mai e fesoasoani i o tatou uso laiti. 

“O se lagona uiga ese lea mo a’u ma i le avea ma uso matua i totonu o le ‘au ma vaai i le tulaga naunau o a tatou tama talavou mo se avanoa. “O se vaaiga fiafia lea o le vaaia o i latou o loo matua finau mo le ‘au.”

Ua matua fiafia lava Lemi i le tulaga faigata o galuega o loo galulue ai tama o lo tatou atunuu. “O a tatou tama taaalo o i iinei o tagata e matua galulue ma le malosi,” o lana faaaliga lea. “O le vaiaso talu ai na ‘ou faalogo ai i isi tagata o fai mai e sili atu lo latou galulue mamafa i lo mea o loo manaomia e faia’oga mai ia i latou.

O lea faatoa lima aso talu ona ‘ou taunuu mai ma ona pau lava o le mea e mafai ona faailoa atu e faapea o se mea lelei le vaaia o le galulue malosi o a tatou tama; o se mea lelei le toe foi mai i se siosiomaga malosi o le Manu.

“Ou te faailoa atu pea i taimi uma i tama taalo fou ina ia tumau pea i o latou uiga, e leai se aoga e taumafai ai ia pei o le isi tagata. “O le pogai ua filifilia ai a’u e faia’oga ona o lo latou tumau pea ia i latou lava, ma o lea e tatau ai ona latou tausisia le faamaoni ia latou taumafaiga faale-tagata; sa ‘ou faailoa atu foi ia i latou ina ia loto maulalo; o Samoa o se malo loto maulalo.”

Sa faamatala foi e Lemi lona fiafia e matamata i sea tauvaga mo tulaga o ‘au, ma e tusa ai ma ia, o lenei tauvaga lelei o le a fesosoani lea e matua faamalosia ai le ‘au. “O loo matua tauva malosi lava tama mo se avanoa i totonu o lenei taaloga faitauina o loo loma,” o lana faaaliga lea.

“O le mea moni, talu ai ona ua filifilia a’u e avea ma kapeteni e le faapea o le a faamaonia ai lo’u tulaga, o le mea lea ua matou matua galulue malosi ai i lea aso ma lea aso ma fai ia mautinoa ua matou maua le faiga sa’o mo le faaiuga o le vaiaso.”

Ae i lona aotelega, ua matua fiafia lava David ina ua taunuu mai i lona aiga ma lagona le mafanafana o le lagolago mai tagata. “Ou te fia faafetaia Samoa mo le latou lagolago faifai pea,” o lana faaaliga lea.  “Ae faapitoa lava i matua o nei alii, na latou tausi lelei i latou; le lagolago atoa ua latou faaaliga lea ua manino i luga o le malae.

“Ou te fia faafetai atu foi ia te outou uma lava ia sa tatalo mo i matou, matou te matua manaomia ina ia faaauau pea e o’o atu i le faaiuga o le vaiaso. “O le upu moni o le a matou tuuina atu mea uma lava i le faafeagai ai ma Georgia. “O se malaga umi i le vaalele mai Peretania Tele, ae ua aoga tele ma lona taunuuga, paga le lelei o le toe fo’i mai.”