lauga - “Auā ua ou iloa o ia ua ou faatuatua i ai”

17 January 2016

Petaia Setu


(II Timoteo.01:12)


A malamalama se mataupu, ua fiafia tagata uma. Afai  foi e mautinoa se faamoemoe lelei, e fai mălie  lava foi mea uma. A ’e talitonuina foi le alofa, ma le faamaoni o lou pule; lou matai; lou ta’ita’i, poo lou aiga, oka, e suamălie mea uma. 

Malamalama lelei Paulo i le olaga lea. Ua ui mai ai Paulo. O le olaga amusia; inosia; tuua’ia; faasinosinomia. Sa sauaina ai; noanoatia ma saisaitia faafia ai; falepuipui ma fasiotia ai. Ae le i faafiti ai le aposetolo. E le i fefe ai pe sisi’o ai. Ae ua ia tautino ia Timoteo, o le mea lea ua tigaina ai a’u i ia mea; a ou te le mā ai lava, auā ua ou iloa o ia (Iesu Keriso) ua ou faatuatua iai. 

O Paulo, o loo i le falepuipui i Roma. O le nofoaga e le taumatea ona maua ai o ni tusi asiasi ma ni tusi faamalosi’au mai aiga ma uo. A o le nofoaga lea ua fau atoa mai ai e Paulo le ola galue o Timoteo mo le galuega.  A o le tusi mulimuli lava foi lea a Paulo, ona oti loa lea o ia i le pule sauā a le Kaisara, o Nero. O Timoteo, o le faifeau ua tuu iai le galuega i le ekalesia i Efeso i le taimi lea. O loo matuā feagai le auauna nei ma le tele o faafitauli ma fili o loo lu’iina ai lona faigaluega talavou. E le o faanenefu foi la i le toeaina le mau faafitauli o loo faamata’uina ai lenei faifeau talavou. O lana faatoeaina, “Ia e onosai…faapei o se tagata tau e lelei a Iesu Keriso.” O le fitafita poo le tagata tau e lelei, na te le faafitia lana tautoga ua uma ona fai. E le toe foi i tua pe solomuli ona o le malosi o le fili. E le faafefeina e le oti lona ola. E tautua i lona ola atoa. Auā ua faamaoni lona alofa. Ua le o se alofa e faatumutumu lima ona fai, poo se tautoga foi ua fai fua. Peitai, ua iloa le afuaga o le tautoga. Ua iloa le tō’aiga o le olaga. Ua mautinoa le taunuuga o le fitafita poo le tagata tau e lelei. Ua faapea le upu a le toeaina i lona atalii, “…ta’u ua i’u ia te a’u le tausinioga…ua teuina mo a’u le pale o le amiotonu….” Ioe, e pei ona ou mua’i a, e le i faia fua. O le olaga sa asa mai e Paulo. E tautala atu foi la, e suamălie ma logosa’ia e le tautua, auā na vaai le tautua o ola mai ai. E ā, e faapena sou ta’ita’i? E faapena lou matai? lou pule? Ua le afaina la ia Timoteo pe masau, pe ’avā’avau  le aposetolo, e matuā mălie lelei; auā ua mălie  le vaai, i le faamaoni o Paulo i lona Matai.

E le i vaai tino le aposetolo ia Iesu. A o lona ola atoa i le galuega ma lona valaauina, o le ata atoa lea (model) o Keriso o loo fausia ai le ola galue o Timoteo. O le iloa lea na talitonuina ai e Paulo lona Alii. 

O le Iesu faasatauroina; o le Iesu toe tu;  o le Iesu lea sa matuā tigaina ai Paulo. Ua lailai ai le aposetolo ma ta’umaasiasiina ai. O lana mau, “ou te le mā ai” Talofa e, ua ia iloa lelei lona matai, e ui e le i vaai iai. Ua iloa lelei Iesu. O lona uiga, o le finagalo o Iesu; o ala o lona Alii; o le faamoemoe  o lona Matai; o le mana’o o lona Faaola; o le faasinomaga mai le Atua; ma le ute o lona valaauina – ia faapei o se tagata tau e lelei. Tagata e tumau; e le femoumoua’i ; e le palaai (2:3-4; 3:14-15); ae finau ina ia ola nisi e le gata i lau galuega, a o lou lava ola.

Le au uso e, o le galuega a Timoteo e le o se galuega eva. E le faigofie. Masalo ua tatou faitau i o tatou aso ua faigofie? Leai! E le faigofie i le tagata ua ia iloa lelei Iesu Keriso. O le fesili – O ā la foliga o le iloa lelei o Iesu Keriso? Alofa i le Alii lou Atua e pei ona a’oa’o mai ai lo tatou Alii. O le alofa lea na te ta vavaeeseina ai mea ua leai se ola o iai, mai le paia ma le mamalu o le Atua Soifua ma lona Alo o Iesu Keriso. Ua atua tatou i tupe. Na o tupe, tupe, tupe le mana’o. O tupe ua tulia ai mamoe. O tupe ua fasiotia ai agaga. Le au uso e, o tigā o loo tautala iai Paulo, o le ola fau ola. O le fga o agaga, ae le o le atinae o fale.

Alofa i lou tuaoi; o le aoaoga lea a Iesu sa tautiga ai Paulo. Oono Timoteo  I le galuega, ae faasaoloto e Paulo I lona iloa lelei o Lē ua faatuatua ma talitonu iai. Ua tala pipi iai e le aposetolo le olaga o nei, ma le faamoemoe o taeao. Ua iloa e Paulo. Ua talitonu e le aposetolo. O tagata mafatia ia! O tagata ia o loo o latou manaomia se fesoasoani; se faamalosi’au.

ADVERTISEMENT

O le uiga o le igoa o Timoteo,  - o le faaaloalo ma le aloa’ia o le Atua, poo le – faaeaea ma amana’ia le Atua. Ou te manatu e faafaigofie ona faamatalaina le faaaloalo ma le amana’ia lea, o lona uiga, Fai le mea ua fai mai le Atua e fai; ae tuu o tatou mana’o. Poo e iloa la le mana’o o le Atua? O Oe! Ia fai oe ma pologa o le talalelei ona o Keriso. Ia fai a’u ma faigaluega (labourer) o le galuega ona o Lē ua ou faatuatua iai. Ia fai oe ma tagata inosia ona o le Upu Moni. Ia sauāina i tatou ona o Keriso.

Samoa e, e faigata tele ala o le Alii; a o lona mana’o lea. ’A ’e le pologa, e te le maua nisi ola. O le faigata lea sa milo ai le aposetolo ma tuusaunoaina ai lona ola; ae na tua i le pale o le ola (4:8). Ua suamălie ia te ia tigā, a ia faaolaina tagata uma ia Keriso Iesu (2 Kori.11:23-28). Ua tautiga i mea uma, ina ia maua tagata uma mo le Alii (1 Kori.9:19-23). O le ola ua tuu mălie , ina ua mălie. Ua galue fiafia, ina ua faagaeetia. O faiva ua fai mautinoa, ina ua atoatoa le iloa. Amuia Timoteo! Ua saa faa oti iai le utu a le tautai e pei o ia upu a le atunuu. Ua matamata i le ata o Keriso, i le ola ma le auaunaga a Paulo. O le iloa ua faasoa. O la Paulo ia Timoteo, “O mătua o upu e ola ai na e faalogologo mai ai ia te a’u, ia e taofia i le faatuatua ma le alofa ia Keriso Iesu.” (f.13) Tumau i mea uma ua aoaoina ai oe. Mea e fofoa ai se ola fou ia Keriso. 

Ia manatua, o le faatuatua o Paulo na ia iloa tino ai foliga ma uiga paia o lona Alii Faaola. Na ia olaina lea iloa, ma avea ai o se faataitaiga taua ma le ola pea i le soifua galue o Timoteo.

Samoa pele e, o ai a fai ma ata faataitai o Keriso i lau fanau? I lou aiga? Ae faapefea lou nuu, ma lau galuega poo lau pulega? E faapefea ona fai o oe ma ata o Keriso I le ekalesia ma le atunuu?

 

Amene

7737063/7783782

17 January 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?