LAUGA - “Ua ia te i tatou le Atua” - (Isaia 9: 6 – 7)

20 December 2015, 12:00AM

Tusia: Petaia Setu

O upu e fai i le itu lea o Aana: “ A iai Tanuvasa ua atoa Aana” Fai mai Tavita: “ O loo ia te a’u Ieova; ou te le fefe.” (Sal. 118:6). A o le tautinoga foi a Paulo: “Afai ua ‘au ma i tatou le Atua, o ai la e faasaga tau mai ia i tatou?” (Roma. 8:31).

O le fesili: Se ā se lelei o iā Tanuvasa? E ā Ieova i le vaai a Tavita? O iai se malosi o i le Atua o Paulo? O fesili ia tatou te toe manatunatu ai i Aso Sa e tolu ua tuanai atu o la tatou mataupu faasolo lenei.

E mafai ona faamatala maia ia i tatou, la latou faailoilo mo le aso lenei, 25 o Tesema. E maifea le malamalama o le Ola? E āfua i se ā ona Olioli i le Alii? A o ai e faapogai i lo tatou saolotoga? O lenei ua uma le masina o tatou faalogo lava ia Isaia, Isaia, Isaia! E sa’o ai le pese a se tasi Itumalo sa ave i le Fu’a a le malo o Amerika Samoa. ‘Ae le o lou guku ea lava lea ga fai mai…..?’

E le o le fofoga ea lava o Isaia lea sa ‘alagaina i le fia selau tausaga ua mavae le aso lenei? Le aso o le malamalama?

Le aso e olioli ai? Le aso o lo tatou saolotoga? Le aso, ua fanau mai ai mo i tatou le tama; le aso ua foaiina mai ai e le Atua le atalii mo i tatou; le tama e fai lona ua ma o tatou malologa. Auā o le Silisili ese, o le Faipule, o le Atua malosi, o le Tamā o le faavavau, o le Alii o le filemu.

O upu a le atunuu, ‘ua atoa tino o le tama’.

O la lea, ua ia te i tatou le Atua! Ia viia le Atua!  

Le tama lea! Le tama na valo’ia, la lea ua tatou ausia ona faamanatu ma le fiafia. Ua uma ona auiliili e perofeta lona tala’aga. O Iese le a’a. O Peteleema le faitotoa. O le fale o manu lona vaa. O le fetu e ta’iala; a o makoi na faia le faalavalava. O lona soifuaga: o le Tupu; o le Ositaulaga; e maliu. Ua vivii agelu ma ‘au o le lagi. Ua pepese foi leoleo mamoe ma faafetai.

O meaola ma mea uma o le foafoaga, ua latou molimauina le fanau mai o le tama! E oo lava i le oti ua toloi, seia mua’i molimau i le atalii ua foaiina mai mo i tatou (Luka. 2: 26). Oka! E moni lava Isaia – o le Silisili ese! O le Atua malosi! E ui ina teena e tagata, ae le suia ai le moni o le valoaga. Na le amana’ia e le lalolagi;  ae na vivii ai agelu ma ‘au o le lagi (Lk. 2:13-14).

Na taupati iai leoleo mamoe e faafeiloa’i. Auā o le aso lava lenei Samoa, na fanau ai mo i tatou le Alii o le filemῡ.

Talosia o maopoopo lou aiga i le feiloaiga ma le Faipule i lenei aso. Faafetai pe afai o e faaaloalo i le Silisili ese i lona Aso Paia. E lelei pe a ua e salamo ma iloa le tama lea – o le Atua malosi.

A o se ā se aogā o le lalolagi ia te oe, pe afai o le aso lenei ua tatala ai lou loto ma talia i lou olaga le atalii ua foaiina mai, mo oe ma lou aiga, mo a’u ma Samoa uma?

Samoa, e le faatusalia o tatou mamalu faaleaganuu,  ma faalagiga o le tama lea ua ia te i tatou. O ona taulagiga, e le o sona viiga; a o lo tatou faaolaina. A foi lea ua taulagi e Isaia le ‘olioli ma le sa’olotoga o le nuu.

O le toe faatῡina ma le faaolaina o Isaraelu. O ai na te faia? Ae faia faapefea? O āfea? E fai e le Atua malosi. O le Atua Silisili ese. O le Faipule… E auauna ona faalupega. E tautua ona faalagiga mo oe ma lou aiga. E faataule’ale’a ona mamalu faale-Atua ina ia maua tā’ua.

E i lona ua lou ola ma lo tatou sa’olotoga. Fai mai Simeona, “Faauta, ua tuu le tama nei e pa’ῡῡ ai ma toe tutῡ ai tagata e toatele o i Isaraelu….”(Lk. 2:34-35) E lē seia aulia taeao. Leai! E lē o le tausaga fou Samoa! O le aso nei (Lk. 2:11).

‘E mo ‘oe le tama, Samoa! E fai mo oe le atalii. Ua fanau mai mo oe ma lou toalua. Ua foaiina mai mo oe ma lau fanau. Viia le Alii! Ua ia te i tatou le tama.         

E le o Isaia le tagata muamua ua tautala i le gafa tau tupu o le tama lea. A ‘ua faamanatu mai e le perofeta, o le tupu lava ia o tatou uma. O le Tamā o le faavavau, o le Perenise o le filemu. I le, o lona malo, e leai sona gataaga. 

E faatumauina e le Atua, e faavavau, faavavau lava. Ua uma ona folafola e le Atua ia Tavita, “ Ou te faatumauina lou aiga ma lou malo e faavavau i o’u luma; e mausali lou nofoalii e faavavau” (2 Sam. 7:16).

E ui lava la ina olopalaina Ierusalema ma faatafunaina ona pa ma ona aai atoa, a o valoaga a le perofeta e lē tuua faapagaenoa. E faaumatia foi ma faatafea le nuu; ae tupu a’e lava le moemoe. O iai lava nai toe o Sagone (ramnant). O tini ia o folafolaga. O i’u o valoaga. O le gafa e āu. E faaāuāu. E faavavau.

Samoa, amuia oe!  Amuia tatou ua tatou ola mai i lenei Kirisimasi e faamanatu ma molimau atu le faaāuāuina o le gafa! Ua tautalatala ai o tatou augā tupulaga. O leo o fiafiaga. Auā ua fanau mai mo i tatou le tama; o le gafa o  le faaolataga.

Aleluia! O ā mai lau faatali? O seki a lau Kerisimasi? Se i o’u fesili atu lava – Aiseā e te faamanatu ai le Kirisimasi? Ailoga e iai se aiga e tausaga atoa o tu le laau Kirisimasi i le fale? E mautinoa lava e toe teu lelei le laau ma ona teuga seia aulia foi Tesema o le isi tausaga.

O le mālō o le tama lea, e le faatῡina i lou fale, e le faatῡina i lau laau Kerisimasi; e le faatῡina faavaitaimi foi. O lona mālō na afua ai ona tatou faamanatu lona afio mai, o le mālō e faatῡ i lou loto i aso uma o lou ola.

O le mālō e fia faamausalīina i lou olaga i aso fai soo. Ia le teua faatasi ma lau laau Kirisimasi; ia le taimi faatasi ma lau faamanatu, a ia avea o se laau Kirisimasi e tumau i aso uma ma susulu pea i lou olaga atoa.

O le malo o le filemu. O le malo alofa. O le malo e faavavau. O le ute lea o le Kirisimasi. Ia lē na ona faamanatu, a ‘ia fatu. Fatu i lou olaga le malo tumau o le Kirisimasi. Ona e maua lea o le malamalama moni o le ola; le olioli tumau, ma le sa’o lotoga e faavavau.

O lanu na o le Kirisimasi;  o le filemu foi lena o le faatali. Samoa e, o le loto faamagalo, o le loto maulalo, o le loto faaaloalo, ma le loto ua sa’o, o le vaitaele lenā o le tama ua fanau mai mo i tatou. O sāsā?                                                             

Fai e oe sāsā o le pepe! 

O le mea sili, ua ia te i tatou le Atua – O le Atua malosi.

 Amene.

(7737063), 

E-mail: [email protected]

Alofaaga pele o lenei Kirisimasi mo Savea & Muliaga J. Malifa;  faapea le pulega atoa a le Samoa Observer. Ia faa’oaina outou uma e le tama na fanau mai e fai ma “UPU”.

Ia manuia lava le Kirisimasi Samoa.     

 Soifua

20 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>