Sei o ta talanoa

20 December 2015

Tatou te faafetai pea le alofa ma le agalelei o le Atua ua tatou aulia mai ai ma le manuia lenei laasaga o le  tatou savaliga umi o lenei tausaga i lona masina faai’u!

E ui foi ina tatou feagai pea ma mala ma puapuga i le faagasologa umi o lenei tausaga-e ala i mala ma faalavelave tutupu faafuase’i-aemaise ai o le maliu ma oti ua motusia ai mafutaga pele ma matua, uso ma tuafafine-aemaise ai o le fanau iti-ae ona o i tatou o tagata ua faa-Kerisianoina-o lea tatou te talitonu ai e aunoa ma se maslo-o le tele o puapuaga ma mea faigata tatou te feagai ai-o le sili atu lea ona tele lona alofa ma lona faamaoni- e faamafanafanaina ai i tatou!

Ia-ia i le Atua poto e to’atasi le viiga ma le faaneetaga-e faavavau, faavavau lava! Ia malo lava le soifua ma le lagi e mamā Samoa!

Ae alo maia-o le tatou Talanoaga masani foi lenei ma le ‘aufaitai o lenei nusipepa-aemaise ai o le atunuu lautele-o loo fiafia pea e faitau i lenei tusitusiga!

Ae peitai- e ao lava ona mua’i faailoa atu-o lenei Tusitusiga-e le o se tala fai fua-e le o se tau faaleaga-e le o se faaoloataua foi –ae o le fia faaaogaina lea o le aia tatau e faailoa atu ai mea o loo tutupu i totonu o lo tatou atunuu-faatasi ai ma le pogai aemaise ai-o i latou ua pogai ai!

O le ulutala la o lenei Talanoaga-e i ai le manatu o loo malamalma lelei i ai le ‘aufaitau o lenei nusipepa! Ae afai lava e moomia se isi faamalamalamaga-ona faapea lea-o le ulutala e faasino i faafitauli poo faigata e feagai ma manu felelei-pe a malosi le matagi!

O a ia faigata? Muamua o le faigata ona lele faasaga i le matagi! O lona lua- afai e malosi le matagi-e tua manulele i faigata ma faafitauli! O a ia faigata ma faafitauli? O faigata-e iu ina mate ma leiloa i le vasa.

O lona lua-afai e mate ma leiloa i le vasa-a faapefea lo latou aiga-aemaise ai o le fanau o loo faatali mai le ofaga? Ina ia mafai la e le manulele ona sao mai lea matagi-e le tatau ona finau i le malosi o le savili-ae ia saili se ala e sao ai!

O le a la le ala e sao ai? O le lele lea faa-taavili poo le lolo i le malosi o le matagi!  A faatusatusa la lea tulaga ma le tulaga o loo i ai nei le atunuu-ona faapea lea-e ui lava ina lele le manulele ma vilivili-ae mautinoa lava e taunuu i lona faamoemoega! Aisea? E na o le savili lava le faafitauli! O le a lona faamoemoega?

O le taunuu lea ise itulagi-e le o i ai ni matagi fitā ma le malolosi! I le taimi la lenei ma le tulaga o loo i ai Samoa-ua le iloa e tagata poo fea le itulagi a felelei i ai! A tuu ane i le mativa ua i ai nei le atunuu- e felelei atu i le isi itu-ae feto’ai ma le maualuga o le Tau o le Soifuaga!

ADVERTISEMENT

A felelei atu i le isi itulagi ae feto’ai ma le maoa’e o lafoga o tupe maua-a felelei atu i le isi itulagi-e na ona tipi o tupe a tagata  o taui mo faalavelave faafuase’i –ae leai se mea e toe maua mai-tusa lava pe aafia i se faalavelave faafuasei pe leai! A felele atu i le Eletise-e totogi e latou suauu ia e aumai e vili ai le paoa-ae totogi lava pili o latou moli!

E le gata i lea-o loo totogi foi e tagata le aitalafu a le Faalapotopotoga o le Malosi Faa-Eletise! Ae le ona pau ai lena. A tuu ane i faiga pi’opi’o  a le Malo-e faitau miliona ma miliona tupe a le atunuu ua maumau ai!

Ae o le itu ua sili ona vilivili ai le atunuu faa-manu o savili- o le fai o faiga pi’opi’o-faamaonia e le Pule ma Su’etusi Sili a le Malo ma le Komiti a Alii Ofisa o le Palemene-ae musu le faiga-malo e ave lea mataupu i le Faamasinoga e fai i ai le amiotonu ma le faamasinoga!

Afai la o le ua savali le 40 tausaga talu ona faafoe e le HRPP le atunuu-o le leva foi lena ona vilivili faa-manu o savili le atunuu talu ai nei faiga leaga ma le mataga! O le fesili la- o ai la na te totogiina lenei anoano o tupe ua maumau? O ni tupe a le HRPP poo ni tupe a le atunuu? Aisea ua fai ai faatautala faapea le atunuu?

A faapefea la ona taofi le gaoi ma le faimea pi’opi’o o tagata pe afai e tausolomua le Malo? A toe tuu atu i ai ma le aitalafu i fafo lea ua silia le $1.1 piliona-o ai e totogiina? E i ai la se manu o vilivili i le matagi o faiga pi’opi’o e mafai ona faasaoina? O le tali –e na ona faateteleina ai! Afai la ua vilivili faa-manu o savili le atunuu ona o nei faiga leaga ma le faatautala-e faapefea la ona fai mai e leai se mativa i totonu o Samoa?

E mafua ‘ea ona teena ona o le fiapoto pe ona o le faatautala ma le le popoi? Silasila i le vilivili faa-manu o savili o le atunuu-ua o’o i ‘alu’alu toto e na o le tolu tausaga-ua alu e faatau atu oloa i luga o ala tetele? Faamata o iloa e nei tagata o Samoa o le atunuu e mamala?

Afai latou te iloa- o le fesili la-o le a le pogai e saga fai ai? E mafai ona latou faafoeina se atunuu pe  ana le tofia i latou e le atunuu? Afai la na tofi e le atunuu-aisea ua le kea ai i le manuia o le atunuu –ae fai na o latou manuia? O le pogai lea na latou fia faafoeina ai le Malo o Samoa?

Afai o loo faasili mea latou te loto i ai-ae faamulimuli le atunuu-o le faamanatu la e faapea-“Fai mai le upu a le atunuu-“E sola le fai ae tuu lona foto”-o lona uiga- e mavae atu latou-ae o a latou mea leaga na fai-o le a feagai ma latou fanau ma le atunuu! Aisea?

O lea ua $1.1 piliona le aitalafu i fafo-ae le ona pau ai lea! O lona uiga la-o tatou nei-ma ni tupulaga e 3.4.poo le 5- e totogiina uma lenei anoano na fai e le faiga-malo a le HRPP. A faapefea la ona le vilivili faa-manu o savili le atunuu?

A tuufaatasi nei mea uma ma le mativa ua i ai nei le atunuu-o le a le pogai? O le tali- o le faatautala ma faiga pi’opi’o! O le toe manatu la- ailoga e manuia Samoa i nei mea e igoa o faigamalo a pati? Afai sa teena e matua na faia le Faavae o Samoa-o le a le pogai?

E le o ni vale (tulou) matua na fai le Faavae o le Malo Tuto’atasi o Samoa-na latou silafia lelei- e le o se faigamalo lea e manuia ai Samoa! Aisea? Leaga foi o Samoa e le pulea e se Vaega ae pulea e le atunuu atoa! O le pogai lena na sologa manuia ai le Malo o Samoa mai le amataga.

Leai ni faiga pi’opi’o-leai ni taupulepulega leaga a tagata faigaluega o le Malo-leai ni faipule o le Maota na fai  ni a latou pisinisi! Ae o le itu sa sili ona lelei- O Sui Usufono uma o le Palemene- sa filifili mai lava e itumalo taitasi o le atunuu! Silasila foi- na muamua Tuto’atasi Samoa ae faatoa fai le Tulafono o Faiga-Palota i le 1963!

Ia o lea ua tatou alo atu  i le Palota Lautele i le Tausaga Fou! O le fesili-“E te toe fia vilivili foi Samoa faa-manu o Savaili mo le isi 5 tausaga pe leai? Ia manuia tele le Aso Sa Samoa!.

20 December 2015

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?