Lauga - “…e maua lava outou e ā outou agasala”

RP
By Rev. Petaia Setu, 20 January 2019

O le fili lava o le kama o le maua! Ioe poo  fea lava tatou te taamilo solo ai, e maua lava. O a lava foi ituaiga ata ma fuafuaga alualu mamao tatou te fafau faalilolilo, e maua lava. O le olaga lenā o loo taufaavalea ai le poto i le vaivai. O loo sauāina ai e le maumea le lē tagolima. O le saoasaoa lenā o le olaga faapolokiki. O le fuaitau faa efiti [ethics] means, justify the end. O auala e faamălie / faataunuu ai le mana’o. Ua tuinanau le fanauga a Reupena ma le fanauga a Kato i le telē o le fanua laugatasi ma lafulemu i tala mai o le Ioritana (itu i sasa’e). O le matape’ape’a  i eleele ua manatu ai e faaaoga, ua le gata o lafu povi, mamoe, oti ma kamela, a o fafine foi ma  tamaiti, e taofi ai le eleele.

O Isaraelu lea ua a’ea le itu i sasa’e o Ioritana. Ua tupu tele le manao; ma ua faatauvaa ai le finagalo o le Atua sa osi feagaiga ai ma Aperaamo, Isaako, ma Iakopo.  Ua faavaivai loto i le au uso; ma ua tauanau e le tuinanau ina ia le o i le taunuuga o le uluai laasaga o le folafolaga (f.5,6). O le pogai lea o le toasā o le Atua i o latou tamā, ona o lo latou taumafai e mimilo le finagalo o le Atua (Num.13:28-33). I le, ua maua lava e ā latou agasala. Auā ua saga faafiufiu ai lava e le Atua ma faaumiumi ona taamilo i le vao seia oti uma o lea augātupulaga (f.13). Ua faapea le uiga o lo tatou ola i o tatou augātupulaga. Ua fia ni mea leaga ma le matagā tatou te toso sesē iai le finagalo o le Atua ua faavae ai Samoa? A mana’o lava le toatasi e faamalolosi ana mea i le ola ma le malosi o le toatele, e oso lava! E le taitai popole po o ai e oti ai ae toafia e afaina ai! A finagalo lava foi i latou ua iai le paoa faale tagata e taitai le atunuu i o latou manaoga ma pulega e le tatau ai ma le Faavae Soifua o Samoa, e le poi lava. Faalogo i le upu a Mose, “ia outou iloa, e maua lava outou e ā outou agasala.

O le alā oia lea o le foafoaga. Ua mamafa tele le avega a le uluai tagata. Fa’i  o le tuinanau o mata, o le tuinanau o le manava, a o le tuinanau o le loto. Ioe, ua faafafāina i mea uma o lona siomaga. Ua fia pule aoao i le foafoaga. Ua faufau i paia ma mamalu o le Atua o le foafoaga (Ken.3:1-6; Mat.4:1-10)

Ai ua manatu le fanauga a Reupena o ia e mātua o le tau usoga! Pe ona o ia o le toe ulutaia o le saofaiga a? Ia faatea muamua sana ia vaega! Ae faapefea le nuu o loo pupula mai? Ioe, o le nafa tauave lea o le alii o aiga i le faa Samoa ma le faa Eperu – tausia o measina ma le oloa a aiga. Peitai, ua uma ona fofola e le Atua aiaiga uma ma faasinomaga mo lona nuu. Afai e sesē ese ai le nuu, e tuliloa e le agasala.

O le agasala, o lo tatou o ese lea ma le Atua sa fai feagaiga ma o tatou tua’ā ua lagomau mai tiasā. O lo tatou fulitua lea i le Atua ma ua le usitai i ana poloaiga ma ana tulafono. O lo tatou le savavali lea i ona ala paia uma lava. O le agasala mātuia, o lo tatou fia pule lea i mea e patino i le Atua, e pule ai le Atua. A o le a’a o le agasala, o le tuinanau; o le matape’ape’a; o le mana’o.  O ’i’’ foi, o loo fātia ai le folauga a le atunuu, ae o loo taavilivili solo ai le sa o le ekalesia, ua leai sona kāpili.

ADVERTISEMENT

Samoa, ’a to le tuinanau, ua fanau mai ai le agasala. Ae a maua outou e ā outou agasala, ona oso tu lea i lugā, ua fitivale solo, ua le mau taga, ua mativa i upu, ua oge maa e ati ai se olo. E le mafai ona tatou alofia foliga amioleaga o Satani. O  ona foliga nā. ‘Aua tatou te o ese loa ma le Atua, foliga loa tatou i le alii o lenei lalolagi.  Ua leaga mea uma tatou te faia, auā ua tatou ola faafoliga, ma ua tatou faatupu le toasā o le Atua, ina ua tatou taofi le upu moni ma le amio pepelo (Rom.1:18)

O le fesili, O ai se toa na te mafaia ona toe faafoi Samoa i se Samoa mamā, ma le tausaafia sa mafuta ai ma le Atua i taimi o auga tama ua mavae? Se toa e mata’u i le Atua ma faalogo i se finagalo fautua mai le atunuu? E le i fai upu le Atua ma Reupena poo Kato. O Mose sa feagai ma le Atua. O le taitai sa fesili i le Atua i mea uma. Sa onosai  i muimuiga ma le sa’i soo o le nuu. E mata’u ma alofa  i le Atua. Sa ola ai le silia ma le 3 miliona tagata o le Esoto. E leai sona tikeri; a o lana tōfā alofa sa malu ai le nuu ma saoloto ai Isaraelu uma i le vao. E le i tietie i se taavale taugatā,  ae na savali mai Aikupito taamilomilo i le peninsula o Sinai seia oo i le itu i sasa’e o Ioritana e feagai ma Ieriko. E fia maila? E le i nofo i se fale tioata ae na milo faatasi ma ona tagata. E maua e Samoa se Mose faapea? A o le maua foi e pulega a le atunuu ae se i tali mai le ekalesia?

Ua le utuva le mau faalavelave mātuia ua pesi faama’i i le atunuu! O le fasioti tagata, talepe fale, gaoi, mataifale, onagā ma faalavelave tau taavale, aisi ma le mau vale, oka! Na o le falesa ea e feiiloai ai i tagata? Na o le pulelaa e ta’u atu ai se faaolataga? E le fevailia’i ma tatalo faatasi mo ni metotia faaleagaga e faaolaina ai tagata, ae fono lava o tupe ma se fuainumera e tatau ona tuli e le faiga taulaga? Le au uso e, le fale tatalo la i luga o le mauga, e maua ai mafutaga mafana ma le Agaga. Ua e faatasina solo i le ala, ina ua e manatu e faamălie lau taga, a ua e le vaai alofa i le ola o tagata. Maumau e, le atunuu pele! Ua sa’o lava nai toeaiina ua mavae atu, ‘Talofa e, i le ekalesia pe ’a uma atu matou! O la le poto,  e afua mai mauga manuia o le nuu. Ae le mafai ona faaolaina se aulotu poo se nuu pe afai o lo o malemo le faigaluega i le agasala. E le mafai foi ona laveaiina le aufaigaluega pe afai o la foi e fe’ausi taitai ia i tafega a le lalolagi. O fea nei la a su’e iai se Mose? Se Mose na te faamamulu ese atu pisinisi ma atiinae o loo lavelavea solo ai le ekalesia a Keriso. Se taitai e mafai ona oo i le au mātutua ma le au mama’i; se i asia nai aiga matitiva ma le au le tagolima.

Le ekalesia e, ua manaomia ona toe fuataiina le ola faale agaga o le au molimau. Ua manaomia lava. Ua fia maua e tagata uma le malamalama moni. Ua fia saoloto le lafu mamoe a Keriso o loo faapulou pea e le vao filifili. Alu ese mai ou tuinanau. Vavae ese mai le matape’ape’a. Sola ese mai ia Satani. E lē faaolaina oe i ni au togafiti po o sau polokiki. E le faasaoina foi Oe i ni galuega o le tulafono, a o le talitonu ma faatuatua, e ala i le faamaoni ma le alofa atu i le Atua. Ia tatou faalogo ma usitai i Le e ana le feau ma le galuega ae le o lo tatou taumafai e toso mai le Tusi Paia i o tatou manaoga ma a tatou pulega. E a le Atua le galuega faatasi ma tatou, e pule foi o Ia i le galuega faatasi ma tatou. O le agasala – o lou manao lasi, o lou fia pule, o lou fia Atua. “E agasala ai outou ia Ieova; ia outou iloa foi, e maua lava outou e ā outou agasala.”

 

                                    Amene

 

7737063/7783782

RP
By Rev. Petaia Setu, 20 January 2019

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?