O la’u tala fo’i

19 December 2015

1. Matauina i Tala Fou le faasalaina o se tasi alii talu ai faiga pi’opi’o tau faiga-palota. O lea solitulafono e faasino i se fanua ua nofo ma saini e nonofo ai nisi tagata e aunoa ma le iloa e le tagata moni e ou lea fanua.

Afai la tatou te tilotilo i lenei mataupu-e vave lava ona oso mai i le manatu pe faamata ona pau lenei o le faiga pi’opi’o tau faiga-palota ua aliali mai ae pe faamata o i ai foi nisi faiga pi’opi’o faapenei o fai- ae le o aliali mai i luga! Ia o lea faatoa fai le Palota i le tausaga fou-ae o lea ua leva ona fai fuafuaga a tagata pi’opi’o mo le faiga-palota o loma nei.

A fua la i taimi ua alu-sa leai lava ni mea faapenei na tutupu mai-leaga foi sa filifili mai lava e le Itumalo ia lona sui faatu mo le Palota-ma o le mea foi lea sa seāseā lava ona tulai mai ai ni faiga faapenei! Afai la ua matua sasao faa-afi nei mea o faiga pi’opi’o-ai e mafua ai?

O le tali e faitau miliona ma miliona tupe a le atunuu ua liu suavai talu ai faiga pi’opi’o a le HRPP-ae leai se mea o faia i ai! E tiga lava ona faamaonia e le Pule ma Su’etusi Sili a le Malo-ma saga faamaonia atili e le Komiti Filifilia a Alii Ofisa o le Palemene ia faiga pi’opi’o-ae o lea lava e leai se mea e tasi o faia e le Malo i lea tulaga! A faapefea la ona le pi’opi’o tagata o le atunuu?

O ai e popole i ai pe na o Ta’ita’i o le Malo e le o mafai ona molia i le Tulafono! Ia o lea foi ua o’o mai le Kirisimasi-ma o lea foi o le a fai mai lea tala ma lea tala-ae a tuu i le olaga o loo ola ai- e matua eseese mamao lava! A faapefea la ona le pi’opi’o tagata o le atunuu pe afai e tausolomua i taitai o le faiga-malo le pi’opi’o! Aisea la e faasala ai tagata o le atunuu pe a pi’opi’o pe na o taitai o le atunuu e leai se mea o faia i ai! O le a sou taofi? 

2. Matauina foi i Tala Fou fai mai ua faatonuina le Bluesky ma le Iuni Lakapi a Samoa –ia faatoese! O lea foi ua fai mai o le a lomia faasalalau e le Bluesky ma Iuni Lakapi a Samoa lea faatoesega i le gagana Samoa ma le gagana Faa-Peretania.

O faatonuga lea a le Pule o Fesootaiga Televavave, Ua tuuina mai lea faatonuga ina ua mae’a suesuega a le Pule o Fesootaiga Televavave e tusa ai ma se tagi na faaulu e le Digicel e tusa ai ma se faalavelave na tupu  i le Apia Park-i le faagasologa o le malaga asiasi mai a le Olopeleki i Samoa. Ia poo le a lava lea faalavelave na tupu e pogai ai lea faatoesega-sa faapea lava o se eseesega a ia kamupani fai telefoni e lua- ae o lea foi ua aafia ai ma le Iuni Lakapi a Samoa.

ADVERTISEMENT

Aisea la ua aafia ai fua le Iuni Lakapi a Samoa? O le faatonuga a le Iuni Lakapi a Samoa na mafua ai? Afai e leai-e manaia pea a taatia pea lea mataupu i ia kamupani e lua-ae afai e aafia ai ma le Iuni Lakapi-o lona uiga-e luelue foi o se tonu a le Iuni Lakapi na mafua ai! O le a la sou taofi?

3. Matauina foi i Tala Fou finauga a Loia talu ai le mataupu i se faife’au ma se mea na tupu i se tamaitai- e tusa ai ma le mataupu lea ua leva ona faagasolo i luma o le Faamasinoga. O lea la tamaitai na afaina i lea faalavelave lea fai mai le Loia sa tatau ona puipuia e le Toomaga mo e Puapuagatia-aemaise ai o lea tamaitai -na aafia i ni feusuaiga mataga.

O se mataupu uiga ese lenei mataupu e pei ona fofogaina i luma o le Faamasinoga, ona o le tele o taumafaiga na fai e taofia ai le tagi a lenei tamaitai! Ae tiga lava le malosi o ia taumafaiga- ae o lea lava ua manumalo lea tamaitai-ona o lea ua taunuu i luma o le faamasinoga lana mataupu-ma ua aliali ai taumafaiga leaga uma ina ia ‘aua lava nei o’o lea mataupu i luma o le Faamasinoga.

O lenei la mataupu e aafia ai se Faifea’u o loo galue i se ekalesia i se nuu o Savaii. O loo faaauau pea lenei mataupu i luma o le Faamasinoga ma o le Alii Faamasino o Vaepule Vaai o loo faafoeina lea mataupu!O le a la sou taofi i lenei mataupu?

4. Matauina pea le anoano o sauniga faamanatu i lenei vaitau aemaise ai lava o faauuga a A’oga ma isi lava faalapotopotoga. Afai la tatou te fesili pe aisea ua fiafia ai tamaiti a’oga, matua ma aiga, o le tali-‘ua taunuu manuia le taumafai o fanau-ae le tagata-o le Vaitau fiafia lenei o tausaga uma talu ai le faamanatuina o le soifua mai o Iesu lo tatou Faaola!

Afai la e i ai nisi e le o fiafia- ia atonu e mafua ona ua le taulau le faamoemoe o le fanau-poo le vaai atu foi i le fiafia o isi aiga ae le o faapena lona aiga talu ai le mativa ma le le tagolima!

E mafua foi ona faanoanoa nisi ona o fanau pele, uso ma tuafafine aemaise ai o matua ua le mafai ona faatasi ma i latou i lenei taimi o le tausaga! E leai se faitio pe afai o e faanoanoa-vagana ai le tuu-a-lalo-ia tatou loto tetele! E le o taumate o loo fiafia i latou i le ola e faavavau-ae mo tatou nei-ia tatou tatalo ia tatou maua uma se Kirisimasi fiafia ma se Tausaga Fou manuia! O le a sou taofi? 

5. E le o toe umi ona tatou aulia lea o le Kirisimasi! O le tatalo-ia tatou aulia manuia lea aso. Ae mo oe-o le a sau fuafuaga ua fai mo le Kirisimasi. O i ai se faamoemoe tou te tafafao i se isi vaega o le atunuu pe leai?

O i ai ni pati ua e faamoemoe e te auai? Faapefea ni faafiafiaga? Faapefea ni taaloga ma ni tafaoga i ni matafaga i Upolu nei poo Savaii? O ai nisi tou te o? Afai la o oe e gafa ma le aveina o le taavale-o lona uiga- o ola uma o la outou aumalaga o loo i ou aao! A taumafa ni ‘ava- tuu e inu la outou ‘au-malaga- ae onosa’i oe se’i faaolatia  i fanua-ona inu lea o sau fagu! Afai foi e te alu i se pati- e saogalemu lava le alu i le taxi –toe foi mai le taxi! O aso fiafia faapenei- e moomia ai lo tatou faautauta lelei!

O le a i ai avetaale e feoa’i onanā i luga o le alatele! Ia manatu foi le upu-“E iloa lava si pala’ai o ola umi” Soo se mea e te alu i ai- ia ‘aua nei galo lou aiga o loo faatali atu. Afai foi ua fai sou aiga ma sau fanau- e tatau lava ona faamuamua i latou ae faamulimuli le mea e te loto i ai! Aisea? O aso nei o le fiafia ae o ni aso faanoanoa! Ae ia sili ai ona e manatua- ‘E tasi lava si ola- e le toe maua se isi ola i se faleoloa! O le a sou taofi?

19 December 2015

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?