“O Keriso o le faamoemoe i le manuia”

By Petaia Setu 02 October 2016, 12:00AM

O gafea  o ou autafa faaletagata soifua o taoto ai faamanuiaga? A o mafai e lou siomaga ona utufia lou galala? O le filosofia faa Eperu, e afua mai mauga manuia o nuu. A o le tofa faatumutumu mauga, “ua ou iloa manatu ua ou manatu ai ia te outou; o manatu o le manuia, ae le o le malaia; e foaiina atu ia te outou le iuga e iai le faamoemoe” (Iere.29:11).

La lea ua auiliili e le aposetolo i lana tusi nei i le ekalesia i Kolose, o Keriso, O MEA UMA I MEA UMA. O le faamoemoe ola lea. O Keriso o le faamoemoe i le manuia.O tusi ia e lua o Efeso ma Kolose sa tusia e Paulo i le taimi o faafalepuipuiina i Roma.

E foliga tutusa tusi nei ae eseese a la faamamafa. E faataua i le Efeso le au faatuatua poo le ekalesia, “o le tino lea o Keriso.” Ae faamamafa e le Kolose le “Ulu” o le tino, o Iesu Keriso lea. E taua uma ma manaomia. Auā e le mafai ona iai o le tino e aunoa ma le ulu, poo le ulu foi ae le iai le tino. E mafai ona e maitauina lelei le mea nei pe a faitau atoa i le Tusi nei o Kolose, “Keriso,” “Keriso” “Keriso.”O Keriso, o le faamoemoe lea o le Atua mo le tagata agasala ina ia faaolaina.

O le Tofa lea a le Atua mo lou saolotoga. Tatou te le maua lava i o tatou autafa faale soifuaga nei ni  lelei e laveaiina ai i tatou ma lima taitaiina ai a tatou fanau i manuia o le Atua; na o Keriso (Ioane.14:6). O mea uma e a le Atua. O lelei uma e mai  le Atua. Ae a le maua Keriso, e te le maua se olaga faamălieina.Ua sao mai totonu o le ekalesia i Kolose manatu leaga ma aoaoga sesē, ua taitaiina sesē ai le talutalu fou o le ekalesia.

E fā’i o le poto fou e pei ona a’e faataifana’e i nei ona aso, a o le matamataita o Iutaia i ana aga masani ma faiga faavae o ana tapuaiga faa Iutaia. Ua taumafai ai e tulei ese le Keriso mai lona tulaga ma lona nofoa, o le Taitai, o le Ulu o le tino; o le Ao o le Ekalesia. E pei lava foi o a tatou faiga ma aga faa Samoa i totonu o aiga, nuu, faalapotopotoga eseese, ekalesia ma le malo. E iai a vaega o loo taumafai e faasese isi tagata ona o vaivaiga masagi o le olaga.

Ua manatu la Paulo e faailoa manino le tulaga Atua o Iesu, ma lona Aoao I mea uma lava. Aua o le faaletonu o le ekalesia, ua le tumau I le Alii, ua tu faaafaafa tagata. Ua le mauaa le faatuatua I le Alii. Ua lilo ia te I latou, o le Keriso lea, ua le gata o le ‘Ulu’ o le eklesia, a o le Faatumutumuga ia o mea uma lava. O manuia ia sa valoia. Fai mai Ieremia, e foaiina ia te outou le iuga o le faamoemoe. Ua tautala le perofeta I manuia.

A o le faamoemoe, o le mo le tagata talitonu ma faatuatua. Peitai, ua le mafai ona iloa lelei I le loto o le tagata, le Keriso ua faa Ao iai le ekalesia. O Keriso sa iai lava I le amataga a o le I iai se mea. O le silisili ese lena o Keriso I mea uma, e matua I mea uma, aua e ulumatua I mea uma ua faia (f16). Fai mai se tasi toeaina, o le tele tausaga o lou olaga, o le tele foi lena o mea e te iloa. Se a la se mea ua lilo I le Alii? Ae faapefea ona e faa tulaga le matua o Keriso I lou olaga?

Poo e iloa o le talalelei lea sa lilo, o faamanuiaga ia Keriso?Samoa e, e manaomia Keriso I lou olaga. O le iai o Keriso I totonu ia te oe, o le atoatoa foi lena o lou fiafia. Fai mai Paulo, ua le o toe ola a’u, a o Keriso ua ola totonu ia te a’u. O le olaga lea o le kerisiano. Le olaga ua malamalama I le uluai o mea uma. Ua talitonu  I le Keriso o le foafoaga. Ua iloa le itu Atua o Keriso. O le Mataisau o mea uma. O le ua tatou maua ai le togiolaina I lona toto ma soifua pea lava ia i totonu ia i tatou.

O le Keriso lea o loo tautala ai Paulo. E maualuga lona nofoalii, e tafe mai ai faamanuiaga o le tino. Na te foeuliina le tino, o le ekalesia lea. E manino ai mea uma. E maopoopo ai itu tino taitasi  uma. E fealofani ai le aiga o le Atua. E taula iai le faatuatuaga o le ekalesia. O manogi ia o le talalelei. A o nanamu o le upu lilo sa natia, auā ua silisili ia ona lelei, o Iesu Keriso lea. O le faamoemoe ua saunia. O iai le ola ma le manuia. Se a se malosi o i agelu?

A o le a se lumanai o i le faamamaluina o tu ma aga faa tapuaiga faa Iutaia? A o fea o iai lau faamamafa, o le Keriso poo oe? Ua fia ni ekalesia o fetaua’i ma fevaevea’i ona ua fia ulu le siusiu? Ua fia ni galuega poo ni aiga ua malepelepe ina ua faumalo le tino? Le atunuu e, o fea tonu o loo taoto ai le faamoemoe o le Atua mo oe? O loo tulituliloa e fesili uma nei le faapogai ma le autu o lelei ma faamanuiaga. Mai fea manuia o loo aoaoina ai le ekalesia i Kolose?

O le talalelei. O Iesu Keriso lea. O le ulu lea, ua manatu Paulo e tatau ona maulalō ona tuu iai o aa o lou faatuatua. Faavae ai ma ia mausali, ma le lē faateaeseina o outou i le faamoemoe o i le talalelei. Samoa, poo ai o fai ma Keriso i lou aiga? Ae fia ni ulu o loo fefaloa’i ai le tino? Ia manatua Samoa, o le faamoemoe i le manuia, o loo i le ulu o le ekalesia. O ia lava lea o loo talaiina atu, ma apoapoa’i atu i tagata uma, ma aoao atu ai i tagata uma, i le poto uma lava. Le poto e manino ai i le atoatoa o Keriso.

Ioe, o Ia o Mea Uma o Mea Uma. O faamanuiaga ia i mea uma. Auā ua matala ia Sega le Faapolopolo a le Atua mo tagata uma, o Iutaia atoa foi ma nuu ese. Le ekalesia e, e utuvai ia te oe le atunuu ma ona tagata. O le a lau e ta’u atu? O ai e te molimauina? A o fea e tu ai oe? E te tumutumu mauga pe e te auvae mauga? O ai o fai ma ou malosiaga? O ai o save’uina lou tagata i totonu? E le lua ni ulu. E le o oe foi o se ulu, aea?

A sa’o ona tatou tuu Keriso i lona tulaga tonu, ona olioli lea o aiga. Ona fealofani lea o nuu. Ona saga tonu lea o pulega uma. Ona faaeaina lea o le ekalesia i lana mau. Ae mafai la faapefea ia mea ona fai? Fai mai Paulo, pe afai tou te tutumau i le faatuatua o faavaeina ma mausali. Ia mauaa outou ma ia atiina a’e ia te ia, ma ia faatumauina i le faatuatua. O le faamanatu Samoa, o Keriso o loo ia te outou, o le faamoemoe i le manuia.

Amene.

 

E-mail: [email protected]

7737063/7783782

By Petaia Setu 02 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>