Lauga - “O le amio lelei e fiafia; a o le amio leaga e faataugāina e le agasala.”

By Rev. Petaia Setu 17 February 2019, 12:00AM

O le fili a o le kama o le maua. A o upu a le Tusi Paia, e mulimuli atu foi au galuega ia te oe. Ioe, a ’e amio lelei, e te maua faamanuiaga; a ’e amio leaga, e maua lava oe e au agasala (Num. 32:23). Ua maua Kaino!

Ua maua le mana’o i mea a lē lua te tuaoi! Ua maua le gaoi! Ua maua le pepelo! Ua maua le fasioti tagata! O le olaga lea o le tagata ua le ia te ia le amio lelei. Ua le foliga lava i le Atua. Auā o le alofa, o le faamaoni, ma le amiotonu, o elemeni kuku’a ia o le amio e lelei. A o le amio lelei, o foliga paia na o le Atua na faia ai le tagata. Afai la e misi oe ma kama ia, o oe moni a la le isi pagota a le agasala. O Kaino, na fanau mai i le agasala (Ken. 3:6); a o Apelu, na fanau mai o ia i la le agaga (Ioane. 3:6). O le faamamafa a le lesoni nei, o le ita ma le faa’ū’ū o le tagata amio leaga. Ua ita ina ua maua, e gaoi lana tautua. Ua fetalai le Atua ia Kaino, Se a le mea ua e ita ai? Se a foi ua faa’ū’ū ai ou mata? O foliga masani ia o le fai mea leaga. Ua faa’ū’ū foi ona ua mafaufau leaga i se isi mea e sili atu ona leaga.

Ua iloa e Kaino ua maua ana polokiki pepelo, ma ua le lilo lana amio leaga. Ua ia le maua se faamanuiaga, a o le faasala. E te iloa e tuliloaina le tagata amio leaga? ’O ’e iloa fai mai le fai Salamo, Ieova e, ua e silafia lo’u nofo i lalo ma lo’u tulai i luga; ua e silafia mamao mai o’u manatunatu. Ou te sola ifea ai ou luma? (Sala. 139:1-10). Uso, o iai le Atua i mea uma. O au mea e fai i le pouliuli e pei o le nuu tinitini o le la i le Atua (Sala. 139:11-12). Fai i au kama makukua ua maua oe! Fai i lou toalua e leai se amio leaga e sao i luma o le Atua. Fai i le tou aiga e le mafai e se fia miliona ona faaola oe! E le mafai ona moe Kaino i le ao ma le po. Ua o se leo tagitagi i minute uma o lona ola le fesili a le Atua, O fea o iai Apelu lou uso? O le uso! Vaai Samoa i le silafaga a le Atua, Se a le mea ua e faia? (f.10) O loo alaga mai ia te a’u mai le eleele le toto o lou uso. Fai mai le Atua, o loo tagi mai le eleele e faailoa mai lau amio leaga. Manatua le upu a Iesu i le au faresaio ma le au tusiupu, A le tautatala tagata ia, e alalaga mai maa! Ia, o ai Kaino e tau faaufiufi ai lana solitulafono i luma o le Atua? A o ai lou mosi o le a gūgū ai le foafoaga i lau agasala?

E le i silasila le Atua i le taulaga poo le mā’au ua faailoa se vaega itiiti ae gaoi i mea tetele. Ae fiafia le Atua i le tautua ua faia faatasi ma le loto e faamaoni; e sa’o; e mata’u i le Atua. Tele pe itiiti ona faia i le loto e faamaoni, e tupu lava le fiafia. E lagona i le loto le olioli mai le Alii. Auā foi ua fai mea lelei mai le loto ua lelei. E tautala ai foi ma molimau i le lelei, ina ia iloa le mamalu ma foliga paia o le Atua lelei i lau amio lelei. Ae faapefea oe ma lou olaga? Poo tumau oe i foliga matagofie o le Atua? Poo faagaoi ona e faanunumia tupe o polokeki (project) ma galuega o ’e tautua ai? Sau i luma i le malamalama. Te iloa fai mai Iesu, “O ē fai mea leaga e inoino i le malamalama; e lē o mai i le malamalama ne i iloa a latou amio.” (Ioane. 3:20) Ae manatua foi e leai se mea lilo e tumau ai pea ona le iloa, e faaalia mea lilo uma lava. Fai mai Tavita, Ou te sola ea i fea ai luma o le Atua? E le i mafai ona sola Kaino! A o fea la na e te faamoemoe e te sola ma lafi ai?

O le upu a le Atua ia Kaino, e le toe fua mai e le eleele ni fua lelei ia te oe. Ua malaia oe mai le eleele. O lona uiga, o mea uma ua pa. O au pisinisi, atiina’e, ma soo se mea e te taumafai e fai, e pā. Auā ua malaia oe mai le eleele. O le maumausolo ma le faasevasevaloaina, o lou olaga lenā o aso uma e faamatalaina lau amio leaga.

Samoa, e le talimamāina e le Atua le soli tulafono a le tagata amio leaga. Fai mai le Atua, o loo taoto i le faitotoa le agasala. E te moe ai ma ala a’e ai i aso uma. E le o tuua e le Atua i le alatele; o i faitotoa. E faapologa oe e le agasala. E faataugāina oe e le agasala seia oo i le afi e faavavau. Fai mai le Atua ia Kaino, Pe afai e te amio lelei e te le maua ea le fiafia? Ae afai e te le amio lelei, o loo taoto i le faitotoa le agasala.

Kaino, ua iai le avanoa mo oe. Tulivae ma le loto salamō faamaoni. I le ma lenei, ta’u sa’o le faamaoni o mea moni o loo fai ai le taulaga ma faagaoioi ai galuega. Fai mai Iesu, O lē ua faamaoni ana mea e fai, e sau lava o ia i le malamalama, ia faaalia ana amio ina ua tatau i le Atua. (Ioane. 3:21).

Pe afai e te amio lelei, e te le maua ea le fiafia?

 

 

Amene.

 

7737063

By Rev. Petaia Setu 17 February 2019, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>