Talanoaga i le ala - Fesiligia pea le saogalemu o pasi la’u-pasese

O le fa’alavelave lea na malepe ai se pasi-la’u-pasese i Tiavi i le vaiaso talu ai ma ma’umau ai le soifua o se ali’i-talavou, ua lagalagā ai le mau fa’amatalaga ma tu’u-fesili ai le atunu’u, i le saogalemu o femalagaa’iga i luga o ‘auala i Samoa. Ua toe fa’atūtū ai nei fo’i finagalo o le atunu’u, po’o fea tonu ituaiga-pasi e saogalemu, o pasi-laupapa o lo’o fausia lava i Samoa nei, po’o pasi e fausia mai fafo. Na fesiligia e Ilia L.Likou i le Polokalame o Talanoaga i le Ala i lenei aso, le mamalu feafioa’i o le atunu’u, i so latou finagalo, ae pe fa’avae i se a lo latou talitonuga. O nisi nei o finagalo sa fa’aalia: 

Peneueta, 50, Siumu

E sili ia a’u pasi-laupapa. E sili atu le iai o pasi-laupapa nei aua a o’o i taimi e tupu fa’afuase’i ai se fa’alavelave pei o lea na tupu i le Aso Faraile, ona tou silafia lava lea o le uiga o lo’u manatu. E faigofie i le pasese ona sosola ‘ese i so’o se taimi. ‘Ou te iloa, o le mafuaga lena na to’atele ai tagata na fa’asaoina i le fa’alavelave i Tiavi.

Toni Penisula, 37, Nu’usuatia

Pe pasi-laupapa pe pasi mai fafo, e taufai lelei uma. O le fa’afitauli i le vala lea, o le ‘ave-ta’avale. E tatau lava ona matua malamalama lelei, o lo’o i o latou a’ao le tele o soifua i aso ta’itasi. O se fa’amanatu lelei lea mo latou na, o le ola e manumanu iai ma e leai se tagata-soifua e le fa’atauaina le ola, e le uma nei ae toe maua taeao. E le mafai ona fa’atau se ola.

ADVERTISEMENT

Eli Taualai, 36, Siumu

E tutusa lava le lua lea. ‘Ae ana o se pasi mai fafo lea na lavea, o se matua otigā-tagatā le mea e o’o iai le fa’alavelave i le vaiaso talu ai. O le isi lava mea taua, ua tatau ona tilotilo iai, o le fai lelei lea o ni a’oga a tagata nei – ‘avepasi, i le va’aia lelei o pasese ma ia fa’autauta lelei i le fe’avea’ina o le mamalu o le atunu’u. ‘Ou te manatu, e matua le-ano lava ‘avepasi nei i soifua o le atunu’u ma o le fa’afitauli tonu lava lena. 

Fereti Tupuola, 46, Siumu

O lo’u lava malamalama, e le taitai ona toe saogalemu pasi-laupapa nei mo le ‘auala lea i Tiavi. A va’ava’ai lelei i le fa’alavelave lea, na matua malepe leaga ma salalau le pasi. Tatou te mo’omia pasi mai fafo ae maise fo’i, ua tatau fo’i ona suia se ‘auala e ui ai mo le saogalemu, ae le o le ‘auala lea e oso i Tiavi.

Aso Matemate, 45, Siumu

 ‘Ou te talitonu o lo’o saogalemu pea pasi nei. E fa’atamala ‘ave-pasi ma ua tatau ona a’oa’oina lelei ina ia va’aia lelei le soifua o tagata o le pasese. ‘Ou te manatu ua tatau ona iai ni pasi mai fafo ma ua tatau fo’i i le ‘au-fai-pasi o le fa’aitu lea ona tilotilo iai, ia fa’atele ni pasi mai fafo mo le ‘auala lava lea i Tiavi. 

Pofito Semasi, 35, Vaie’e, 

E sili lava ia te a’u pasi-laupapa. ‘Ou te iloa o le mafuaga lena o le tele o soifua na fa’asaoina mai le fa’alavelave i Tiavi. Fa’afetai ua fe-ola le to’atele. O le tele o suiga e tele ai mea e tutupu ma a tilotilo toto’a lava iai, e tatau lava ona fa’aauau pea ona fa’aaoga pasi-laupapa.

ADVERTISEMENT
Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?