O galuega lelei mo le fanau
Na maua le fa’atalatalanoaga a le Fofoga o Samoa ma le tinā ia Mena Niue, 34 tausaga le matua mai le afioaaga o Leauva’a le aso ananafi ae o lo’o galuega i le latou maumaga.
O le faigata le ola na fa’amatalaina e le tinā o le fanau to’aiva i lona galue ai le maumaga ona o le atina’e mo le aiga.
“Ia o la’u lava lea galuega e fai ese mai i tiute fa’atinā o le galue e fa’amāmā le maumaga ma tõtõ tiapula mo le atina’e.
“O le maumaga o le isi lea alagatupe o lo’o fesoasoani tele le totogi o le tamā le aiga mai lana galuega.
“O si o’u to’alua o lo’o faigaluega fa’akamuta e tele lava na alu le vaiaso atoa fa’atõā matou feiloa’i lava i aso to’onai po aso faraile foi pe a uma mai ana galuega.
“Tusa la o matou mau te le nonofo tūmau ai i nei, e iai le matou aiga i gatai ae mau te omai lava uta nei e va’ai le fanau ma galue le matou maumaga ona o’o foi lea le aso to’ona’o matou o lea e aso sā i gatai.
“Ia o le tulaga la i le vai ma le eletise i tai o lo’o lelei lava mea uma. o lana lea tala i le Fofoga o Samoa.
Sa ia fa’alia le tulaga tau le sailiina le seleni.
“Ia i le tulaga tau sailiga le seleni na’o si o’o to’alua o lo’o faigaluega, e maua mai ai le tupe e tausi ai le mā fanau to’aiva.
“O le totogi o le tamā ma le fesoasoani tele i le maumaga o lo’o maua ia le alagatupe aua aoga le fanau o mea’ai ma tulaga fa’atino totonu le aiga.
“O le fanau lava o lo’o ave iai le mā fa’amuamua, ona ua fai sina to’atele, ma ou te le tio foi lea itū aua o le to’atele o le fanua tauisi ia o le māmā foi lea o le vaega i se taimi oi luma.
“E le se galuega faigofie le tausiga le fanau aua ua uma ona tatou iloa ma silafia lelei le tulaga tau sailiga o le seleni ua faigata lava i ona põ nei.
“A fai ae ou fia mana’omia se fesoasoani, ou te talosagaina lava se fesoasoani le pili aoga o le fanau ina ia māmā ai le avega o le ave nei.
“O lea foi le itū ina ia mafai ona aua nei ia le popole i le itū tau aoga le fanau ae ia lava le fa’asoa i meaai ma mea fai le aiga.
“Na o le maumaga lava o lo’o maua ai sina fesoasoani ae le tēlē foi ona na’o a’u o lo’o galue ai, toa maua lava se fesoasoani i le fanau aoga pe a tuua mai le aoga.
“O lo’u naunau galue foi le maumaga ina ia fa’amāmā ai le avega i le tamā le aiga i lana galuega fitā olo’o fai.
Sa fesiligia le tinā i ni fa’afiatauli o lo’o feagai ai ma ia le tausiga le fanau to’a iva sa tali leai.
“E ui le to’atele le fanua e iai lava le malosi e tausi ai ona o le fanau o le tofi mai le ali’i.
“Ma ou te tausi ma le fa’amaoni ia te’i latou.