Toe manatu tasi...Vave Tele ona Matua

By Fa’aliliu e Maiava 15 July 2016, 12:00AM

Toe mafaufau tasi lava…I le tala moni i le teine talavou o Vicky, na manatu ua tatau ona iai o sona lava potu na o ia, ona ua matua. Foliga e le sa’o le momoe pea ma lona tina i le potu e tasi, a’o lea ua 18 ona tausaga.

Ae na matua fa’ate’ia Vicky pe toe tolu ma le ‘afa vaiaso atoa lona 18 tausaga, ae taunu’u loa lana miti, e ui e le o le tulaga lea sa manatu pe mana’o ai fo’i.

Ua maliu le tuagane o lona tina, lea ua maua ai loa ma lona potu na o ia.

Ioe, e lualuagia le fiafia o Vicky talu ai ua na iloa, o le tali o lona mana’o, o le maliu lea o lona uncle. O le mea moni ua tupu, e le gata ua maua ai lona lava potu na o ia, a ua na maua ai fo’i se paleali’i, ina ua avea ai nei Vicky le tama’ita’i talavou, o le Tupu Tama’ita’i o Victoria…o Peretania. 

Ua fa’alogo so’o i le tala, “Fa’aeteete i mea e fa’ananau iai.” Telē le mea na mana’o ai Vicky, ia taofia tagata mai le faia pea o ia, o se tama’i-teineitiiti. Ae fa’afuase’i ai loa ona fa’amalosia e faia ma fa’atino ogaoga, o le avea ai ma Tupu Tama’ita’i o Egelani, a’o talavou lona olaga!  

E iai taimi e fa’amalosia ai tamaiti laiti e ola fa’atagata-matutua, a le-mafua ona ua malie se tasi o matua, pe ona o le fa’avasivasi fo’i ma le-fa’atuatuaina matua. Mulimuli ane, ua avea ai lava se tamaititi o se matua. A o le fa’alavelave la o le vave-fa’amatua o se tamaititi, e seasea vave suia ai lagona fa’atamaiti – pei o le vave toli o se mago e le’i matua ma pula lelei.

Fai mai Michael Jackson – le Tupu o pese pop, o le pese aupito lelei ua na tusia e fa’amatalaina ai lona olaga, o le pese e ta’ua o le “Childhood.” O ‘upu nei o lo’o i lea pese: “Fai mai tagata e le o a’u o se tagata lelei, talu ai ‘ou te fiafia i mea faigofie…O la’u lea ta’utinoga, ia ‘ausia le olaga fa’atamaititi na ‘ou misia…le fita a’o la’iititi…A ete le’i faia o’u tala, taumafai ia malamalama. Silasila toto’a iai ma fesili, Na e va’ai o ‘ou la’ititi?”

Afai lava ua e lagona e iai se mea o misia pe afaina fo’i ou lagona ona o le leai o se alofa ma tausiga fa’aMatua sa e mo’omia a’o la’iitiiti, e mafai lava ona amata nei – i le aso. Tatalo ia Iesu e pulea e Ia lou tagata atoa i aso ta’itasi o le olaga.

‘Aumai Lona Malosi, Lona Malamalama ma Lona Alofa e fesoasoani e fa’aatoatoa ai ou mana’oga fa’aMatua. O le a Ia amata ona fa’aatoatoa lou tagata ma fesoasoani atu e avea ‘Oe o se tasi e mautu ma saogalemu, se ali’i po’o se tama’ita’i manuia sa Ia foafoaina, ina ia fa’apena. Toe mafaufau tasi lava… 

By Fa’aliliu e Maiava 15 July 2016, 12:00AM

Trending Stories

Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>