Ia usita’i ma fa’alogo
E ui ina tele faitioga i le mau fa’alavelave o lo’o alia’e mai ona o tupulaga talavou, aepeita’i e le’o talavou uma o lo’o ‘a’afia ai.
Na maua le avanoa o le Fofoga o Samoa e fa’atalanoa ai le ali’i talavou i a, David Peni o Vaitele-Uta na ia fa’ailoa ai le taua o le so’otaga vavalalata a matua ma fanau.
“Ia o ‘au ia i lo’u iloa i ai e matua’i tele lava le sao o tupulaga talavou i totonu o le atunu’u, aiga aemaise o Ekalesia.
“Ae pei e mafai ona tino mai vaega lelei nei ina ua usita’i ma fa’alogo tupulaga i o latou matua.
“E pei o le uiga o la’u tala, o le itu pito sili ona maua’a ai le talavou i uiga lelei o le toaga lea e tatalo ma alu le lotu ia ma usita’i i matua.
“O le taimi lenei, ia o lo’o fa’apena ona le tu’ua fautuaga a o’u matua i a te a’u i taimi uma, ae pei o vaega lava nei o lo’o una’i ai a’u ia o le lotu ma toaga e fai fe’au.
“E po’o fea la e ta te alu ai, ae pei o so’o se talavou lava e mana’omia lava lona aiga, aua fo’i e maua mai ai fautuaga i so’o se taimi.
“E ui lava o le tele o taimi e fa’apena ona fa’avaivai ai fo’i ia ae malosi lava pe a usita’i ma fa’alogo, o le isi itu taua lava i so’o se tupulaga talavou ia o le toaga le lotu.
“E pei o le isi lea itu e fa’amalosia ai lava lo’u ia ola ia o le alu i le lotu ia ma fa’alogologo i le faifea’u ini upu lelei e mafaufau ai a’o i ai lenei olaga.
Na fa’ailoa e David o le isi itu e fiafia ai tele i le lotu ona o ia e ta piano.
“Ia e pei o la’u ia lea taleni , ma na ou fiafia lava e fai a’o o’u laititi ia o le ta piano.
“O lea la ua ou matua, ia lea ua fa’aaoga la’u taleni lenei aua le Ali’i, ma e tele fo’i lava lu’ita’u o le olaga.
“Ae pei o le toaga ai le lotu ma nisi o vaega e fa’atino mo le aiga ia e faigofie ai lava so’o se taumafaiga.
“Ia o lea lava fo’i le fa’amoemoega i lenei tausaga, ia o le usita’i lava i matua ma toaga i le falesa e maua ai le mea lelei.