Toe manatu tasi lava...Nofoaga o ‘Auro

Toe mafaufau tasi lava… I le tala moni lenei e uiga i se ali’i Ausetalia e igoa o Siaki Simiti. I le ogatotonu o le vaitau o le 1800’s, sa galue ai Siaki o se ali’i-kamuta se’ia o’o i le taimi na fa’alogo ai i tala o le vevesi o ‘eliga-‘auro (gold rush) i le setete o Vitoria, i le itu i sauté-sasa’e o ‘Ausetalia. E le’i toe fa’atali Siaki, ae tia’i loa ana mea-faigaluega masani, ae aga’i atu e sa’ili sona nofoaga, sona lava fanua, e maua ai  ‘auro. 

Sa galue punoua’i si ali’i o Siaki, e tau sa’ili’ili i vaitafe ma fa’asolosolo ‘eli lua i tafatafā-mauga, peita’i, e le’i manuia lona taumafai. Mulimuli ane, ua matua lagona lona vaivai, ma oso ai loa ma lona ‘augata, ma i’u ai lava ina musu sa’o loa. A o le fa’alavelave fo’i, e matua le-mana’o lava Siaki e toe fo’i i lona aiga, na o lima. E ma ina toe va’ai mai ona tagata ma lona nu’u, ua toe fo’i atu, ua le-manuia. Ona manatu lea o Siaki, o le a sa’ili sona nofoaga i se fanua e mamao ‘ese mai le to’atele o tagata, e nofo ma ola ai na o ia, mai mea lava e maua i lea oga-‘ele’ele.  

ADVERTISEMENT

O Yambuk, o se taulaga ititi i totonu lava o Vitoria, o se nofoaga ua tu’u-fua ua le toe nonofo ai nisi, a o se fanua fo’i sa ‘eli muamua ai le ‘auro. Ua mae’a le taimi sa vevesi ai ‘eliga-‘auro, ma e le gata la i le leai o se ‘auro o toe maua ai, a ua fa’aigoina fo’i e Siaki lea fanua, o lona nofoaga-tumau, o lona aiga. O Yambuk, e leai se la’au e ola ai, e o’o lava i ni la’au fai-laupapa, ma ua atili ai ona fa’aopooo le le-mautonu o Siaki - o se tagata-kamuta – ona o lea o le a alo nei e fau lona fale mai palapala, e nofo ai i le olaga atoa. 

O le fa’anoanoaga, e matua le-ilafia e Siaki Simiti, o le fanua lenei ua avea ma ona nofoaga mulimuli, o se ‘ele’ele tamaoaiga tele, e lelei tele fo’i le palapala mo fa’ato’aga. Ae na fa’atoa iloa lea tulaga, a ua tele tausaga talu ona maliu si ali’i o Siaki. Ina ua avea e le aiga tua’oi le fanua lea o Siaki, na tonu ai i lea aiga, e talepe i lalo le fale o Siaki na fausia mai palapala, ina ia toto ai la’au ma fai se fa’ato’aga. A’o talepe i lalo piliki-palapala nei ma ta’ape’ape, ae iloa atu e le tua’oi lea o Siaki, nai mea i’ila o fe’ilafi mai totonu. O vaega ia, o fasi ‘auro laiti! O le palapala-mūmū sa ‘eli e Siaki mai le ta’ele o le nofoaga tuai, o se vaega lea o se fa’aputuga-‘auro tele lava sa iai.  

Na fa’afuase’i ai ona toe ta’uta’ua le taulaga la’iititi lea o Yambuk, ae sa to’agaogao. O le mea moni, e le’i umi, ae avea o le nofoaga aupito manuia lea ma ta’uta’ua mo ‘eligā-‘auro i Vitoria. Ae, ua tuai mo le ali’i o Siaki Simiti. O le fa’anoanoaga tele lena, ona na maliu fia-‘ai ma fia-ola le ali’i, ae sa iai lava i lea nofoaga na tatau ona matua tele taumafa e toto ma maua ai, i sona fale taugata pei o le mamafa o ‘auro!   

Atonu sa fa’apea lau susuga, lou le silafia lea o le manuia o lo’o fa’ananau iai, o lo’o lua fa’afesaga’i i le taimi nei, e soifua lelei ma fiafia ai. A’o le’i tuai tele, tatalo nei ia Iesu e fa’amagalo ‘Oe, ou sese ma ala fa’aletonu o ola ai, ma talosaga Lona alofa, ina ia pulea e Ia lou tagata atoa ma suia lou ola, ina ia avea ‘Oe o se tagata e fiafia i le Ali’i ma soifua fa’amalieina, fa’afiafiaina, ia saogalemu ma fa’amanuiaina ai, mai le Lagi. Toe mafaufau tasi lava…

ADVERTISEMENT
Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investigative articles.

Ready to signup?