Molia malu-ole-malo i faiga-pi’opi’o
Ripotia e PaiMulitalo Ale
Fa’aliliu e Maiava
E to’atolu malu-o le-malo mai le Matagaluega o Leoleo ua fa’amalōlō le-tumau i le taimi nei, ona o moliaga ma tu’ua’iga fa’asaga ia latou, e aofia ai le fa’atinoina o faiga-pi’opi’o.
Na fa’amautu mai e le Afioga a le Ali’i Komesina, o Fuiavailili Egon Keil, le molia ai nei o leoleo se to’atolu – e le o fa’alauiloaina o latou suafa – ma na amata fa’amalolo lē-tumau ai i le vaiaso ua mavae.
O le to’alua o latou nei, o nisi o ofisa sinia o le Matagaluega a’o le isi to’atasi, o se ofisa i le vaega i lalo ifo.
E le’i fa’alauiloaina au’ili’ili mai e Fuiavailili le mafuaga o lea fa’ai’uga ae maise moliaga ua faia i nei malu-o le-malo.
Peita’i sa ia fa’ailoa mai i tusitala ma le vaega fa’asalalau, ua fa’ao’o atu nei lea mata’upu i a’ao o le Loia Sili a le Malo ma lona Ofisa mo fa’atinoga masani.
Ae na ta’ua, o lo’o fa’aauau pea ona ia fa’amamafa i le matagaluega uma, le lē-taliaina lava lea o ni amioga le-talafeagai mai tama’ita’i ma ali’i leoleo uma o le atunu’u, ma e le ‘alofia lava le faia o le mea amiotonu ma fa’atino ala masani o le tulafono pe a lē-usita’ia e se tasi.
E tuli-‘aupuina lava le ‘aufaigaluega ta’ito’atasi, i a latou amioga ma fa’atinoga e faia, o lana fa’aopoopo mai lea.