Taugata le soifuaga

Tusia Ilia L Likou ,

51 Hits

TAUGATA LE SOIFUAGA:  Le tina ia Rosa Mene.

TAUGATA LE SOIFUAGA: Le tina ia Rosa Mene.

O le tausia ai o aiga i lenei vaitau ua le’o toe faigofie.

O lea le talitonuga o Rosa Mene i le Fofoga o Samoa i le aso ananafi.

Na maua le fa’atalatalanoaga ma Rosa o aga’i atu i  le fale mai le momoliga o lana tama teine i le aoga.

“Ia o lea lava le tulaga e masani ai lava i taeao uma, ma e le se galuega faigofie fo’i le taumafai ai pea lea i aso uma ina ia maua se tulaga fo’i lea o le malolo.

“Aua e pei e sau iinei aumai si a’u tama ia ona toe fo’i lea e fa’atatau lava i le taimi e tu’ua ai.

O Rosa ma lona to’alua e to’atasi lo la alo.

“E pei o lea lava le tulaga o lo’o ua taumafai ai lava i nei aso, o le mafai ai lea ona fa’atino o so’o se taumafaiga aua le aga’i atu ai le lumana’i.

“E na’o si o’u to’alua o lo’o faigaluega i lenei taimi ma o lea lava le tulaga o lo’o ua taumafai ai lava ina ia feauta’i le fa’asoa i vaiaso uma.

“O se itu lelei tele le poto ai o le fa’asoa mai le totogi o lo’u to’alua, aua tatou te fai ioe uma lava i le taugata ua i ai nei le soifuaga.

Na ia fa’ailoa o le totogi a lona to’alua ‘e moni lava o lea maua le tupe ia e le lava a le fa’asoa’.

“Ae pei o lo’o ave lava le fa’amuamua i aoga a le fanau aua le aga’i ai le lumana’i.

“O le itu moni lava ia e faigata a le tulaga e pei ona ua i ai, ona o le manatu fo’i le le lava o le fa’asoa, ae o lo’o ave le fa’amuamua i le aoga o si a ma tama.

Na ia ta’ua fo’i o le aoga  o le tali lea i lenei vaitau i le tele o fa’afitauli ua tula’i mai.

“Ia e pei o lea lava le tulaga o lo’o ua i ai le taimi lenei, o le aoga lava lea ua va’ava’ai atu ai ina ia fa’amalosia ai le fanau.

“Ia tuputupu a’e ia maua ai so latou lumana’i manuia aua ua faigata lava nei aso ua le toe taugofie.

© Samoa Observer 2016

Developed by Samoa Observer in Apia