O LE FAIGA-MALO A UPOLU

476 Hits

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer. 

O Pili na maua ai e Upolu lana faiga-malo ma lona lelei uiga ese. Sa lava lona mamalu ona o itu ia:-Ua manatu tagata o ia o se Saualii-(2) ua ta lona gafa i le Tuimanu’a- o lona afafine o Sinaletava’e na nonofo ma Pili-ma ua iloga ai lona malosi ma le poto tele. O ona atalii o Tua ma Ana-o le masaga. O lona fa o ona atalii na faaigoa faatatau i le fe’avea’i o Sina mai lea fale I lea fale a’o le’i fanau. O lea na faaigoa ai lana ui’i o Tolufale. O tama la nei na tofia e pulea Upolu, Manono ma se vaega tele o Savaii mulimuli ane ai-ona o le mamalu lava o lo latou tamā o Pili. Ua iloa e Pili ua o’o i aso e tatau ai ona fai lelei le Malo-ona ia talo lea o lana fanau tama e potopoto ane o le a fai ana tofiga.  

O le mavaega la lenei a Pili-o Tua o le a fai ma pule i Atua-poo le vaega i sasa’e o Upolu. O le faailoga o lona tofi-ua avatu i ai e le toeaina lona ‘oso-e tusa ai ma lona faamoemoe i le galuega e faasaga i ai. Ua tofia Ana e pule i Aana-le vaega i sisifo o Upolu. Ia avea Ana ma lona itumalo e fai ma tagata tau-ma ua tu’u i ai le Tao ma le Uatogi- e fai ma faailoga o lona Toa. O Tuamasaga e nofo i totonu o Upolu i le va o Tua ma Ana-ua tu’u  i ai le Tootoo ma le Fue-o le faailoga o le failauga. O Tolufale e le’i ma’oti mai sona tofi mo se galuega fou- a ua tuu i ai le tausiga o le anoano ma matamata mai i Upolu. Na usu Tolufrale ia Sinailaufelo le tama teine a Utu ma Agi i Manono ona i ai lea o ona atalii e to’alua o Luatutu ma Luafataalii-o i la’ua ia na pulea le motu. Sa nofo Luatutu i Salua ae nofo Luafata i Faleu. Na usu Luatutu ia Sinaotaeopai i Manono. 

E to’atolu le la fanau-o Puna o le tupuaga lea o Faleapuna; o Manava o ia lea na iloga ai ona mamalu Manono ma le teine o Ulalemamae. E lua isi usuga a Luatutu-o le tasi i le tamaitai Sala’ilua-o lana tama o Le’iataualesā-lea na avea ma Alii Sili o Manono-ao le isi usuga na tau i le tamaitai Sapapalii. 

O na usuga e lua-faatasi ai ma isi feusua’iga ma tamaitai Savaii-ua iloa ai lava le mamalu o Manono-i isi itu o lena motu tele!

© Samoa Observer 2016

Developed by Samoa Observer in Apia