Leai se mea tatou te ola fa’atusatusa ai
O le manātu o sē tasi o mātai mai le āfio’aga o Lano i Savai’i, ua tatau iā Samoa ona toe foi i le olaga sa tatou ola a’e ai.
Taua e lē tama ia Mulitalo Tausaga Vui, o lona atugaluga o le mou atu o le tatou aganu’u, le tatou gagana ma le faasamoa ona o tu ma aga mai fafo ua ofi mai i totonu o Samoa.
E le gata i lea ae o le va’ava’ai alofa foi i le mafatiaga o loo feagai ai ma nisi o aiga ona o le malosi mai o le olaga faanei ona po lea o loo taumafai le tele o aiga e faata’ita’i iai.
“Ua ou molimauina nisi o aiga o lo’o ‘a’afia ai.”
“E taumafai e ola faatusatusa i le olaga o loo ola ai lesi aiga, ae o le itu tonu lava lea o lo’o mafua ai ona matitiva le tele o aiga Samoa.”
“E ola faatusatusa le aiga lima vaivai i le aiga o lo’o sologa lelei le tamaoaiga.”
Taua e le tama ia Mulitalo o aso ia sa fai faalavelave a Samoa i le po’a tele ma nai pusa’apa ae o aso nei e le’o toe iai se tulaga faapea o tula’i mai.
“O isi aiga e va’ai atu loa e selau povi o le oti o lesi aiga fai loa le latou oti taumafai ia ova atu ae o le itu tonu lava lea e mafua ai ona pologa tagata Samoa.”
E o’o foi I mea faalelotu sa leai lava se pologa I mea fai, aua na taunu’u le talalelei I Samoa amata loa le tautua ae o le fesili oa mea sa fa’atino ai lea tautua?
O fua o faaeleeleaga, o galuega o tatou lima sa tatou tua ia, sa le’I manaomia se tupe e faatino ai.
“Aua tatou te fa’aaoga seseina le afioga paia a le Atua, faapea o mea faaleekalesia e mafua ai ona tatou matitiva.”
“Leaga e le’o faapea mai le afioaga a le Atua tatou galulue e ave uma e faitaulaga ai I le Atua ae tatou pologa ai.
“O tupe sa tau le mana’omia i aso anamua ae sa filemu o tatou olaga.”
Aua o aso nei a tatou le faigaluega ua tatou le ‘a’ai.
Na saunoa foi Mulitalo o le tele o tatou aiga I Samoa nei ua faalagolago tele I fesoasoani mai fafo ae o mea lava o lo’o faia I Samoa nei o loo fai foi I Niu Sila, Ausetalia ma Amerika ona ua malosi faalapotopotoga faasamoa I fafo.
“Ou te molimauina le tulaga lea aua e masani ona ou faimalaga ai.”
“E moni lava o loo iai tatou fanau I fafo o loo galulue ma alolofa mai ae e sili atu ona faigata le olaga I fafo nai lo le olaga o loo tatou ola ma soifua ai.
Taua e Mulitalo e lelei le olaga o tatou I Samoa nei e saoloto mea uma ae o fanau ma aiga I fafo a le faigaluega e le ‘ai.
“Aua e ala ona tatou matitiva o le tatou ola faatusatusa, e leai se mea o lea tatou faatusatusa ai fua I aiga o loo lelei le tamaoaiga ae tatou tagai I le tatou lotoifale.”
“O nisi masani a tatou aiga Samoa, e va’ai atu loa e aulelei mai lumafale o lea aiga taumafai loa e faatusatusa iai, sau le pili ua le gafatia ona o le ola le fuafua.
“E leai se mea o le’a tatou manana’o ai fua e faamoli tatou togala’au ona o le aulelei mai o moli o le togala’au a lou tuaoi.”
Na lagolagoina foi e le tama ia Mulitalo atina’e a le tatou malo.
“O aso uma lava out e Malaga atu ai I Apia, ou faaamuia I atina’e tetele a le malo ua maea ona faatuina.
“Amata atu lava I ona auala, o fale tetele, o le felanulanua’I o auaunaga eseese o mea uma e matagofie I la’u va’ai.
O la’u fesili masani lava, Aisea e foliga ai lava Savai’i I le sefulu tausaga tuanai.
“Masalo o leisi 20 I le 30 tausaga lumanai o lea faapea ai foliga o Salafai.”
“E ui I lea e tatau ona savavali le malo I a latou upu ma latou ta’utinoga I tagata, o le mea e lelei mo Upolu e lelei foi mo Savai’i.”