E le faia i se matua sou malosi

Tusia Aruna Lolani ma Fetalai Tuilulu’u ,

85 Hits

Fa’amama o outou lotoa: Apoiliu Misa, 73 le matua o lona soifua mai Fusi Saluafata.

Fa’amama o outou lotoa: Apoiliu Misa, 73 le matua o lona soifua mai Fusi Saluafata. (Photo: Aruna Lolani )

O le to’atele o tagata e matutua loa, amata loa ona fa’avaivai mai galuega e fa’amalosi tino ai. 

Ae peita’i, e le’o se talitonuga lea se tina e 73 le matua o lona soifua, Apoiliu Misa mai Fusi Saluafata. Sa ia ta’ua i le Fofoga o Samoa i le aso ananafi a’o fai lana galuega, e le faia i se matua lou malosi. 

“Ua 73 o’u tausaga ae lea a ou te fa’amalosi i le fa’amamaina o fanua ma a matou lotoa,” o le tala lea a Apoiliu i le Fofoga o Samoa. 

 “O lo’u aiga lenei, a fa’apea la ou te mana’o e foliga matagofie atu nei fanua i tagata, e tatau ona ou galue e fa’amama i taimi uma. Ae le fa’apea a matua ona leiloa lea tumama ai ma fa’amama i si’osi’omaga.

Sa ia ta’ua fo’i i le Fofoga o Samoa lona tiute i totonu o lona aiga. 

“Pei o fe’au o lo’u tiute lea e fai i totonu o le matou aiga. E to’afitu tagata o lo’u aiga, ae o a’u ia e le fa’apea e to’atele ona ou fia nofonofo ai lea ma leai sa’u galuega e fai. 

 “Ou te fa’amama i o matou si’osi’omaga, ou te faia fo’i le tagamea, ia ma isi lava fe’au e tatau ona fai i totonu o se aiga ina ia tumama ai. 

Sa ta’ua fo’i e Apoiliu, o ia e feagai ma le aveina o lona to’alua po’o le tama o le aiga i le falema’i aua ona siaki e iloa ai o lo’o saogalemu lona soifua. 

“Ou te alu lava e ave lo’u to’alua e fai ana siaki, e ta’itolu aso o le vaiaso ma fai, o le Aso Lua, Aso Lulu ma le Aso Tofi. 

 “E mo’i a o se galuega tele ae o se itu fo’i e tatau ona fai aua e mana’omia e ia lenei siaki mo lona soifua maloloina. 

E ui ina lava ina lelei le tulaga o iai le aiga o Apoiliu, e iai lava nisi tulaga o lo’o mafatia ai latou ma mana’omia ai se fesoasoani, o nisi o na itu o le tulaga tau tupe. 

“O le aveina o lo’u to’alua i le falema’i e le’o se mea taugofie, aua e mana’omia le tupe mo le pasese toe mana’omia le tupe e totogi ai le siaki.

 “O se tulaga tele lea o lo’o matou mafatia ai aua le tau fa’atupeina. 

 “E le’o toe taugofie se tau o le soifuaga i Samoa, e le’o na’o lo’u aiga fo’i o mafatia ai lenei tulaga, e fa’apena uma a tagata o le nu’u. 

“E mo’i e iai la’u fanau e fesoasoani i lenei tulaga ae o le tele o taimi e le lava le fa’asoa aua o tatou uma a o Samoa, ma ua tatou malamalama fo’i i le olaga fa’aSamoa, e tele mea e fai, tele saogatupe. 

Sa ia fa’apea mai i le Fofoga o Samoa “E lelei le matou nu’u ma o se mafua’ga fo’i lena ou te taumafai ai e fa’amama ma tausi iai ae a fa’apea e alu ai pea i luga le taugata o le soifuaga, ou te masalo e le toe iai se lelei o Samoa.”

© Samoa Observer 2016

Developed by Samoa Observer in Apia