Falepuipui le Pagota mo le isi lima tausaga ona o le gaoiga o le $50,000

Tusia Pai Mulitalo Ale ma Seagaitumua Tupuola ,

202 Hits

Ua toe sasa foi le Pagota o Lauitiiti Tualima i le isi lima tausaga e falepuipui ai –e le Faamasinoga Sili-ona o le gaoiga o le latalata i le $50,000 mai se supamaketi i totonu o le atunuu.

O le Alii Faamasino o Lesatele Rapi Vaai na ia tuuina atu lea faasalaga mo le isi moliaga o le gaoi ma ni tuuaiga se lua o le faaleaga ma le loto i ai –lea na ioe i ai o ia. E tusa ai ma le otootoga o mea moni a Leoleo, o le na tuua’ia o Tualima, o se pagota i Oloamanu i le taimi na solo ese ai. 

O le po o le aso 24 o Aokuso 2015 pe tusa o le itula e 10 i le po, na ia talepe ai ma ulufia le Supamaketi a le Farmer Joe’s Supermarket i Vaitele-lea sa taumafai ai e talepe le masini tala tupe o le ATM sa i lea nofoaga.

Ina ua le mafai ona ia faatino lea tulaga, sa liliu ane i le nofoaga sa teu ai tupe a le supamaketi na gaoi le $41,439.40 o le tinoitupe ma siaki tupe o le latou aofai e $8,438.12.  

O le aofai atoa o tupe na ia gaoi e  $49,877.52. O: Tualima e  23 tausaga lona matua, o ona nuu o Satapuala ma Luatuanuu. Ina ua tuuina atu ia te ia le avanoa e fai mai ai sana upu i le Faamasinoga, sa faatoese o ia ma talosagaina le faapalepale atu o le Faamasinoga. 

Ae peitai-sa le talitonuina e le Alii Faamasino o Lesatele ia mea uma, Na ia faamatalaina o ia –o se pagota poto faapitoa lea ua tonu ia te ia le avea o Tafaigata ma ona aiga i lona olaga atoa.

Fai mai le Alii Faamasino o Lesatele o lea pagota ua tele ona tausaga i totonu o le falepuipuie ma talu ai lana solitulafono lenei –e tele tausaga o le a faaopoopo atu i ai.

© Samoa Observer 2016

Developed by Samoa Observer in Apia