Ia sasa fanau i upu i ma tala.

Tusia Vatapuia Maiava ma Ilia L Likou ,

133 Hits

Le tinā i a Tagaloa Avau ma nisi o le mafutaga a faletua mai Salelologa, Iva ma Salelavalu.

Le tinā i a Tagaloa Avau ma nisi o le mafutaga a faletua mai Salelologa, Iva ma Salelavalu.

E le tau fesiligia le tele o fa’afitauli  o lo’o ua feagai ma le tele o alo ma fanau o le atunu’u aemaise o le lelei o le feso’ota’iga i so’o se mea.

O le aso ananafi na maua ai e le Fofoga o Samoa le fa’atalatalanoaga ma le tinā i a Tagaloa Avau Sagato o Salelologa, 64 le matua o le soifua.

“Ia o nei aso ua faigata lava le tulaga ua i ai le tele o nai fanau ona ou te iloa lava e a’u ia , e mafua mai lava i matua.

“Ua tatou iloa nei aso, ia o vaega o le soifuaga na masani mai ai lava aso ua mavae, ia  o nai isi e fa’aaoga e matua le sasa pe fue fo’i pe a le usita’ia le tamaititi ae pei o le isi itu latou te fa’aaogaina o le sasa o fanau i upu ma tala.

“O lea faiga , na tau feololo ai la aso, ia o nei aso ua tatou va’ai ai i le tele o le ‘a’afiaga ua i ai nei ona ua vaivai lava le fa’atonu a matua.

“O le a le tele o suiga lea ua sau ae ou te iloa lava e a’u ia , a lelei le tinā ma le tamā ia o le maopopo fo’i lea o aiga i le aga’i i luma.

O le tinā i a Tagaloa o lo’o avea ma ta’ita’i o le mafutaga Katoliko a Tinā i totonu o Salelologa, Salelavalu ma Iva.

“O mafutaga nei , o matou lava mafutaga a tinā e lagolago lava i le faiga o mea o le nu’u , ia o le a le faigata ae pei  o le galulue fa’atasi lava e maopopo lelei  ai.

“O le mea fo’i lena o lo’o sologa lelei ai le tele o vaega,  e pei o le isi itu lelei lava lea o lo’o fesoasoani i totonu o aiga.

 “Ia  talatalanoa matua i fanua, o a ni vaega o fe’ese’esea’i ai, ia vave ona foia , a lelei le feso’ota’iga o le tinā ma le tamā...ua lelei mea uma.

 “O le a le mea e tupu mai, o le mea lena e kiliva i fanau ma fai auala e soāupule lelei ai.

“Ia ola  fiafia aiga ma ia lelei feso’ota’iga le itu pito sili ona taua.

“A tu’ufau  fanau ma ua leai se talatalanoa ma le felamalamaa’i ona tupu mai loa lea o mala.

“E pei ona fa’ailoa muamua atu lava ia lelei le feso’ota’iga lelei, ma ia aua lava ne’i mapu le tautala ma le fa’asoa i fanau . O faigalotu i afiafi o aiga o se itu na ia ta’ua ua tatau ona ave ai le fa’amamafa i nei vaitau.

“Ia aua e pei o la aso , e pei o le lotu afiafi lava e va’ava’ai ai le tamā ma le tinā po o a mai le fanau, ia talanoa se fa’afitauli ia ona fai ai loa lea o le lotu.

“Ia ae ua ese nei aso, ua ese ua ave  le fa’amuamua o le tele o nai o tatou tagata, ae ia manatua, a lelei le asō ma le a’oa’iga o fanau, e manuia a taeao.

© Samoa Observer 2016

Developed by Samoa Observer in Apia