Toe Fofo amio o le tupulaga

Tusia Ulimasao Fata ,

43 Hits

UA LEAI SE FA’AALOALO O TUPULAGA: Tumanu Faitua mai le afioaga o Tuanai.

UA LEAI SE FA’AALOALO O TUPULAGA: Tumanu Faitua mai le afioaga o Tuanai. (Photo: Ulimasao Fata)

O le tama lenei o Tumanu Faitua mai le afioaga o Tuanai.

Ua 68 nei tausaga o lona soifua, ae o lo’o fiafia pea o ia e galue i lana fa’atoaga. Na maua le avanoa e talanoa atu iai le Fofoga o Samoa i le Tama ia Tumanu Faitua fa’atoa uma ana galuega masani i lana fanua galue.

Na fa’aalia e Tumanu Faitua, o lo’o sologa lelei pea mea uma ia faafitauli, ua fai sina faanoanoa o Tumanu i amioga a le tupulaga.

“Na’o le pau lava le mea lea ua ou fa’anoanoa ai i lenei vaitau, i le le manuia o amioga a le tupulaga i totonu o nu’u aemaise i totonu o le tatou atunuu atoa”.

“E feofeoa’i lava i le leva o se afiafi ma sipika faaleotele leo ma soona le mafaufau le ki ina i luga o leo o latou laau, ae ua fai malologa a le lautele”.

Taua e le Tama ia Tumanu Faitua, o se tasi mafuaaga o nei faafitauli ona o le le lava o se mafutaga o matua ma fanau, ae maise le lava o mafutaga faa le autalavou i totonu o Ekalesi.

“Ou te talitonu o tele o matua ua le toe faia le apoapoaiga i latou fanau ma ua le toe o’o foi le sasa i le fanau talu le tu ma aga ua oo mai i fafo”.

“O le isi mafuaaga o lea tulaga, o le faatagaina lea o matua o le fai telefoni a le fanau ma le tele o mea faapenei ona po ua latou omiomi ma taaalo ai”

Talitonu foi le Tama ia Tumanu o le tele lava o tupulaga o lenei vaitau ua matua leai lava ma se fa’aalo’alo i le va ma tagata matutua ma ua avea ai le tatou atunuu filemu ma atunuu ua tutupu ai le tele o vevesi i totonu o aiga.

“O le mafuaaga lava ua mafua ai nei uiga le manuia ona e solomua mai lava i tupulaga o lo’o latou le fa’aalo’alo i latou matua le faia lea o nei uiga i nofoaga ese. O le tele foi ia o nisi tupulaga ua faapena ona faapuna ifo i luma o maga’ala ma fai inuga ava malosi ma i’u ai lava i vevesi”.

O le popolega o le Tama ia Tumanu ona o tupulaga nei o taitai ia mo le atunuu i aso oi luma.

“Oute tatalo lava ia sau se taimi ona a’oa’oina lea o mafaufau o nei tupulaga i le faigata lea ua iai nei le olaga o le atunuu, aemaise e uma atu tatou ae o i latou o le a tulai mai ma taitai le atunuu”.

Na fa’aalia foi e le Tama ia Tumanu le tatau ona faia lea o se galuega lavea’i a aiga aemaise pulega a alii ma Faipule i totonu o nuu ma alalafaga e foia lenei faafitauli. Na ia taua foi o Samoa o le atunuu Kerisiano, a’o mea ua tutupu mai ua matua le manuia lava.

© Samoa Observer 2016

Developed by Samoa Observer in Apia