Ua ola a moamoa le atunuu

115 Hits

Tatou te faafetaia pea le alofa ma le agalelei o le Atua ua malu ai le soifua o Samoa atoa e afua mai Mauga Tetele se’ia o’o lava i Mauga iti, aemaise ai le Paia o le Aufaigaluega Totofi a le Atua i soo se Fata Faitaulaga i totonu o Samoa.

E ui foi ina faate’ia lo outou soifua ma so matou ola ona o faalavelave tutupu faafuase’i aemaise ai o le maliu ma le oti-ae o le upu moni ma le faamaoni- e ui lava ina tele o tatou tiga ma le loto faavauvau-ae lava ma totoe le alofa o le Atua-e sufi ai o tatou tiga ma tafiesea ai le ao pogisa sa o le tagi-aue sa ufitia ai tatou.

Ia fo’i atu pea le viiga ma le faafetai i le Atua e le aunoa. Ia alo maia-o le tatou talanoaga masani foi lenei ma le ‘aufaitau o lenei nusipepa-aemaise ai o le mamalu o le atunuu o loo fiafia pea i lenei tusitusiga.

Ae ui o lea-o le fe’au tau molimoli lava a lenei tusitusiga e tatau lava ona faao’o atu pea e faapea: E leai se faamoemoe e tasi o lenei tusitusiga e faaleaga se tasi pe tuua’ia foi-e leai foi se faamoemoe o lenei tusitusiga e faaoloataua se tasi-ae tasi lava lona faamoemoe e tusa ai ma le matafaioi taua a lenei nusipepa-o le logologo atu lea i le atunuu o mea o loo tutupu, atoa ma le pogai ua tupu ai-ona tatou talanoa lea ma fefaasoaa’i ai ina ia maua se vaifofo.

E mafua lea tulaga ona o soo se mea lava e tupu-lelei pe leaga-i Samoa nei-tatou te aafia uma ai lava., O le mea lea-ia alo maia! O le ulutala o le tatou talanoaga i le asō-o lena ua faaalia i luga; ma e i ai le manatu o le tusitala-ua manino ma malamalama lona uiga moni.

Ae afai lava e mana’omia sina faamalamalamaga teisi-ia o le a ‘ou fesoasoani atu. Fai mai le ulutala o lenei Talanoaga-“UA OLA MOAMOA LE ATUNUU.” O le a lona uiga? Ia, o le Moamoa, o le igoa o le i’a o le sami.

O le talaaga la o lenei i’a fai mai- e leai sona fiafia i lona olaga atoa? E popole ma atuatuvale! E le mafai ona moe!  Aisea? Ona o le tuliloaina pea o ia e tagata fagogota atoa ma isi ona fili.

Ua mafua la le ulutala ua faaalia i luga-ona o le tulaga tonu lava lea ua i ai le soifuaga o tagata Samoa uma i le taimi nei! Ua lamatia o latou ola i le anoano o faafitauli-talu ai faiga faatautala a le faiga-malo i le taimi nei.

A silasila i le salafa o Samoa-e tasi lava le ata tatou te vaaia-o le mativa ma le le tagolima. A silasila i ala tetele i le Taulaga- “ua feoa’i solo tamaiti i le ao ma le po e faatau atu oloa! O isi ua nofonofo solo ma aisi! Sa masani ona aisi faapea ni tagata o Samoa? 

Aisea la ua faapea ai?  Ua ola ma le fefe ma le atuatuvale pe o le a faapefea ona tausi le aiga ma le fanau. Ua popole ona ua le iloa pe faapefea ona ola e aunoa ma se tupe.

Afai o se tagata e faigaluega- e tipi le lafoga mai lona totogi, toe alu atu i le faleoloa e faatau se mea’ai mo le aiga-ua i ai foi ma le isi lafoga ma isi tau faaopoopo.

O le a le mea e o’o i ai? Ua le lava le faasoa-ua le mafai ona tausi le fanau ma le aiga; ua leai se tupe e totogi ai le eletise ae o lea foi na te totogiina le aitalafu a le Faalapotopotoga o le Malo Faa-Eletise, toe totogi le tau o le suauu lea e vili ai le eletise; ae o le itu e sili ona leaga, o le toe totogi lava e ia o le pili o lona moli.

A tuufaatasi la nei faafitauli uma ma le isi anoano-ua sala la ina “ola a Moamoa” le atunuu-leaga ua le iloa poo fea a sulu i ai mo se lavea’i! E fa’i o lenei anoano-ae a fua i le lumana’i ma le tulaga o aitalafu a le Malo; e le na o tatou la ua ola-a-Moamoa, ae o a tatou fanau ma fanau a latou fanau.

E fa’i o le lamatia o latou olaga-ae o le lamatia o latou tofi ma meatotino e tusa ai ma latou aia tatau. O ai la a lē popole ma fefe vale e pei o le i’a o le Moamoa pe afai e vaai atu e fau mai luma fau mai tua, a ua leai se mea e ‘alo i ai?

A fua la i le tafetotoi ma le afu maligi o tatou matua i le tau sailiga o lenei Malo Tuto’atasi o Samoa ina ia tatou ola manuia ai ae o lenei ua i le gutu o le afi ma le teiō talu ai faiga a le faiga-malo- o le fesili la i o tatou matua pe afai e moni o loo tofafā mai Tia Sa-na outou silafia e i ai se taimi o le a “ola Moamoa ai Samoa?

Pule Oe i lau tali-ae o lo’u manatu to’atasi-e le’i miti o tatou matua i se soifuaga faapenei e ono o’o i ai Samoa; aua o le upu moni-‘o ai e fia oti mo se mea faavalevalea? Afai la ua tatou ola a Moamoa Samoa-o ai e pogai ai? Afai ua tatou iloa i latou ua pogai ai-a tu’u lava la e fai? Aisea ua tatou le mafai ai ona tatou filifilia se faiga-malo tatou te manuia uma ai?

Afai e le o se mea lea na maliliu ai ou tua’a ma oti ai so’u tama- a tu’u lava la nei faiga faatautala e saga fai pea? Silasila i le taunuuga leaga o le ‘ola a Moamoa ‘ o le atunuu ma le sasao faa-afi o le amio pi’opi’o, taufaasese, taupulepulega leaga ma solitulafono mata’utia ua aliali mai?

O ai la o ola Moamoa ae o ai e le o ola a Moamoa? Pule oe i lau tali- ae afai ua uma ona faamaonia e le Pule ma Su’etusi Sili le anoano o taupulepulea leaga a le aufaigaluega a le malo ma faalapotopotoga-ma faiga pi’opi’o a ta’ita’i o le Malo -ae musu e faatino le amiotonu ma le faamasinoga-atonu la e tala tuu mai le popole ma le atuatuvale o le i’a o le Moamoa aua e na o le lua lava ona fili e popole ai-o le tagata fagota ma i’a o loo fai ma ona fili- ae a tuu’u mai i le Ola a Moamoa a le atunuu- e le masino ona fili-talu ai ua faoa ana meatotino, lona atofi ma lona tamaoaiga e tagata faatautala!

O lea ua loma le palota-ou te le fai atu la e palota ia Pai ma Lafai poo Tui ma Seve; ae afai ua e fiu e ola a Moamoa-o le upu a le Poto-‘Palota i le mea e  manuia ai le atunuu atoa ma lou aiga! O a lava tupe o avatu ia te oe i lea aso ma lea aso-e uma loa le Palota-uma foi.

E na o le aso lava o le Palota e te vaai ai i le Sui Tauva; ae ia manatua la o le 5 tausaga o se taimi umi; ma a faaauau ai lea le Ola a Moamoe o le atunuu- e uma ane-ua matua leai lava se tatou!

Ae ia manatua foi-o ai na te iloa pe o se tasi lea o faiga faa-polokiki a Samoa- le faamativa o ona tagata-e tumau ai pea ona latou pulea le atunuu ma lona tamaoaiga.

Ia manatua foi le upu a le Poto- o mea uma lava e fe’ilafi mai -e le o ni auro ia, ma o le tofi lava o le auro o le gaoia poo le faatau atu i se tau e tele-ona manuia ai lea na o le tagata e toatasi, ae ua falōlō le lalolagi o tagata e ou ia auro.

O le ola Moamoa la o le atunuu-o le pisinisi lena a tatou uma- ma e faatoa mafai ona aveese ma le toe iloa mai- pe a tatou taumafai faatasi- e filifili se faiga-malo e aveese ai lo tatou ola a Moamoa, ae soifua sa’oloto i lou tofi mai le Atua! Ia manuia tele le Aso Sa Samoa ma ia faamanuia atu le Atua!

© Samoa Observer 2016

Developed by Samoa Observer in Apia