Fia maua se fesoasoani tau suavai

Tusia Fetalai Tuilulu’u ma Aruna Lolani ,

63 Hits

Miti Fa’anafu, 62 of Falevao.

Miti Fa’anafu, 62 of Falevao.

Ua uma ona tatou iloa lelei o le vai lava ia e tele ma taua lona aoga i tagata. A iai vai e ola lelei ma ola maloloina le mamalu le atunu’u. Ae a leai se vai ona iai lea o le mativa ma pepesi le fa’ama’i. 

O lea le manatu o Miti Fa’anafu o Falevao. O lenei tamā e 62 tausaga le matua le soifua ma e mai le afioaga o Falevao. 

I le fa’atalatalanoaga ma le Fofoga o Samoa o le sa taua ai e le tamā le fai tele si umi e le’i o’o atu le vai si o latou fale. 

“O matou nei ua lua tausaga o matou omai i uta nei ma matou nonofo ai. Sa matou nonofo muamua i tai e a’ai,” o lana lea tala.  “O le lua foi lea o tausaga o matou nonofo e aunoa ma se suavai e o’o mai so matou aiga. 

“Taga’i atu le paipa nae, ia o le lua ai nei foi o tausaga o ta’atitia i na e lei faia lava. Sa ave lava le talosaga i le matagaluega e gafa ma le suavai, peitai e lei maua mai lava se tali. 

“E pau lava lena o le mafatiaga o lo’o iai nei, o le leai se suavai ae o le tulaga ia le meaai o lo’o lelei lava mea uma. O le ala foi lena o le omai uta nei o le tele o meaai ma le maumaga e tua iai. 

Ae sa taua le tamā e leai lava se manatu o le a faigata ona o le leai se suavai. 

“Ia o si o’u atali’i lava e gafa ma le la’uina o le vai. Ia o le taimi nei foi o lo’o alu e la’u mai le vai i gatai. 

“Ia o maua e to’alima si a ma fanau, o le ala faigata foi lena ona o le fanau e mana’omia le vai i taimi uma. 

“O se avega mamafa tele ia te  a’u le leai o se suvai ona e mana’omia tele le vai so’o se tagata. 

“E na’o matou foi le aiga e leai se tane vai, aua o le polokalame sa fa’asau mo aiga e lei au mai ai le suavai e maua tane vai peitai e lei iai se matou tane vai. 

“O le ala foi lea o le fia maua o se fesoasoani ona o lenei fa’afitauli.

© Samoa Observer 2016

Developed by Samoa Observer in Apia