Faamuamua le fanau

Tusia Seia Soloi ,

98 Hits

MUAMUA LE FANAU: Le Tina ia Tala Suiai, 35 tausaga le matua mai Tufulele.

MUAMUA LE FANAU: Le Tina ia Tala Suiai, 35 tausaga le matua mai Tufulele. (Photo: Sei’a Soloi)

O lo’o ave le faamuamua a le Tina ia Tala Suiai, 35 tausaga le matua mai Tufulele, ina ia faamuamua manaoga ma le ola mo aso uma a le fanau.

O Tala e le faigaluega ae na’o lona toalua lava o lo’o faamoemoe iai le tausiga o le latou lava aiga, ae o lo’o nonofo faatasi lava ma le latou aiga atoa I Tufulele.

“Na’o le tama lava o le aiga e faigaluega, ma o ia lea o lo’o maua ai le alaga tupe mo mea fai a le aiga aemaise o faalavelave fai I totonu o le Nuu. O lo’o faigaluega nei le tama o le aiga I se tasi o fale suauu latalata I Malua, ma e ova atu ma le $100tala lana tupe maua mai i le aso ma le vaiaso.

‘O ia tupe uma o lo’o  faamuamua ai mea fai i totonu o le aiga, pei o pili o le vai ma le uila, aua o mea fai ale lotu o matou e lotu Mamona, e fua lava i aiaiga a le Ekalesia ua uma ona maioio lelei.

Na ia taua foi, po o le a le taugata o le soifuaga ua iai ae e faatino uma lava mea uma, aua o ea foi ia sa fai e matua i tausaga ua mavae

“E le mafia ona ‘aloese mai ai, aua ua masani ai lava o tatou tagata mai i le amataga, e le toe suia. O leisi faamoemoega o le aiga o Tala o lo’o iai nei, o lo’o faalagolago lea i faatoaga ma le togalaau aina.

“O leisi lea tupe vave e maua o le faatoaga, aua a oo ina fua e faatau ma maua mai ai tupe aua mea fai a le aiga, i soo se itu.

O le ola saogalemu o lona aiga aemaise lana fanau, o leisi lea itu o lo’o faamuamua e Tala.

“O le ola sefe lava o le fanau, tele faalavelave tutupu mai i fanau aemaise e laiti la’u fanau, ma o le manaia o le nofoaga ua latou nonofo ai o le filemu ma le saogalemu, leai ni faalavelave tutupu mai.

O le faamamafa a le tina o lana fanau, ae o le mea taulia ia te ia, ia ola fiafia ma ola manuia lona aiga aemaise le ola tuputupu a’e o lana fanau.

“Leai a seisi mea e sili atu nai lo le ola fiafia o le aiga, o mea ua maua, faafetai ma talia ma le loto fiafia aua e le tutusa uma aiga i lenei vaitau, ae o lo’o atia’e lava i le mea e gata ai, aua le manuia o aiga ma fanau mo le lumanai.

© Samoa Observer 2016

Developed by Samoa Observer in Apia