TALATUU O LE ALATAUA

1995 Hits

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer.

 

E tusa ai ma isi talatuu-fai mai o le gafa moni lenei o Lealali. Fai mai na usu Pili Le Soopili Tuamanuleleilemanino ona maua lea o ‘Apa’au’ula lea na usu ia Ufiufitasi ona maua lea o Lealali. 

A tuu la i talatuu a Aana, fai mai e leai se Tuiaana Leopili ma Pilisosolo. O Apa’ula foi lenei-o loo ta’ua i le tala ia Vaega a le Tuamasaga. Ae tatau foi la ona manatua o matua o Atiogie ma Lealali -sa faasino i le Gafa o le Ufi.

Ae afai e faaauau pea le gafa o Lealali ona faapea lea:-Na usu Lealali ia Sinalegogo le alo o Leutelelei’ite o Falefa ona maua lea o “Salevaogogo” ma “Sausi”  lea e faasino ia Leulumoega. Ona toe usu lea o Lealali ia Malelegaaleto’elau le alo o Tuisafua o Iva ona maua lea o “Tupa’imatuna, Tupa’ilelei ma Tupa’isiva”. 

Ae fai mai Misi Pulo- o Tupa’isiva sa igoa foi o Tupa’isina; ma e i ai ma le isi to’alua o “Tupa’iuli ma Tupa’iloa”. 

Ona fai lea o tofiga a Lealali i lana fanau-“O Salevaogogo ma Sausi e nonofo ma le pule i Leulumoega; e pule lava i la’ua i le Tuiaana ma e pau mai Falealupo le la pule; a’o Tupa’imatuna, Tupa’ilelei ma Tupa’isiva-‘o le a o e fai ma alii o Savaii.’ 

Ona mana’o mai lea o Laufafaetoga ia Tupa’ilelei ina ua a’ave atu tala o lona ‘aulelei. Ona sau lea o Laufafaetoga ma vaai i ai e ‘auleaga, ona nofo ai lea ia Tupa’imatuna. 

Ona faapea lea o upu a Laufafaetoga-“Na poloa’i mai lo’u tamā a ‘ou to-ia ‘ou fanau atu i Tonga. 

Ona alu lea o le folauga ma ua sili le vaa i Fiti, ae fanau loa Laufafaetoga o le tama-lea na faaigoa ia ‘Vaasiliifiti.’ 

Ona sola lea o Laufafaetoga ua nonofo ma Lautala le alii Fiti-ona maua ai lea o le la fanau o “Ututauofiti, Tauaofiti ma Legaoletuitoga”. O Matautu la e faasino i ai Ututauofiti; o Sataua e faasino i ai Tauaofiti; o Salega e faasino i ai Legaoletuitoga.

Ona toe foi ane lea o Laufafaetoga I lana tane Samoa; ona toe to ai lea, ona sauni loa lea o le a toe fo’i mai i Samoa. 

A o sau lo la vaa- sa la iloa mai ua fotu atu pe ua latalata atu Samoa, ae fanau loa le teine ma faaigoa o “Fotuosamoa” poo Safotu lea. Ona usu lea o Vaasiliifiti ia Malelegaasavai’i, le tama’ita’i Tufutafoe ona fanau ai lea o “Vaasiliuli.”

Toe usu Vaasiliifiti ia Fe’egaga le tamaitai Sagaga, ma le tamaitai Sale’imoa ona maua lea o le ‘nofolua’ poo “Fe’easoa.” Ona fanau lea o le tama a le tama’itai Sagaga o “Funefe’ai”; ae fanau le tamaitai Sale’imoa o “La’ifai.”

Ona usu lea o La’ifai ia Matuaitali le tamaitai Falease’ela ona maua lea o “Fotulafai-poo Safotulafai lea; toe fanau o “Talalafai” poo Iva lea; toe fanau o “Tupa’iloa” poo Falealupo lea; toe fanau o “Loaloa” poo Salefe’ē lea; toe fanau o “Tupa’ifaaulu” poo Neiafu lea; toe fanau o “Tupa’ilefao” lea poo Asau lea; toe fanau o “Muliagalafai” (u’i’i) poo “Salemuliaga” lea.

Ona usu lea o Fotulafai ia Levaoita le alo o Pulusau i Salelologa-ona maua lea o “Letufuga” ma “ Le’aula” (Sale’aula lea).

Toe usu Lafai ia Matu’uiafatu-o le uso o Mata’uiatali ona maua lea o” Vaasilitamaolepo.”Usu Vaasilitamaolepo ia Sinaletuna ma Sinaleimoa o tamaitai Sale’imoa o le alo o Poluuli ona maua lea o “Lafailetaua” poo Satupa’itea lea. Usu Lafaitipa’itea i le tamaitai Samatau ona maua lea o “Tevalefua” lea na usu ia Pipilimatualimatasi o Saga ona maua lea o “Muliagalapaitagata” ma “Muliagalapaiaiatu.”

Usu Toalepai o Matautu ia Fotuosamoa ona i ai lea o Seveaogā ma Sooalo. Sooalo ia Sinalagilagi ona maua lea o le teine o Fetui. Usu Tuisamoa o Falealili ia Fetui ona maua lea o le teine o Tagiilelagi.

Usu Ugapo o Lealatele ia Tagiilelagi ona maua lea o Mamalemasina lea na usu i ai Lefono o Amoa ona maua lea o le teine o Taupoimasina. Usuia Taupoimasina e Tuitogafaaulufanua ona maua lea o le teine o Vaetoifaga. Usu Tuiaana Tamalelagi ia Vaetoifaga ona maua ai lea o le Tupu Tafa’ifa Tamaitai muamua o Samoa o Salamasina.

© Samoa Observer 2016

Developed by Samoa Observer in Apia