Leai se Alofa e Sili atu

Tusia Maiava ,

247 Hits

Toe mafaufau tasi lava… Na manu’a tigaina se teineitiiti e fa tausaga i se fa’alavelave tau-ta’avale. O le tele o lona toto na ma’umau, na fa’apea ai, e au lava ina maliu. Pau lona fa’amoemoe, o se tasi e foa’ia sona toto.

A o le fa’alavelave fo’i, e le ta’atele le ituaiga toto lea, ua faigata ai i foma’i ona maua fa’atopetope o se tasi e tutusa ituaiga-toto ae maise, o se tasi e naunau e ‘avatu lona toto mo le teineitiiti.

Ae na fa’atoa maua e foma’i, e iai le tuagane e fitu tausaga o le teineitiiti lea, e tutusa lelei o la toto. Na ta’ita’i atu e le foma’i le tuagane lea i lona ofisa ma fa’amatala iai, ua matua tigaina lona tuafifine, ae vagana ua maua se toto, atonu o le a ‘avea lava o ia e agelu i le lagi.

Na maligi lemu loimata o le tamaitiiti. Na ‘umi o tau taofiofi lona fefe ma lagona fa’anoanoa ona musumusu lemu atu lea i le foma’i: “E avatu lo’u toto mo si o’u tuafafine.”  

A’o mata’i e le tamaitiiti le alu atu o lona toto i se fa’aga’au mo lona tuafafine, na fa’afuase’i ona oso lona popole ma atili ai lona fefe. Na va’aia e le foma’i foliga fefe o le tamaitiiti ma ia fa’amalosi’Au atu:

“E le o toe ‘umi lava.” Ua amata ona tagi le tamaitiiti ma fa’apea atu i le foma’i: “O le taimi la lenei ‘ou te oti ai.” Mai lava i le taimi na fai ai le foma’i e ‘ave lona toto mo lona tuafafine, na fa’apea ai le tamaitiiti lea, o le a ‘ave UMA lava lona toto ma oti ai loa, ae ola lona tuafafine.

O le alofa tele o le tamaitiiti i lona tuafafine, na Ia ‘ave ai lona ola mo ia. 

O ē silafia e sili atu le mea na faia e Iesu Keriso mo ‘Oe? Ui o Ia o Le Atua, ae alofa mutimutivale pea mo ‘Oe ma a’u, na ia foa’ia ai Lona Soifua ina ia fa’amagaloina i tatou ma ia ola fa’atasi ai ma Ia e fa’avavau.

Na fa’amatagaina o Ia e ala i le maliu mo a tatou agasala uma. Manatua, e leai sona sese e tatau ai ona maliu. Ae na maliu ma tanumia mo aso e tolu. Na toe soifua mai ai, ia tatou fa’asoa fa’atasi Lona soifua alofa, nei e o’o i le fa’avavau pe a mavae le ola.

E na o Ia lava lo tatou fa’amoemoe. Tatalo nei ia Iesu e fa’amagalo ‘Oe ma avatu Lona soifua fou e te ola ai. E sili atu lona Alofa i lo se isi lava alofa – lona alofa lena na maliu ae ia fa’asaoina ‘Oe.

Ae a pe a fa’afetai nei ma alofa ia Iesu e ala i lou ola i ona ala moni ma le manuia i aso ta’itasi? Toe mafaufau tasi lava…                                                                      

© Samoa Observer 2016

Developed by Samoa Observer in Apia