Sina fautuaga mo le tupulaga

Tusia Deidre Fanene ,

136 Hits

SE FAUTUAGA MO LE TUPULAGA: Fa’aolataga Fa’aaliga, 21 tausaga mai le afioaga o Samatau.

SE FAUTUAGA MO LE TUPULAGA: Fa’aolataga Fa’aaliga, 21 tausaga mai le afioaga o Samatau. (Photo: Misiona Simo)

E le tau fesiligia le tele o fa’alavelave ua a’afia ai le ola o tupulaga i lenei vaitau.

Ua le masino foi le tele o fanau e a’afia i soligatulafono i totonu o le atunu’u i lenei vaitau.

Ma o se tulaga fa’anoanoa tele lea ona o fanau o lo’o fa’alupe o le lumana’i mo a taeao.

O lea foi le tulaga o lo’o fa’anoanoa ai le finagalo o le taule’ale’a ia Fa’aolataga Fa’aaliga e 21 tausaga mai le afioaga o Samatau.

Na ta’ua e Fa’aolataga, e va’aia lava ma le fa’anoanoa le to’atele o fanau e a’afia i tulaga fa’apea aemaise lava i nofoaga faitele.

“So’o se taimi lava e va’aia ai i talafou se tulaga fa’apea ua aafia ai nai tupulaga talavou, e lagona lava le le fiafia o le loto.

“O le tulaga e fa’anoanoa ai, e fai e latou, ae tusitusi lima uma mai ai isi tagata i tupulaga talavou uma.

“O lo’o tele lava le aafiaga o nisi o tupulaga talavou e le’o faia ia tulaga.

“O le ala lena o lo’u le fiafia ai i nei tulaga. O le isi tulaga, o lo’o ta’uvalea ai si o tatou atunu’u aemaise lava pe a omai turisi mai fafo.”

Ae peita’i, na ta’ua e Fa’aolataga, o le tulaga lea e fiafia ai i nu’u i tua.

“E fai lava la’u au ia tala i tupulaga o si o matou nu’u o Samatau. E ese le mamalu o pulega a nu’u ma faipule ma o le ala lea e leai lava ni vevesi e tula’i mai i tupulaga.

“A fia talitonu, ona afio mai lea e tagataga’i ma va’ava’ai i taimi o afiafi fa’aleaiga.

“E mamalu lava sa ma vavao a le nu’u ae maise e fai lotu uma tamaiti i o latou aiga.

“E uma loa lava le lotu i le afiafi, ona laulau loa lea o le tausiga a matua ae fa’ai’u loa i le evaeva i luma o le fale ma talatalanoa ai.

“E le taitai lava iai ni fa’afitauli e alia’e mai e a’afia ai tupulaga. E le so’ona faia foi e se tamaititi se mea e ta’uvalea ai lona aiga i luma o le nu’u aemaise e fa’amataga ai ona matua.”

O le taule’ale’a ia Fa’aolataga e le’o faigaluega i le taimi nei, ae o lo’o ia faia le faiva o le tautua i le taimi nei.

“Ia o a’u, e le’i lelei se aoga, o le mafua’aga foi lena e le’o faigaluega ai i le taimi nei.

“Ae o a’u o lo’o faia le faiva o le tausi aiga. E pei o le fagota lava o lo’o fa’amoemoe iai si o matou aiga aemaise foi o le ma’umaga.

“Ou te talitonu lava a’u ia, e le na’o galuega fa’aofisa e maua ai manuia ma tupe a tagata. 

“E manuia foi le tagata tautua, pe a fa’amaoni ma le fa’alogologo tiga.

“O a’u e maua lava le $300 tala pe a fa’atau a’u faiva i isi aso. E lava ma totoe lena e fai ai nisi o fuafuaga i totonu o aiga, aua o lo’o maua mea’ai mai le sami ma le lau’ele’ele.”

Na ia ta’ua foi, o lo’o tele foi lava ma anoanoa’i le tamaoaiga o lo’o fau ma soloi i Samoa.

“Ou te ta’utino atu o lo’o fau ma soloi le tele o tupe i totonu o Samoa.

“Na’o le pau lava le mea e fai, o le tu i luga ma alu e sa’ili ma galue malosi.

“O le to’atele o tagata i le vaitaimi lenei, ua na’o na nofonofo ma fa’atalitali e o atu nisi e tu’u atu manuia i o latou lima.”

Na ia ta’ua foi, o le tofi o tupulaga i le vaitau lenei, o le tautua lea ma tausi lelei o latou matua.

“Ua tatau nei loa ona tu’u ia faiga fa’ale-alofa fa’apea. Na’o le ma’imau ai fua o le taimi ia ae le o e fai lelei fe’au a o latou aiga.

“E leai lava ma se mea e maua mai ai.

“Na’o na pau lava le mea e o’o ai o le loka ai i Tafa’igata ma fa’amaasiasi ai ma aiga ma matua.

“O la’u fautuaga la ii a uso, o le tu’u loa o ia aga.”

© Samoa Observer 2016

Developed by Samoa Observer in Apia