Le Tauvaga Moni

Tusia Fa’aliliu e Maiava ,

257 Hits

Toe mafaufau tasi lava…Sa lua tauva muamua ma se isi i se tama’ita’i po’o se ali’i fo’i se to’atasi? Ioe, talitonu iai pe leai, a o le finau po’o le tauva, o mea masani lava ia o le ola nei. O le mea moni, e to’atele isi tagata (e ‘ese mai ia ‘Oe), e manana’o i le galuega lea e tasi, se avanoa sikolasipi, se pisinisi, se tofi-maualuga po’o se suafa matai fo’i.

A’o isi la tagata, e matua le-taofiofia lava se’i vagana ua manumalo. Pe tala-pepelo ai, pe taufa’asese ma faitatala ma matua fuli e fa’aleaga isi tagata. Ae a tatou tauva, tau lava ia na ona manumalo ma fa’afaia’ina ia le isi tagata, e iai le mea e ono tupu.

E le gata e avea ai tatou ma itu-faia’ina leaga, ae manumalo ane fo’i, a ua matua faia’ina. O ituaiga tauvaga ia ma finauga fa’apea, e tula’i mai ai se tagata e matua leaga le loto ma uiga, se tagata e mana’o ia na o ia lava ma le olaga nei, e matua ‘ai-u’u, e mimita, fia-iloa ma losilosivale.    

O se lesona aoga mo le olaga, o le taumafai lea e finau ma ‘Oe – lou lava tagata. A manumalo ai la, pe faia’ina fo’i i isi tagata, e te manumalo lava, talu ai lou taimi ma lou finau ia fa’aleleia atili, ua avea ai ‘Oe ma tagata ua sili atu ma ua tu-lalata ai fo’i i le taunu’uga na mo’omo’o iai. Pei ona ta’ua e se tasi ali’i: “E le afaina le fealua’i solo pe a o totonu lava o lou fanua!”

A fuafua lelei lava la ni taunu’uga mautu mo tatou, e lua vaega e ao ona silasila iai: fa’atino ona taunu’u lea ma aoga mo tatou. O le ‘autu e ao ona tulimata’ia, o le iai lea o se suiga lelei nai lo ananafi? Ua iai se suiga lelei o lou tagata ua iai?

Ua avea ‘Oe ma to’alua lelei i le taimi nei? Se tama po’o se tina lelei? Ae a se tagata-faigaluega lelei? 

Ua silafia lelei, e mafai ona tatou finau ma manumalo i a tatou galuega ma atili tele ai tupe, ae a tupu loa ni pefea – ua le fa’amaoni pe ua fa’atiga fo’i i isi tagata, ona tatou malolo loa lea ma faia’ina i le finauga ma le fa’amoemoe ‘autu.

O le fua o le aga’i-i-luma ma le manuia, e le o mea ua e MAUA, a’o le ITUAIGA tagata e iai ‘Oe. Le ituaiga fatu ma le agaga o lo’o ia te ‘Oe? Le a le ituaiga o so’otaga ma le mafutaga ma isi tagata? Pe sa e finau ma isi ma fa’aaoga ‘auala le-fa’amaoni po’o faiga-fa’atiga. Ioe, tatalo nei ia Iesu e fa’amagalo ‘Oe ma toe amata suia lou agaga ma lou tagata atoa ma ou ‘auala o lo’o ola ai.

Ona e silafia ai lea ona finau ma lou lava tagata ma manumalo ai i taimi uma… Toe mafaufau tasi lava… 

© Samoa Observer 2016

Developed by Samoa Observer in Apia