A le galue, e le ‘ai – Iosefa
O lea le finagalo o Iosefa Fonotoe i le fa’atalatalanoaga ma le Fofoga o Samoa i le vaiaso ua tuanai.
Na ia ta’ua o le soifuaga o lo’o ua i ai nei ua le aoga se nofonofo ma moe ae taua le galue.
“Ua o tatou iloa uma lava le faigata o le soifuaga, o le uiga o la’u tala afai ae o tatou nofonofo e leai ni a tatou galuega e faia.
“Ia o lona uiga o le a tupu le mala, o lenei vaitau ia o luitau uma lava mea uma.
‘E tatau ai lava ona o tatou fa’atino o so’o se tulaga e mafai ai ona fesoasoani i aiga aemaise o nai fanau.
“Afai lava tatou te nofonofo ma fa’amoemoe i vavega i aso uma, ia o lena foi le olaga o le a ola ai nai o tatou fanau.
Na ia fa’ailoa o se itu lelei tele ai o le taumafai lava lea e atia’e aiga.
‘Ia e pei o lea lava le tulaga o lo’o ua taumafai ai nei ma lo matou aiga, o a lava mea ua mafai ona fa’atinoina ia o lena lava.
‘E mo le silafia o a’u ou galue i lo matou fa’ato’aga ma o esi lava lea o lo’o la’u mai ma fa’atau atu i luma o le auala aua se tupe maua a le aiga.
“E leai lava se isi mea nai lo le galulue fa’atasi ia e mama ai lava se avega aemaise ai lenei vaitau faigata o le soifuaga.
“Ia o le tele lava o le tupe maua i le aso e $80 ma o lea lava o lo’o ua fesoasoani tele i aiga mai lea aso i lea aso.
“O le itu taua lava o le taumafai e una’i vaega nei e fesoasoani ai nai aiga, aemaise o le tele o le mau mea e fai.
‘Aua e pei lava o le masani a’i o le a le fa’apolopolo o nai tupe e maua e tupu mai loa le fa’alavelave ia e taumafai lava ina ia fa’atino nei vaega uma.
“O se itu lelei tele lea , ia o le to’a’aga e galulue, ua leaga aso aua o le itu mautinoa, a le galue, e le ‘ai fo’i.