TALATUU O MULIFANUA

1011 Hits

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer.

 

E tusa ai ma faamaumauga a Papalagi-fai mai o Mulifanua e aofia ai ni nuu se lua o Fuailolo’o ma Lalovi-ma e taoto i luga o le matafaga i le va o Paepae’alā ma Fatuosofia, lea e latalata i se vai e igoa o “Oloiava.” 

E latalata i Lalovi ni Pa-ma’a tetele ua fausia i luga o le matafaga; ma fai mai o ia Pa-ma’a na fausia e tagata Tonga- ia fai mai sa nonofo ai, a’o nofoia faamalosi e Tonga Samoa; e pei lava o le mea lea na fai e Tonga i Safotu i Savaii. 

O iinei i le itu i sasa’e e faapea sa i ai se nofoaga sa tuu-taula ai le va’a o Tuitoga Talaifei’i, ina ua tuliesea faamalosi tagata Tonga mai Upolu. E tusa ai ma faamaumauga a Misi Situpe; o le nofoaga tonu lenei sa nofoia e tagata Tonga -o Nu’usugale, poo le matafaga lea e i sauté o le tolotolo o Fatuosofia, lea o loo taoto i lo la va le tolotlo o “Tulisalepupula” i le pito i sauté o le matafaga. 

O luga o lenei tolotolo o loo i ai se maupu’epu’e e igoa o “Fatu”- lea fai mai o ‘i tonu lava e feosofi ai agaga o tagata oti i le sami poo (Fatuosofia) ona fe’ausia ai lea i Savaii ma Pulotu. O lea talatuu o loo ta’ua foi i talatuu o Manu’a i Faleasao. 

Ma e pei foi o Manono, o Mulifanua o le Aiga o Malietoa ma ua ta’ua -o le Aiga i le Tai e tusa ai ma lana pule i ona eleele; o Aiga i Uta-sa masani ona faasino ia Afolau lea ua le o toe nofoia i aso nei; ae sa masani ona tu i luga o se maupu’epu’e itiiti i tua ane o Sagafili. 

O Afolau la e lauiloa i le tala e uiga i le afuaga o le temoni o Savea Si’uleo. Ma e pei o le Aiga i le Tai e faasino ia Mulifanua ma Manono. O le Faleupolu o Sapapalii o Mago-o le uso lea o Lautolo i Mulifanua; ma e ta’u foi o le Aiga i le Tai. Ae ui o lea- o le Faleupolu o Manono e faasino i tua i e tupuga mai ai Papalii Taupotuofanua e pei ona ta’ua i lalo; o lona uiga la- e fesoota’i nei nofoaga e tolu ma e tutufaatasi ma Malietoa. 

O Mulifanua la o lona uiga- o le pito o le fanua, ma o loo tu-ese mai le ala o matagi, ae o le pito o le motu -e faasaga tonu lava i le matagi ma e faaigoa foi o Matāfanua. O Upu Taoto o Mulifanua fai mai:- “Tulouna Oe Lautolo; Tulouna Alo o Malietoa o Togia ma Ifopo; Tulouna le Pouli ma Fuaolefau; Tulouna lau Fetalaiga Mafuli; Susu mai lou Alii o Tamalelagi. 

MANONO-Fai mai o le motu lea e faafeagai ma le Tolotolo o Fatuosofia, e pei lava o le Motu o Aunuu i Tutuila. 

E lua ona nuu-o Sa Lei’atauā ma Salua. O le itu i matu-sisifo e faasolosolo atu ai nuu nei-Falemoa, Salua, Apai, Lepuia’i, Satoi, Savauli, Folasa, Faaeno, Palapala, Salei’ataua, Siua’e ma Faleū. 

O le va o Faleu ma Falemoa- i le pito lava i sisifo- e le nofoia- ona o le gaoa. E tusa ai ma le taimi o suesuega a Papalagi- fai mai e lua nuu i matu ma sauté, ae leai se fesootaiga ma isi vaega o le motu. E tusa ai ma faamaumauga a Misi Situpe-o Salua o loo i ai le “Malae o Utuagiagi “ma e faasino i le vaega i sasa’e o Manono ma Salei’ataua -faatasi ai ma le Malaefono o Faleu i sisifo. 

Fai mai Misi Situpe o faamaumauga e faasino i le afuaga o le motu o loo i tusitusiga a Misi Tana. E tusa ai la ma ia faamaumauga- fai mai o se tagata Fiti e igoa o Lautala na sau ma aumai le motu mai Fiti. Sa latou tau ma tagata Samoa, fai mai o le pogai lea o le taua ma Savaii- fai mai na fasiotia ai le sefulu afe o mano ma le isi anoano ua le mafai ona faitau- e maua ai le upu –“ua gogo le faitau”ma o le pogai lea o le igoa o Manono. 

O le motu muamua na afea ma pulea e lea alii mai Fiti, o le motu lea i le va o Manu’a ma Tutuila; ma o iina na feiloa’i ai muamua ma Sasa’umani e pei ona ta’ua e Misi Palate ma Faresa, ae na i’u lava ina tula’iese ona o taua ma tagata Samoa. Na uma Lautala, soso’o ma Tolufale le atalii o Pili ma o ia lea na pulea le motu; o lana fanau o Luatutu ma Luafataalii; ma na nonofo ma vaelua lo la malo ia i la’ua lava. 

O Luatutu e tusa ai ma faamaumauga a Misi Situpe, na ia pulea Salua ma o iina tonu lava na nofo ai Matu’u; ma ina ua mavae o ia- sa toe faaigoa lea nofoaga o le “Papaolematu’u” ma o loo faaigoa ai pea e o’o mai i aso nei. Sa pulea e Luafataalii le isi vaega, ma sa matua mata’u o ia i le atua o taua o “La’amaomao” (nuanua). O Manono e faaigoa o le Aiga i le Tai; poo le Aiga Malosi talu ai ona o le Aiga o Malietoa; ma o lana meaalofa lava i soo se Malietoa fou e tofia-‘oTao ma Uatogi, toga ma taumafa e pei ona faamaonia e MIsi Situpe. Ina ua mavae le fasiotia o Tamafaiga o Manono; sa ‘au faatasi Manono ma Sapapalii e faato’ilalo le pule a Aana. 

O ona vaatau sa faaigoa o le “Fua Tava’a” e tauave ai se Lali tele e igoa o le “limulimuta” ma se La Pa’epa’e umi e igoa o le “Samalulu”poo le faailoga lea o le atua o taua. Mo le tele o tausaga-sa na umia tofi maualuluga e pei o “Aegina” o Eleni anamua; ma e o’o mai lava i aso nei-e tulaga ese lava lona Faalupega ia Samoa atoa. 

O le taua foi o le 1848-1854- na toe faaaoga ai e Manono lana Fua i taimi o taua ma Aana, ma sa i ai foi fanafanua i luga o ia vaatau. Fai mai a tuufaatasi la Safotulafai, Malie ma Manono-ona mafai lea ona latou faae’e atu le suafa o Malietoa.

© Samoa Observer 2016

Developed by Samoa Observer in Apia