E tele lava le aoga o le luasefulu tala

Tusia Aruna Lolani ma Fetalai Tuiluluu ,

118 Hits

Pilisita Asoiva ma lana fanau mai Faleasiu.

Pilisita Asoiva ma lana fanau mai Faleasiu.

O le tina lenei ia Pilisita Asoiva.

O se tina lenei e 44 le matua o lona soifua sa maua ai le fa’atalatalanoaga a le Fofoga o Samoa ina ua mae’a ona fa’atau ana kukama ma afe ai o ia e fai sana malologa ma fafaga lana tama pepe.

Sa ta’ua e Pilisita sa latou savalia mai le auala mai le latou fale se ia o’o atu i tai le aai a le nu’u ma sa latou toe savali atu i le fale aua e leai ni pasi e feoa’i lea itu auala.

“Ia o matou kukama ia sa fa’atau atu i tai le aai aua se matou tupe mo se mea’ai.

“E fa pepa kukama na matou o ma matou lea ua taulia uma ma sa maua mai ai le matou $20-00.

“Mana’omia lava e la’u fanau se mea’ai lelei. 

“E mo’i a e mamao ae leai se matou mea e mafai ona fai ai, na’o le savali a le mea e mafai na matou faia.

 Sa ta’ua e Pilisita o ia ma lona aiga e ola mai le ma’umaga, o le tama o le aiga e galue i le ma’umaga ma e taumafai lava o ia e fa’ataulia uma nei meatoto pe a o’o le taimi e fa’atau atu.

“E to’alima la’u fanau ma e le o se mea faigofie le su’ega o se mea’ai i aso uma ma e leai fo’i sesi e fia ai a i se mea’ai e tasi i aso uma.

“E mo’i a e le tele ni matou mea e maua ia ae peita’i matou te taumafai lava e fai ma sui se mea’ai mo le fanau i isi taimi.

“Pe mamao a la i fea le auala, matou te taumafai pea.

“Ia o lea ua maua se $20 e fa’atau ai se mea’ai mo le fa’ai’uga o le vaiaso.”

© Samoa Observer 2016

Developed by Samoa Observer in Apia