Fesoasoani Iapani mo le toe fausia o aoga i Aana

Tusia Ilia L Likou ,

41 Hits

O lo’o ua fa’aauau pea ona agalelei mai le atunu’u o Iapani mo Samoa nei ma o se fiafiaga tele lea o le tele o nai o tatou tagata aemaise o afioaga o lo’o ua mafai ona fa’amanuiaga i le agalelei o lenei atunu’u.

O le vaiaso na se’i mavae atu nein a fa’amanuiaina ai aoga tulagalua i Faleatiu ma Satuimalufilufi i le Itumalo o Aana, lea na sainia feagaiga mo fesoasoani mai le Malo o Iapani i le Aso Tofi o le vaiaso na te’a nei.

I ripoti a le So’oupu a le Malo o lo’o ua fa’ailoa mai ai le sainia ai o ia feagaiga ma na saunoa ai le Afioga i le Amapasa o le Malo o Iapani e faapea, o aoga ia ua faamanuiaina i le fesoasoani a le Malo o Iapani i lalo o le poloketi mo le malu puipuia o le soifua manuia o tagata lautele (Grassroots Human Security Project).

O le Afioga i le Amapasa, Afioga Maugaoleatuolo Shinya Aoki lea na sainilima ma le Afioga i le Minisita o Fesootaiga Faavavave Faaonaponei, Afioga Afamasaga Lepuia’i Rico Tupai, o le faipule foi lea o le Itumalo Aana Alofi Numera 3, e aofia ai nei afioaga.

O le Afioga Afamasaga o le Peresetene foi lea o le Aoga Tulagalua a Faleatiu. 

Faleatiu

E $223,250 lea ua faamatuu atu e le Malo o Iapani e toe fausia ai le faleaoga o le Aoga Tulagalua a Faleatiu.

O le galuega e aofia ai le toe faaleleia o le fola o faleaoga, faatasi ai ma le taualuga o le faleaoga o lo o i ai nei, fausia o le potu mo faiaoga, potu komipiuta faatasi ai ma faleui mo fanau.

“O le mafuaaga lea ua fesoasoani atu ai le Malo o Iapani mo le toe fausia o ia vaega, ina ia atoatoa ona lelei faleaoga ma vaega e tua i ai tamaiti mo le faatinoina o aoaoga,”na saunoa ai le Afioga i le Amapasa o Iapani Maugaoleatuolo Shinya Aoki.

Na ia faaopoopo foi e faapea, o lea fesoasoani atonu o le a faatumauina ai pea le mauaa o le feagaiga e le gata o totonu o le afioaga ae faapea foi i le Malo o Samoa.

Na momoli le agaga o le faafetai a le Afioga i le Minisita po o le Peresitene foi o le Aoga Tulagalua a Faleatiu, Afioga Afamasaga Rico Tupai.

“E lagona le faagaeetia ona o lea ua maua le toomaga o la matou aoga i totonu o si o matou nuu o Faleatiu, e ala i le toe fausia o potu aoga e pei ona faafofoga ma molimauina ai le sainigalima i lenei aso,” na saunoa ai Afamasaga.

“Faafetai tele i le Malo o Iapani, tauala atu i lau Afioga i le Amapasa o le Malo i Iapani i Samoa nei, faafetai i lo outou silasila mamao i alo ma fanau o Samoa, ina ia lelei ma atoatoa faleaoga ma vaega o lo o faaaogaina ina ia maua ai le ola aoaoina lelei.”

O le faleaoga e pei ona tuuina atu ai le fesoasoani a le Malo o Iapani mo le toe fauina, na faaalia e le Susuga i le alii Pule o le Aoga, Susuga Maeli Iokimo e faapea na toe fausia i le tausaga 2012 a o i ai i lalo o le vaavaaiga a le Ekalesia Aso Fitu, ae o le tausaga e 2014 lea na se’e atu ai i lalo o le Malo seia oo mai i le taimi nei.

Na saunoa foi Maeli, e i ai nisi o luitau o lo o feagai ma le aoga, e pei o le lē lava o faiaoga, aemaise o le mao tua o le nofoaga e i ai le faleaoga, ae leai se pasi e agai ai i tua.

“Ae o se vaega foi lea atonu o lo o galulue agai iai le Komiti o le sailia lea o se pasi (school bus) mo le “E 100 le aofai o tamaiti o le afioaga o lo o aoaoina i totonu o le aoga i le taimi nei.”

Satuimalufilufi

E $421,914 tala Samoa le aofai o le seleni ua faamatu’u mai e Iapani mo galuega faalelei mo le faleoaga tulagalua i Satuimalufilufi.

O le galuega e aofia ai le fausia lea o potuaoga e valu, potu mo le aiga faiaoga, potu tusi po o le potu komipiuta faatasi ai ma le fausia o faleui e tua i ai le fanau.

Na saunoa ai le Afioga i le Apamasa, “E taua le galulue faatasi e le gata o le afioaga, ae faapea foi le Komiti ina ia taunuu le faamoemoe e pei o le a alo atu i ai, mo le toe fausia o le latou faleaoga.”

Na faafetaia foi e le Afioga i le Minisita le Malo o Iapani ona o lenei fesoasoani.

“E momoli le agaga faafetai, i lau Afioga i le Amapasa o Iapani, aemaise o le Ofisa ona o le taliaina o le talosaga a si ou nei nuu, mo le toe fausia o le matou faleaoga, ua loa tausaga o faaaoga,” na saunoa i ai le Afioga i le Minisita.

“Ua leva o tau saili se fesoasoani, ae peitai o lenei taeao lea ua tali mai le Malo o Iapani, e lagona ai lava le faagaeetia ma le loto faafetai, ona o lenei fesoasoani taua ua maua e si o matou nuu.”

Na faapea foi se lagona mai le tuua o le afioaga, a o le Peresitene foi o le Aoga Tulagalua a Satuimalufilufi, Afioga Aopeipeimalie Sola, e faapea ua silia ma le 18 tausaga talu ona faaaoga e alo ma fanau o Satuimalufilufi le faleaoga o lo o i ai nei.

“O le tau sailiga o se fesoasoani mo le toe fausia o le matou faleaoga, e ese le faigata, peitai o lenei taeao, e lagona le fiafia ona o lea ua talia le matou talosaga sa tuuina atu i le Malo o Iapani.”

Na saunoa Aopeipeimalie, o le tausaga e 2016 na tuuina atu ai le latou talosaga i le Malo o Iapani, ma e silia ma le 200 tamaiti o lo o aoaoina i totonu o le Aoga Tulagalua a Satuimalufilufi i le taimi nei.

E pei ona silafia ai le tele o le sao taua o le atunu’u o Iapani i totonu o le atunu’u ma o se faigapa’aga fa’ale-uo ua loa tauasga.

O le tele o ia fesoasoani o lo’o ua maitauina i tausaga uma lava e pei ona ua i ai le tausaga lenei i lona amataga le tele o le agalelei o lea atunu’u mo Samoa ma ona tagata.

I le vaiaso lenei e tusa ai ma ripoti na tu’uina atu muamua, e lua isi aoga o le atunu’u ua fa’amatu’u atu ai le fesoasoani a Iapani.

O le Aoga Tulaga Lua i Faleapuna ma Aufaga.

O le komiti o le aoga a Faleapuna na o latou taulimaina lea fesoasoani  e SAT $388,420 ma e fa’apea foi le komiti a Aufaga lea e SAT $324,589 le aofaiga na o latou maua mai i a Iapani.

E pei ona silafia ai foi i le vaiaso lava ua te’a na sainia ai foi o le Malo o Iapani  ma le Aoga Tulaga Lua a Solosolo se feagaiga e mafai ai ona fa’aleleia la latou faleaoga.

O le tau fa’atatau o lea fa’amoemoe e tusa lea ma le SAT $281,326 ma na sainia lea i le va o le Amapasa a Iapani i Samoa nei Maugaoleatuolo Shinya Aoki ma le Peresitene o le Aoga i a Tufeao Fanolua.

I nisi o ripoti i le agalelei mai pea o Iapani i Samoa  , ua mafai nei e Samoa  ona maua se feasoasoani pitosili ona mana’omia e $6.72miliona.

O lea fesoasoani sa mafai ona faia ai se sainigalima a le ta’ita’i o le malo o Samoa, Tuilaepa Sailele Malielegaoi ma le Amapasa o Iapani i Samoa, Maugaoleatuolo Shinya Aoki e tu’uina aloa’ia mai ai i le malo o Samoa i le aso ananafi.

O le tau aofa’i o lenei tupe fa’ameaalofa e tolu miliona pe a fa’aliliu i le tupe Iapani (Yen) ae $2.8miliona pe a fa’aliliuina i le tupe amerika.

O lea fesoasoani ua fa’amoemoe e fa’aleleia ai  le tamaoaiga ma agafeso’otai a Samoa.

Sa fa’aalia le agaga fa’afetai ale ali’i palemia o Tuilapea i tagata nu’u ma le malo o Iapani.

“O lenei foa’i o le a faʻaaogaina e faʻatau ai le tele o masini lomitusi mo le Matagaluega a Aoga lea o le a suia ai masini lomitusi tuai lea sa faʻatupeina e ala i le fesoasoani muamua mai le malo o Iapani i le 2001,” o le saunoaga lea a Tuilaepa.

“O nei masini o le a mafai ai ona fa’atino mo le tele o mea gaosia ma o le a faʻaleleia ai ma avanoa i matāʻupu aʻoaʻoina ma puna’oa faʻafaiaoga, ma suʻesuʻega ma faitau tusi.”

  Sa ta’ua fo’i e Tuilaepa ua tele ni fesoasoani mai le malo o Iapani ua mae’a ona sainia ma le malo o Samoa i tausaga ua mavae auāle fa’aleleia atili ai o nisi o vaega eseese e aofia ai le vaega o a’oa’oga, vaega o le suāvai, fa’apea ai le vaega o soifua maloloina ma isi.

“O lea fo’i ua fa’amaonia mai i lalo o le Polokalame Faʻale-tamaoaiga a le Iapani ma Sosaiete e US$1.8miliona le tupe ua fa’amaonia mai talu ai nei mo mea tau fomaʻi ma e tatau ona aloa’ia i le PALM8 Summit i Tokyo i lenei tausaga,” o lana saunoaga lea.

“Ua tele fo’i fa’amanuiaga ua maua e le malo o Samoa e ala i polokalame faʻapitoa a Iapani mo le felagolagoma’i, ma matou te tulimata’i atu i se faiga paʻaga faifai pea ina ia faʻaleleia ai matou atinaʻe.

“O lea e fa’afetaia ai le Amapasa o Iapani ona o nei fesoaosani, o le a tulimata’i atu pea le fa’aauauina o le faiga pa’aga vavalalata ma matou te fefa’asoaaʻi pea ma le Malo ma tagata Iapani.”

E tusa ai ma le pepa o fa’amatalaga mai le Ofisa o le Palemia ma le Kapeneta, o lenei tupe faʻaalu e tatau ona saofagā i le “ausiaina o aʻoaʻoga maualuluga na tuʻuina atu i lalo o le faʻavae o le Taʻiala mo le Atinaʻeina o Samoa 2017-2020.”

“E le gata i lea, o lenei saofaga o le a fesoasoani i le fo’ia o lu’itau tau atina’e a Samoa i le Vaega o Aʻoaʻoga, e ala i le faʻaleleia o le tulaga ma le lelei o auaunaga o lomitusi.

“O lenei masini o le a mafai ai mo le tele o mea e gaosia ma faʻaleleia ai le gafatia ma le faʻaogaina e tamaiti aoga ma faiaoga o matāʻupu aʻoaʻoina, suʻega a le atunuʻu ma tusi faitau.

“Ua talia fo’i e le malo o Iapani isi avanoa e galulue faʻatasi ai ma le Malo Tutoʻatasi o Samoa, ma le manatu e faʻalauteleina le faʻatulagaga o le atinaʻe o le atinaʻe. “

E le’i gata ai le tele o fesoasoani i le amataga o lenei tausaga mai Iapani mo Samoa, o se toe tepa ai  i le masina ua tuana’i lea na foa’i ai nisi o meafaigaluega mo le Fuimu.

O lea fa’amoemoe o se  fiafiaga tele lea i le Matagaluega a le Fuimu aua o lea o le a maua  ai se isi fesoasoani mo le fa’afaigofieina ai o la latou galuega i le mafai ai lea ona maua nisi ta’avale fuimu mo i latou.

E lima ta’avale fuimu lea o le a le  toe mamao ona taulimaina lea e le Matagaluega o Fuimu ma o le agaga fa’afetai na fa’aleoina e Lelevaga Faafouina Mupo  i le Amapasa o Iapani-i-Samoa nei , Maugaoleatuolo Shinya Aoki  ona o lea fesoasoani taua.

E tusa ma le US$88,819 (T$211,200) lea ua fa’amatu’u mai mo lea fa’amoemoe taua aemaise o le fa’agaioiina atoa mai o  loli nei mai Iapani.

O se  tasi lea o fesoasoani tele mai le malo o Iapani mo le Samoa ma o lea so’otaga vavalalata o atunu’u nei e lua o lo’o ua fa’aauaiina pea e o’o mai le taimi lenei.

E pei ona silafia ai foi, o le tausaga e 2016 na fa’amaonia ai e Samoa le fesoasoani a le Malo o Iapani e fa’atauina ai ni masini mo togafitiga o oloa po o nifo, e aofia ai ma le ta’avale mo togafitiga, ma ua i ai ma le tautua o auaunaga vave fa’aneionapo o tamaiti aoga o Samoa.

O ia meafaigaluega ua faatotoga ai le Falemai Nifo i Motootua.

E ono nofoa, o masini e tao ai meafaigaluega, o le fa’ata ma le taavale ua fa’atotogaina i masini mo togafitiga o fanau na tauaaoina e Iapani.

I le saunoaga a le Afioga le Minisita o le Soifua Maloloina ia Tuitama Leao Dr Talalelei Tuitama, na ia fa’ailoa ai o le tausaga e 2003, na amata fuafuaina ai lenei fa’amoemoe peita’i o le lu’itau tele na feagai ma le auaunaga ona o le fese’eta’iga o lona Ofisa e mafua mai i le toe fausia o le Maota Gasegase Fou i Moto’otua.

“Na o’o lava ina siitia atu le i si vaega i Leufisa, fesi’ita’i atu ai ma masini ma tele ina fa’aleagaina ai,” o le saunoaga lea a Tuitama.

“Ina ua mae’a le Falema’i Fou, na mautinoa ai ua leai se avanoa o lenei auaunaga i le Falema’i fou, Mulimuli ane i le 2004, na si’itia mai ai loa i le fale lenei sa avea ma Acute 8 pe taofia ai foi gasegase.”

“E le’i faigofie le fetu’una’iga o lenei fale e avea ma falema’i o nifo/fofoga ina ia mafai ona faia se auaunaga saogalemu ma ia tusa ma aiaiga fa’aletulafono o lenei auaunaga. Ae na mafaia ona o le lototetele o le aufaigaluega i le fesoasaoni mai o le Atua.

O le manulauti ma le fa’amoemoega maualuga, fia fausia se Falema’i Fou (Dental Hospital) mo Samoa, ma e talitonu e mafai ona ausia lea tulaga e le Malo Samoa po’o Iapani foi.”

O le fa’alapotopotoga a le JICS (Japan International Cooperation System) ma le Kamupani a le Morita na latou fausia nei meafaigaluega, i le mae’a ai o lenei galuega na muai tatalaina e lana Afioga le Palemia o Samoa ia Tuilaepa Dr Sailele Malielegaoi, mo le siakiina o ona oloa (tulou).

O le talosaga mo lenei fesoasoani na tu’uina atu e le Pulega o le Falema’i Nifo i le Matagaluega o le Soifua Maloloina, ma talosagaina ai loa le fesoasoani a le Matagaluega o Tupe lea ua tali mai ai Iapani.

Ua tatala aloaia lenei maota mo so’o se tasi o lo o gasegase i oloa, mo le siakiina ina ia mautinoa o lo o atoatoa lona soifua maloloina.

Na momoli le fa’afetai fa’apitoa a le Minisita i le Ofisa Sili o Pulega o le Va i Fafo ia Peseta Noumea Simi, fa’apea le Pulega o le Soifua Maloloina fa’apitoa i le Malo o Iapani, auᾱ o le manulauti a lea Malo, ia ausia le 20 o oloa o so’o se tasi ua i le tausaga 80 aga’i i luga, a’o soifua pea.

I le masina ua tuana’i na faimeaalofa mai ai foi Iapani  mo le auaunaga tineimu a Samoa.

O lea fesoasoani, e aofia ai loli fuimu e lua, ma le ta’avale mo gasegase fa’apitoa mo le auaunaga a le Pulega o Tineimu ma Fa’alavelave fa’afuase’i.

E le o le ulua’i taimi lenei ua agalelei ai le Malo Iapani mo Samoa, o se fesoasoani e unaia ai le tulaga lelei o le tautua a le Tineimu mo ana galuega fa’atino i aso ta’itasi.

Na momoli le agaga fa’afetai o le afioga i le Minisita o le Pulega o Tineimu ia Tuilaepa Dr Sailele Malielegaoi ona o lenei fesoasoani, ma ia faailoa ai, o le pine fa’amau lenei o le amanaia ma le fa’aauauina pea o le aga alofa o uso a tuaoi o Samoa i auaunaga ‘ese’ese i le atunuu.

I le saunoaga a lana Afioga le Amapasa o le Malo Iapani i Samoa le Susuga ia Shinya Aoki, na ia fa’amauina ai o le tausaga e 2015 na umia ai e Iapani le talosaga a Samoa mo le Tineimu, e o’o mai i le taimi nei, ua sologa lelei pea fesoasoani a lona Malo, mo le Tineimu.

“Ua ofoina e Iapani le ta’avale fuimu e tusa lea ma le 30 mita le apefa’i e fesoasoani ai mo i latou e mana’omia fesoasoani ma fale tetele e tatau ona o’o i ai le suavai mo le tineia o le malaia, o le loli mo le tane vai, e aofia ai ma le ta’avale e tu’uina ai gasegase fa’apitoa ma manu’aga ogaoga.”

Na ta’utino foi Malo e lua o le a fa’aauau pea lenei fesoasoani i le lumana’i ma le faigapa’aga mo le manuia o nai o tatou tagata.

Na fa’aiu lenei sauniga i le fa’ata’ita’iga o ia ta’avale ma o latou matafaioi tauave, i le fa’amalumaluga a le aufaigaluega a le tineimu, i lumᾱ maota o le maota o Malo i FMFM II, Matagialalua.

O i latou foi o le a galulue mo nei ta’avale o i latou ua mae’a a’oa’oina i le tomai fa’apitoa, ma o le a gafa foi nisi o Inisinia mai Iapani ma le mata’ituina ma le fa’aleleia o nei ta’avale pe a o’o ina fa’aletonu i le lumana’i.

I le saunoaga a le Alii Palemia e fa’afetaia ai Iapani le foa’i i se taavale apefai ma le taavale tane vai na ia saunoa ai e fa’apea ; 

“O se tasi nei o taeao fou ma o se matatia I talafaasolopito ua mafai ona ausia e le Puelga talu ona faavaeina mai aua o le aso u aula ua maualuga ina ua tatou aleale faatasi e patipatia ma molimauina le tuuina aloaia mai o taavale faapitoa fuimu sa faatupeia e le Malo o Samoa. 

“E tele aso ae le lau aso ona o le miti lenei a le malo na afua mai ona o ni isi o faalavelave sa tutupu e aofia ai le mu matautia na aafia ai le tane suauu I MAtautu ia Aperila 2016.

“O lenei taavale apefai ma le taavale tane vai ua leva ona moe miti I ai le malo I le tineia I fale tetele ma isi vaega e pei o tane tetele teu suauu. 

“O le taavale avemai foi o se tasi lenei o taavale e faaopoopo I taavale avemai o iai, e tali atu ai I le atunuu I le moomia e gasegase I afioaga.

“O le agaga faafetai lea I lenei taeao ona o le faamoemoe na fau ao fau po o lea ua tau lau.

“O se avanoa taua foi e faia ai au ma sui o le Malo o Samoa ma ona tagatanuu, e faafetaia ai le Malo o Iapani I le tuumai o lona tauau e fesoasaoni ai I le faatupeina o nei taavale. 

“E momoli atu ai le agaga faafetai tele I lau Afioga I lou tali manao I le manaoga o le Malo o Samoa. 

“O le agaga maualuga ia faatumauina pea la tatou faiga paaga e fesoasoani mai ai I le atinaeina o le tamaoaiga o le atunuu.

“Ia faamanuia le Atua I le Malo o Iapani ma ona tagata I lo latou alofa ma le agalelei tulai mo le Malo o Samoa.

© Samoa Observer 2016

Developed by Samoa Observer in Apia