109 Tausaga o le Soifua – e le o le matati’a lea i Samoa?
Ua fa’afofoga so’o o fa’apea: o le matua lava o le vine o le atili suamalie fo’i lena, ma atonu e fa’apena tonu lava le silasila ma lagona mo se tasi o tina-matua mai afio’aga o Afega, Sale’aula ma Safa’i i Savai’i.
Na soifua mai Mitavale Levaopolo Sione i le Aso 18 o Aperila, 1907 ma o ananafi la, na alo ai ona aiga e fa’amanatu lona 109 tausaga, atonu pe o ia la le tagata-nu’u Samoa aupito matua i le taimi nei.
Sa fa’afeso’ota’ia e le Samoa Observer le Ofisa o Fuainumera Fa’amaumauina, ae saunoa mai se tasi o le ‘aufaigaluega, e le mafai ona latou fa’amaonia mai tausaga o le tagata aupito matua i Samoa i le taimi nei.
Saunoa le tama’ita’i-ofisa, e faigata lava ona latou sa’ilia le tagata aupito matua o lo’o soifua i Samoa ae atonu lava o Mitavale lea ua umia nei le matati’a.
Ae mo le tama’ita’i e ana le aso fanau, e le afaina lea tulaga ia te ia. O aso uma lava e soifua ai, o se fa’amanuiaga lea mo ia.
O le tofa a Levaopolo Pauni e 55 tausaga – o le auga-tupulaga lona lua o alo o Mitavale, sa fetala’i e fai ma sui o le ‘olomatua.
“O le ‘olomatua e na o le to’afa lana fanau, e tolu tama ma le teine e to’atasi,” o le fetalaiga lea a Levao. Ua maliliu uma tama e to’atolu ae na o lo’u tina ua 78 nei tausaga o lo’o soifua pea.
“O lona to’alua o Tita’e Aga ua leva fo’i ona maliu.
“Ua lima nei auga-tupulaga e tupuga mai le ‘olomatua nei, ma e fiafia ai lava e va’ava’ai i fanau a fanau a famai a lana fanau a’o tuputupu a’e ma nonofo fa’atasi uma ma fealofani.
E tele lava le sao o Levaopolo ma isi sui o le aiga i le tausiga o Mitavale ina ia soifua manuia, fiafia ma filemu lelei.
“Sa ‘ou nofo ai lava e tausi le ‘olomatua nei, ua ‘ou le-manatua le taimi aua e fai ma ‘ou alu ‘ese atu, ae ‘ave lava le fa’amuamua i le va’aia ma le tausia lelei o ia ona ua fai lava si ona matua,” o lana fa’aaliga lea.
“Sa galue o se taulasea e va’aia tagata-matutua i aso lava la ua leva ma sa fiafia lava e fa’amanuia i tagata.
“O Mitavale o se sui o le Ekalesia Metotisi ma e naunau lava i lana ekalesia, e malosi lona fa’atuatua ma lona talitonuga i le lotu ma ‘ou te talitonu, o le tasi lena o mafuaga ua ola umi ai i nei tausaga e tele.
“Mai lava i le ulua’i taimi na maua ai ana fa’amanuiaga mo le ‘au-matutua (le penisiona), e fai mai lava ia matou, e ‘aua lava ne’i fa’aaogaina sina sene se tasi ae ‘ave uma mo galuega a le ekalesia, ma e o’o mai lava i le aso, o sene uma o lana penisiona, e alu uma lava i ana mea-fa’aleLotu.”
Sa fa’amatalaina fo’i, o ia o se tagata e le fa’ailoga se mea’ai, pe a o’o i le taimi o ana taumafataga.
“O le taimi nei e le o toe taumafa i se taro ae fiafia lava i le fa’i, e le fa’ailoga mea’ai fo’i, atonu o le mea lena e faigofie ai le tausiga aua o isi tagata matutua, e iai lava taumafa e naunau iai,” o le fa’aaliga lea a Levaopolo.
“So’o se ituaiga mea’ai lava e avatu iai, na te talia ma le fa’afetai, ae mo mea-inu, e fiafia tele i le koko-Samoa ma le laumoli.”
Na fa’ailoa fo’i le agaga- fiafia o fanau a ana fanau ona o fa’amanuiaga mai Le Atua, lea ua mafai ai lava ona soifua fa’atasi ma Mitavale i nei tausaga e tele.
“E si’i ai pea le vi’iga i Le Atua ona o ana fa’amanuiaga mo ia i nei tausaga ua matua tele na’ua, aua matou te iloa, o lona malosi e mai Le Atua foafoa, le puna o malosi uma,” o le fa’aaliga lea a Levaopolo.
“Matou te tatalo lava i Le Atua, mo nisi tausaga e fa’aopopo o lona soifua, ina ia ‘ave’avea’i ai pea le fiafia o si o matou aiga nei, ona o le Tina.”
A’o sauni le Tama’ita’i e ana le Aso Fanau e pu’e lona ata, sa naunau lava e su’e le selu, e selu ai lava e ia lona lauulu ma amata ai loa ona sa’asa’a ma usu ana pese e fa’aali ai le tumau pea o lona malosi. E talitonu Mitavale, fa’atoa matua lava le tagata, pe a ua lagona ua e matua.
Manuia le Aso Soifua ma ia Fa’amanuia tele Le Atua!