Koleniga i Parataiso

146 Hits

Lupesoli’ai Joseph Parker.

Lupesoli’ai Joseph Parker.

Ripotia e Maddison Clarey

Fa’aliliu e Maiava

 

Atonu na matua mamafa koleniga i le aso ananafi, a o le tu-malosi o le faletalimalo o Aggie i Mulifanua (le Sherton Samoa Aggie Grey’s Resort) mo so’o se lagolago e tu’uina atu, e o’o lava i le maea-fusu ua fausia i totonu o le potu-malolo ‘autu, na faigata ai lava ona taofia le ‘ata’ata fiafia a le tama-Samoa o Lupesoli’ai Joseph Parker.

O ananafi le ulua’i koleniga-po’a a Parker i Samoa nei, i le Faletalimalo i Mulifanua e tapena ai mo le Fusu’aga Tele i le Parataiso ma le Ali’i-Amerika o Jason Bergman i le Malae Ta’alo i Faleata i le Aso To’ona’i nei.

“Matua ‘ou fiafia lava i le faletalimalo lenei, o le a se isi a’u tala, o le matua A ai,” o lana fa’aaliga lea ananafi. 

O le tala fo’i lea a lana Faia’oga o Kevin Barry. 

“Manaia tele le maea-fusu ua faia e si vaega, e leai se isi atunu’u o le lalolagi e maua ai lea ituaiga lagolago mata’ina fa’apea,” o le ofoofo tetele lea a Barry i aga fo’i a Samoa.

O lo’o to’ato’a-malie lava Lupesoli’ai ma Barry i a la tapenaga mo le fa’amoemoe i le Aso To’ona’i. “Ua mautu ma lelei a ma tapenaga,” o Barry lea. “Ua mae’a le tele o le mamafa ma ua i se tulaga e fai-fai-malie ai; o le taimi nei e na o le toe polesi lelei lava o mea uma ma fa’amalolo le mafaufau o Joe, e fa’amanatu le tele o mea e fai ma koleni i nai aso o totoe ma fa’asauni le tino i le tulaga e tatau ona iai mo le fusu’aga.”

Ua mae’a ona fa’ata’oto fuafuaga a Barry mo le fusu’aga ma o lo’o mautu lava le mafaufau i le tulaga o iai i le taimi nei ua fa’ai’ui’u koleniga.

“Pau lava lea o le toe fa’amanatu ma fa’aleleia atili o ana metotia ma ‘auala e osofa’i ai, ae maise o le fa’amalosia atili o a ma fuafuaga ua iai mo le Aso To’ona’i, ina ia mautu ma lelei,” o lana fa’aaliga lea i le Samoa Observer. Na ta’ua fo’i e Parker, ua mae’a le mamafa o galuega-tapenapena. “O lo’o ma galulue ma Kevin i nisi o metotia ma ‘auala e fa’aaoga. ‘Ou te lagona ua lava lo’u malosi mo le 12 ta’amilosaga, e le o popole la i le tulaga lena pau lea o lo’o popole i le fa’aleleia atili o nai mea laiti ua mae’a ona fai, o tulaga masani o fusu’aga ma tagata-agavale.

“O le tele lava o mea o faia nei, ole fa’alelei o metotia tau-fusu ma le fa’aaogaina o lima ma fa’amasani atili i le tau ... matua manaia tele.” 

O lo’o naunau fo’i Lupesoli’ai ma le vaega e asiasi i le Malae Ta’alo i Faleata; e va’ai i le nofoaga e faia ai le fusu’aga, e fa’amasani ai a’o le’i o’o i le Aso To’ona’i.

 “Ua tau le-taofia le fia o’o i le mea e faia ai le fusu’aga ma ‘ou te iloa, o se lagona ma se va’aiga lelei pe a o’o ina fa’atumulia i le ‘au-maimoa,” o Lupesoli’ai lea.

O fusu’aga i le Aso Sa ananafi, i le paga-mamafa a le Vaega a le IBF ma le WBO, ua naunau ai Lupesoli’ai e fia vave maua sona avanoa mo se fusi o le lalolagi.

“O se fusu’aga manaia i le matamata, ae maise o le siamupini lea na iloa ai le tulaga o iai nei ae maise fo’i le tulaga o le a feagai ai i le lumana’i. ‘Ou te talitonu lava, o lo’o sologa lelei ma sa’o le tulaga o tapena aga’i iai ma...talosia ia vave se aso e feto’ai ai ma tama-sasa’o ia i le lumana’i. A’o le taimi nei lava ia, o lo’o fai-fai-malie atu lava i le ‘auala e tatau ona uia,” o lana fa’aaliga lea.  

Na fa’aalia fa’atasi e Lupesoli’ai ma Barry lo la fiafia tele ma le agaga fa’afetai mo tagata-Samoa uma ona o le agalelei, le alofa ma le lagolago na tu’uina atu i tausaga ua tuana’i.

O se tausaga pisi ma faigata mo le Ali’i-Samoa, le 2015 ma o le Fusu’aga Tele lea i le Parataiso, ua aupito fa’ananau iai Lupesoli’ai ma lana vaega uma.

“Tele fusu’aga matagofie a Joe ua mae’a ma sa galue malosi ai i koleniga ae na iloa loa i le fa’ai’uga o le tausaga talu ai, o le a taunu’u le fusu’aga i Samoa, o se mea na matua si’itia ai lagona ma matua tapena mamafa loa iai,” o le saunoaga lea a Kevin Barry na ta’utino mai i le Samoa Observer. 

“Ua fiafia lava le ali’i o Joe, ona o le alofagia o ia, lona amana’ia ae maise le lagolago ua fa’aalia e tagata Samoa ma o lana lea ‘auala e tali atu ai ma fa’afetaia le lagolago a le atunu’u, ma ‘ou te ta’utino atu fo’i, o le a ‘ou taumafai malosi, e fa’afiafia ‘outou uma aua o lea ua ‘aumai i Samoa nei le fusu’aga e faia ai.”

O le Aso Lulu, o le a faia ai se koleniga a Lupesoli’ai mai le 11 i le taeao i le 1 i le aoauli, i le Fale Ta’alo i Faleata mo le mamalu o le atunu’u. E tatala mo tagata uma e fia maimoaina lea koleniga fa’aA’oa’oga. O le a avanoa fo’i o ia mo nisi e fia feiloa’i iai i le Faleoloa a le Digicel i Apia mai le 2 – 3 i le aoauli  o le Aso Lulu.

© Samoa Observer 2016

Developed by Samoa Observer in Apia