Faigata le soifuaga

Tusia Sarafina Sanerivi ma Ilia L. Likou ,

118 Hits

Alofa Solofa.

Alofa Solofa. (Photo: Sarafina Sanerivi )

O Alofa Solofa o se tinā e to’afitu o la alo ma le tamā o le aiga mai Tanumapua.

“Ia o le taimi lenei e le’i leva ona nofoia uta i’inei, ma ou te molimau atu lava i le taugata o le tau o le soifuaga o lo’o ua i ai nei.

“Ua tele tagata o lo’o ua o latou fa’ailoa mai e fa’apea e leai se mativa i Samoa ,ae o a’u lava ia o le matua’i faigata lava o nei aso ua i ai, ma e le’o aiga uma e mauoa, e i ai ma aiga o lo’o ua matua’i leai lava se fa’amoemoe aemaise lava i itu tau tupe.

“E sa’o o lo’o fua ulu, ma maua mea’ai le lauele’ele ae o le matua’i leai lava se fa’amoemoega mo le aiga lava ia i le lumana’i, pe maua mai se tupe.

“O se matua’i fa’afitauli tele lea i lau maitau atu ai e ui ina fa’apea nisi o lo’o maua lava mea’ai .

“E mo le silafia ai, ia o lea fa’atoā maua se galuega a le tamā o le aiga, ia e le taumate ia o le totogi e le taitai ona lava ai le fa’asoa.

“O se upu mo se sefe atu o se seleni mo fanau aoga o le a toe amatalia i le taimi lenei,ia  e leai se mea fa’apena e mafai ona tupu.

Na ia fa’ailoa na tele se taimi na fa’aletonu ai lo latou aiga ona o le leai o se tupe.

“Ia e pei ona fa’ailoa atu ia fa’atoa maua le totogi o le tamā o le aiga, ae ua laki nisi o fuala’au aina na totō i tafafale na mafai lava ona ave fa’atau maua mai ai sina tupe.

“E le fa’apea e tele ni mea’ai aua e le fua ai pea le tele o la’au nei i aso uma, o le itu e pito sili ona taua i si o matou aiga i le taimi lenei o le a le meaai e maua o lena lava.

“O le itu e pito sili ona taua i a te a’u ia  o le tulaga lea i le taumafai ai e ave nisi o fuala’au nei e fa’atau , ia e maua tupe ae aumai lava ave e fa’atau ai mea’ai ma nisi o tulaga ae le taitai ona fa’amoemoe ai se tupe maua mo nisi o vaega mo le tausia ai o le aiga.

“O se fa’anoanoaga lea i a te a’u lava ia, ia ae o lea ua talosia le galuega a le toeaina atonu o le a tele se fesoasoani o le a maua mai ai mo i matou.

“Aemaise ai le amata o lenei tausaga fou o lo’o ua tatou i ai.

© Samoa Observer 2016

Developed by Samoa Observer in Apia