Siamupini-Aoao Tusiga Peseta ui i fita ma faigata
Ripotia e Deidre Fanene
Fa’aliliu e Maiava
Ui e fealua’i i le nofo-fa’atavalevale, ae le’i taofia ai Tusiga Peseta Taofiga mai le fa’ataunu’uina o le mea e aupito sili ona naunau i ai.
O ananafi, na lologo ai le fua ma le pa’ō, ina ua fa’ailoa le avea o le ali’i 21 tausaga lea, ma siamupini o Tamaiti-A’oga Fa’aTusitala i le Fa’au’uga a le Iunivesete Aoao a Samoa.
O se aso fiafia tele ananafi, na fa’ai’ua ai se taumafaiga ‘umi na amata i le 2013, lea na mua’i māua ai e le ta’ita’i o le ulua’i Malaga Fa’alauiloa a le Vaega o Tusitala ma Fa’asalalau a le Iunivesete, le Afioga a Misa Vicky Lepou, le ali’i o Tusiga i le Kolisi o Amoa i Salafai.
O lona tausaga mulimuli lea i le Kolisi i Amoa ma na ia fa’ailoa ai ia Misa, lona mana’o e fia avea o se Tagata Fa’asalalau i Leitio. A lea ua ma’ea ma mautu ana tapenaga e fa’atino ai lona mana’o.
O le taualuga mata’ina o le Fa’au’uga ananafi, na avea ai lana Susuga, e momolia le saunoaga ‘autu a’o le fa’afetai, e fai ma sui o le Vasega Fa’au’u, a’o aofia le anoano o le ‘au-vala’aulia e aofia ai malo-fa’aaloalogia, o matua, aiga ma uo sa ‘auai.
“O se malaga umi na’ua, e fa’afo’i ai le vi’iga ma le fa’afetai i Le Atua, ona o le poto ma le malamalama ua foa’ina, ae maise lana tausiga ma le puipuiga ia te a’u, i aso ta’itasi o le olaga,” o lana fa’afetai lea na fa’ailoa mai i le Samoa Observer.
“’Ou te momoli fo’i le fa’afetai tele lava i lo’u aiga mo le latou lagolago sa tu’uina mai, ae maise lava si o’u tina matua o Mua mo tatalo molia i aso ta’itasi mo a’u a’o iai i le Iunivesete.”
Sa faigata tele le a’oga mo le ali’i mai Salafai.
“E matua mamafa lava le tauvaga ma e leai so’u manatu o le a ‘ou o’o i lea tulaga,” o lana fa’aaliga lea. “E to’atele naunau tama ma teine-a’oga e popoto atu i lo a’u ae ‘ou te matea, o se vavega le mea lea, ma ua faia e Le Atua se vavega mo lo’u olaga.”
E fai lava si faigata o mea uma mo Tusiga, ona e fealua’i i le nofo-fa’ata’avalevale.
“E faigata lava ia a’u ona ‘auai fa’atasi ma isi tamaiti malolosi ae maise o le leai o ni vaega talafeagai e fa’amalie ai mana’oga o tagata e le-atoatoa le malosi o le tino,” o lana fa’aaliga lea.
“O le mea moni lava, sa ‘ou fa’alagolago malosi i isi tagata e fesoasoani mai ae maise fo’i i feoa’iga, sa faigata lava ia a’u ona fa’amalie tulaga ia.
“Sa ‘ou lagona lava le ‘ese o le matau ma le faiga o a’u e isi tamaiti-a’oga ona e va’ai ‘ou te alu i le nofo-fa’ata’avalevale, e faigata tele ona taumafai e fa’afetauia mea faigata ia.
“Na ‘ou manatu lava e le talafeagai lo’u iai i’inei, ma o lu’itau autu lava ia sa ma fa’afeagai ae fa’afetai tele i Le Atua, ua mafai ona ‘ou ‘ausia le fa’ai’uga o le a’oga.”
O le a aga atu nei loa Tusiga e tuli-‘aupu lona mana’o, e avea o se tusitala ma lona fa’amoemoe e fia galue i le vaega fa’asalalau, po’o se nusipepa, le televise po’o le leitio fo’i.
“Ou te mana’o lava e faigaluega muamua i vaega fa’asalalau mo se lima i le ono tausaga, toe fo’i ai i le iunivesete e fa’alautele atili lo’u iloa.”
O lana fautuaga mo tagatga e le-atoatoa le malosi, ia ‘aua le manatu mama i o latou tagata.
“’Aua ne’i iai se manatu, a mea e le fetaui lou tagata ma le lautele,” o lana fautuaga lea. “Aua le manatu fa’apea e leai sou aoga mo le atunu’u ma lou aiga. Ia manatua i so’o se taimi, na faia tatou uma e Le Atua i lona Lava fa’atusa.
“E mafai tele ona e faia po’o le a lava le ituaiga tagata e iai ‘Oe, o a ou mo’omo’oga, ia finau malosi iai aua e mafai tele ona e fa’ataunu’u. E tutusa-pau tatou uma, e tutusa a tatou aia-tatau, ‘aua le fefe ae finau mo le ‘auro aua o le lagi le muta’aga o mea uma.”
O Tusiga ua fa’apaleina nei, e na o ia le alo o Peseta ma Mua Taofiga mai le afio’aga o Pu’apu’a i Savai’i.