Faigata le soifuaga
O lea le talitonuga o le tamā i a Satini Vaogogo i le fa’atalatalanoaga ma le Fofoga o Samoa i le aso ananafi.
Na ia fa’ailoa o le taimi lenei e le’o i ai ni galuega mo’i la’ua ma lona to’alua.
“E pei o lo’u to’alua lava o lo’o ua feagai nei ma le tu’uina atu o la ma fanau i le aoga ma o se itu taua tele lea i a te a’u le taimi lenei e ui ina ausage si o matou aiga.
E to’aono o la alo.
“E pei ona o outou va’ava’ai atu ai ia na o sina lafo lava o lo’o i autafa atu o lo matou fale o lo’o ua fa’alagolago tele ai le taimi lenei.
“E le’o toe faigofie nei aso,ua taugata lava le soifuaga ma ua tele lava nai aiga ua le mafai ona fa’atinoina le tele o manaoga mo le atina’eina o aiga ona o lea le tulaga e pei ona ua alia’e mai.
O le isi fa’afitauli o lo’o ua feagai ai nei ma le aiga o le leai lea o se suavai maua.
“Ua silia nei ma le tolu tausaga o matou nonofo iinei, o se itu faigata tele o le leai ai lea o se suavai maua.
“Ia e faatali lava se’i timu ona fa’atoa mafai lea ona maua se suavai mo si o matou aiga.
Ae o le tupe lava le fa’afitauli tele o lo’o ua feagai.
“Ia o mea’ai ia e maua lava ae o le itu tau tupe e pei o lea lava le tulaga faigata olo’o ua i ai nei ma ou te talitonu e le nao matou le aiga o feagai ma lea tulaga.
“O la aso e pei e tau le ano tele i tupe, ia o lenei talutalu fou ua i ai a leai se tupe e leiloa pe a fa’afefea ona fai le soifuaga o lo’o ua ola ma soifua ai nei.
“O se tulaga faigata tele lea o lo’o ua feagai ai ma a’u ona o le tau faasoasoaina o vaega uma mo lo’u aiga.
“Ia e mana’omia ai lava se fesoasoani i le taimi lenei.