Olaga fiafia o Tupe Fealuae ile maumaga

Tusia Talimalie Uta ,

98 Hits

Alii faifaatoaga ia Tupe Fealuae (21) Faleasiu

Alii faifaatoaga ia Tupe Fealuae (21) Faleasiu

Tupe Fealuae le alii faifaatoaga

Tele o tupulaga i nei ona ua taufetuli solo i Apia e saili ni avanoa faigaluega. Ae peitai, mole alii ia Tupe e sili lava lona nofo ile fale fai le maumaga ma tausi lona aiga. 

O Tupe sa faigaluega ile Digicel ae ua tuua galuega ona e nofo e galue ile latou maumaga ma tausi le latou aiga. O Tupe ole uii ole fanauga e 5 ma ua 21 ona tausaga mai le afioaga o Faleasiu.

“E 5 le matou fanauga ma ua faigaluega uma le aumatutua la

“Ole mafauaga foi lena ua ou tuua ai galuega aua ua lava i latou e o galulue ae ou nofo au ia e atiae le maumaga ma fai feau ale matou aiga…

“Aua a o uma la e faigaluega, o ai la nofo ile fale ile fai feau ma tausi matua aemaise foi le vaaiga ole matou maumaga?”

Ole manatu faalia a lenei alii talavou, e ave lava lana faamamafa ile latou maumaga aua ole maumaga lava sa tua iai ile latou aiga ile tele o taimi.

“E pei ole maumaga lava lea sa tele ona galulue ai nai ou matua mai lava ile amataga ile tauatinaeina ole matou  aiga…

“Lea la ua maua galuega ma ua sologa lelei le matou aiga… o lou tiute la lea ua fai nei ole vaaiga ole matou maumaga.”

Sa maua le avanoa ale fofoga o Samoa e faatalatalanoaina ai le alii ia Tupe ao galue ai o ia ile maumaga ale latou aiga i Faleasiu ilea so ananafi. Sa faasoa mai foi le alii ile eseesega ole ola galue ile maumaga male galue faafaigaluega.

“E toatele tagata e faapea mai e faigata le maumaga ona o galuega faatino ai, ae a masani lava le tagata ia ese le faigofie ma e maua ai foi le filemu ia…

“Ao le galue faafaigaluega ia au lava ia ma lou iloa, e tiga ai le ulu toe pisi vale ai solo…”

Ole talitonuga a Tupe, e iai lava le taimi ole tagata ia e iloa ai le taua ole olaga ma mea e tatau ona faamuamua. Mo le alii ia Tupe, o lona taimi lenei  ma o ona tiute ma gafa ole galue lava faa fai faatoaga.

© Samoa Observer 2016

Developed by Samoa Observer in Apia