Manatu o le Fa'atonu - Lesona aoga mo le ola

Tusia Marj Moore ,

82 Hits

Faigata tele ona maua o se tali talafeagai e fetaui ma le pa’u o Uso Auvale Taumata Bragovits, talu lana gaioiga mata’utia e pei ona ta’ua i le itulau pito i luma o le lomiga o lenei aso.

Peita’i, lea ua tu’usa’o iai e le Fa’amasinoga.

Ua fa’amaonia lona moliaga o le taumafai e fa’ao’o le maliu fa’apea le le-usita’ia o se poloa’iga a le fa’amasinoga, mo le malu-puipuia o se tina.  

A’o lea fo’i na ta’ua, e to’alua ni tupulaga talavou sa molimauina lea osofa’iga matuia, o le to’atasi o la’ua nei, o le tama-tama a le tina na a’afia, lea sa tagi-aue e atu i le fa’ao’osala e soia le fasia lona tina, peita’i sa fai pea lana galuega le-alofa.

E matua faigata lava fo’i ona talia e le mafaufau, le fa’apea mai o le loia a le ua molia, “e ono tu’ua’ia fo’i le na osofa’ia, ona o lona fa’aseseina o le ua molia, fa’apea ua malie o le a la fa’aipoipo.” 

Ae na matua tu-vaelua lelei ai lava le Tama’ita’i Fa’amasino o Mata Tuatagaloa i ia mafaufauga fa’avasivasi fa’apea.

I sana saunoaga tu’usa’o mo e sa i le fale fa’amasinoga ma le ‘Au fia-ula, na manino ai le leai o se avanoa e toe tu’ua, mo latou e fa’aaogaina sauaga ma faiga taufa’afefe i totonu o Samoa nei. 

 “I le va’ai a le Fa’amasinoga, so’o se tamaloa e faia  se tulaga e fa’amata’u ai ma lamatia le soifua o so’o se tama’ita’i, e le tatau ona toe iai i totonu o lo tatou lalolagi,” o le saunoaa lea a le Fa’amasino o Mata Tuatagaloa.

Sa ia fa’amanino atu fo’i le mamafa o le tulafono mo latou e le-aloa’ia poloa’iga a le fa’amasinoga mo le puipuia o tina ma tama’ita’i.

“Na e aga’i atu i le na a’afia i le taeao lea ma osofa’ia o ia, ma ua e le-usita’ia ai le tulafono lea,” o saunoaga ia a Tuatagaloa. 

Na fa’ailoa fo’i e le Fa’amasino, e ui i le tagi atu ma le talosaga a le atali’i o le tina sa a’afia, ae sa matua le-ano lava iai le fa’ao’osala. 

“Leai ma sou popole i le tausisia o le tulafono a ua e fa’aauau lava ona fa’ao’o manu’a ia te ia ui fo’i sa taumafai malosi atu lona atali’i ia te ‘Oe, e ‘aua le fasiotia lona tina.” 

O le tulaga na afua ai lenei fa’alavelave mata’utia i le tausaga talu ai, ua fa’aalia ai, e iai lava nisi o le atunu’u e le talia le manatu, e tutusa lelei aia a tamaloloa ma tina.

Le aia e te’ena ai se mea, le aia e ola sa’oloto ai ma le aia e suia ai lou mafaufau e aunoa ma le tau-fa’amata’u i sauaga po’o nisi a’afiaga fa’alemafaufau. 

E aofia ai fo’i ma le malosi’aga e tete’e atu ai i mea e le fiafia iai, le taliaina o mea e mafai ma fiafia iai i le gasologa o le ola nei.

A o le mafaufau fa’avalevalea lea fa’apea “a ‘ou le maua loa, e leai se isi e tatau ona avea” ua tele ina laumanu’ia i nisi fa’amasinoga i aso ua mavae.

Ui o se fiafiaga tele le mamafa o saunoaga e tu’uina mai e fa’amasino mo mata’upu fa’apea, ae mautinoa lava, ua leva ma tatau ona fai o ni ‘auala lelei e suia ai amioga fa’apea ae maise ni faiga lelei e fo’ia ai ia amio mataga. 

Lea fa’atoa mae’a atu le fa’amanatuina o le Aso Fa’apitoa o Tama, atonu o se taimi lelei lenei e amata ai ona toe fa’aauau talanoaga ma fetufaa’iga i totonu o aiga, a fanau ma tagata uma po’o le a lava le matua. 

E tatau fo’i ona fa’atino na talanoaga ma fetufaa’iga i totonu o a’oga, o mafutaga a ‘autalavou, A’oga Tusi Pa’ia, i lauga i falesa ma so’o se nofoaga e faia ai mafutaga ma fono. 

A tu’ufa’atasi la iai ma fa’ata’ita’iga lelei a o tatou ta’ita’i, e mautinoa lava e matua ogaoga atu sona sao aoga mo Samoa uma nai lo na o ‘upu.

© Samoa Observer 2016

Developed by Samoa Observer in Apia