Le Masini o le Tagata

Tusia Fa’aliliu e Maiava ,

115 Hits

Toe mafaufau tasi lava… Le a sou manatu pe a fa’apea, e leai ni masini i le ola nei? Leai ni ta’avale-laiti ma ni pasi, leai fo’i telefoni fo’i ma ni leitio ma le anoano o le mau-mea ua iai nei?

Mautinoa lava, e leai se mea ta te mafaia, pe a aunoa ma mea nei o lo’o tatou fa’aaoga i aso ta’itasi. A’o masini nei, e na ona fesoasoani i lou soifua, pe a e iloa ona fa’aaoga.

Ua manatua ai le isi matai-matua mai nu’u-a-uta, na o’o mai i le taulaga ona sa mana’o e fia fai sana saunoaga i luga o le leitio. O le toea’ina lea, e le’i o’o muamua i se ofisa o se leitio-fa’asalalau, pe va’ai fo’i i masini e fa’aaoga i fa’asalalauga e pei o le mic e tautala ai.

Ina ua tu’u iai e Va’asili’ega le mic, na ona a’apa mai lava o le toea’ina lea, avatu ma tu’u loa i le TALIGA e fai ai lana lauga! Maka’ukia! Ioe, o masini ma mea nei, e manaia tele ma a’oga – pe a e iloa ona fa’aaoga lelei.  

E te silafia le masini aupito lavelave ma uiga-‘ese na fausia? Ioe, o ‘Oe ma A’u! Le masini, o le tagata. O le mea moni, o le tele lava o le malamalama o foma’i ma saienitisi e maua mai a latou su’esu’ega e uiga i le tino ma le mafaufau o le tagata, o le tele fo’i lea o mea latou te iloa, e uiga i le masini-komepiuta o tatou nei o tagata-ola.

O o tatou mafaufau, tino, o lagona ma le agaga e atoatoa ai le tagata ua tatou iai nei. Silasila fo’i, pau lava le na te silafia mea uma lava e uiga i le ola lelei o le masini lea o le tagata, e na o Le lava na Ia fuafuaina ma faia tatou.

Na faia tatou e Le Atua, e ‘ese mai isi manu uma, e leai ni o latou malosi e fai ai ni filifiliga i o latou olaga. E le pei o tatou, e sa’oloto o tatou mafaufau e fai le fa’atatau ma le filifiliga tonu o mea tonu e manana’o ai.

E le’i fausia tatou e Le Atua, o ni masini Na te fa’atonutonua ma fa’amalosia e ola i le ‘auala tonu ma sa’o.   

Ae fa’anoanoa ai ona ua fai lava o tatou mana’o, e ola-fa’amaualuluga ma mana’o-fa’apito ma fa’aaoga-sese lo ta sa’olooga. Ua tatou manatu lava ua sili atu lo tatou iloa, nai lo tatou Ali’i-Foafoa, i mea e fa’afiafiaina ai tatou.

Ua fai lava o tatou loto a ua le fa’aaogaina o tatou tino ma mafaufau i le ‘auala na fuafuaina ai e Le Atua, tatou te fiafia ai i le ola nei – le ‘auala sa’o e lelei ma aoga. O tulafono a Le Atua e le ina ia taofia ai tatou mai le ola fiafia.

E le fa’apena. O le Tusi Pa’ia, ua na o se tusi-ta’iala, o fa’atonuga mo le masini o le tagata ina ia tatou ola fiafia ai pea e aunoa ma le fa’aleagaina ai o o tatou tagata ma afaina ai.

Na fa’ailoa manino mai e Iesu Lona fa’ata’ita’iga lelei mo le manuia ma le ola fiafia e tumau.

Ae le’i tuai na’ua, lou taumafai nei e fa’alelei ma toe fa’asa’o lou olaga. Manaia ae tatalo nei ia Iesu e fa’amagalo ‘Oe ona o lou ola lava i ou ala, ma tatalo e pulea atoa mai e Ia lou ola ma amata i Ona ala sa’o ma manuia. Pau lea o le ‘auala o le a e ola ai i se olaga atoatoa ma manuia na Ia fuafua lelei e te soifua ai. Toe mafaufau tasi lava…                            

© Samoa Observer 2016

Developed by Samoa Observer in Apia