PEPA MAI LE KAPENETA

359 Hits

1. Fesoasoani tupe mo le Asosi Siisii Uamea Mamafa a Samoa

Ua faamaonia e le Kapeneta le tuuina atu o le fesoasoani tupe e $45,000.00 mo le Asosi Siisii Uamea Mamafa a Samoa e tapena ai mo le Taamilosaga a le Osenia ia Me 2016 lea e faia i Niu Sila.

O le taamilosaga lenei e sailia ai siamupini o le Itulagi a le Osenia. O lenei foi taamilosaga o le a fili ai le au a Samoa e tauva i Taaloga a le Olemipeka i Brazil ia Aukuso.

O le naunautaiga ia siitia atili le tulaga o Samoa i lenei taaloga i le lalolagi ma ia maua ni pine auro mo le atunuu.

2. Fausia o laina paipa mo Aleisa

Ua faamaonia e le Kapeneta le tuuina atu o le konekarate i le kamupani a le Bluebird Construction Co. Ltd mo le fausia o laina paipa mo Aleisa.

Na faasalalauina lenei tauofoga mo le silafia lautele, ma e lua kamupani na tuuina ane tusi tauofo.

Na faia le iloiloga a le Soa Komiti i nei talosaga e fua i aiaiga o lo o tusia i pepa o tauofoga ma tuuina mai ai loa le fautuaga i le Kapeneta mo le faia o lana faaiuga.

3. Fono faanatinati a atunuu o le Pasefika i le Maliliega Taufaigafaiva

Na faamaonia e le Kapeneta le auai atu o le sui o Samoa i le Fono Faanatinati a Atunuu o le Pasefika i le Maliliega Taufaigafaiva a le Pasefika ma le Malo o Amerika lea na faia i le aso 9 & 10 Fepuari 2016 i Fiti.

Na talo lenei fono ina ua faailoa mai e Amerika i le masina na te’a nei le faamuta o lo latou auai i lenei Maliliega. O le masina o Ianuari 2017 e tatau ona faamuta ai lenei Maliliega, i le atoa ai lea o le 12 masina talu ona faailoa mai e Amerika lea tulaga.

O le naunautaiga o atunuu o le Pasefika mo le faia o lenei fono faanatinati ina ia tapena pea auala mo le fofoina o lenei mataupu ina ia faaauau pea le Maliliega lenei ma Amerika, ona e auala mai faamanuiaga mo tagata o le Pasefika. O lenei foi Maliliega, e le gata i tulaga tau faigafaiva, ae o lo o afifi ai foi ma isi sootaga i le va o le Pasefika ma Amerika.

O le Ofisa Sili Lagolago i le Vaega o Faigafaiva i le Matagaluega o Faatoaga Faigafaiva ma Vaomatua, Susuga Joyce Samuelu-Ah Leong na fai ma sui o Samoa i lea fono.

4. Fono faatatau i le poloketi faaitulagi tau femalagaiga i le ea 

Na faamaonia e le Kapeneta le auai o le aumalaga a le Malo o Samoa mo le fono faatatau i le poloketi faaitulagi tau femalagaiga i le ea na faia i Aukilani Niu Sila i le aso 5 o Fepuari 2016.

O le fono mo le poloketi lenei e taulamua ai le kamupani vaalele a Tahiti, lea na valaaulia ai sui o Malo o le Atu Kuki ma Samoa. 

O lea fono na talanoa ai fuafuaga a le Air Tahiti Nui mo le fesootai o atunuu o le Polenisia faapea ma tulaga o maketi tetele o le atu i matu. 

O le Afioga i le Sui Palemia, Afioga Fonotoe Pierre Lauofo Meredith na taitaia le usugafono a Samoa.

5. Toe faaauau le Feagaiga a le Malo o Samoa ma le Virgin Australia

Ua faamaonia e le Kapeneta le toe faaauau o le feagaiga a le malo o Samoa ma le kamupani vaalele o le Virgin Australia e ala i le vaalele o le Virgin Samoa, mo le isi iva masina.

O le feagaiga talu ai, na mae’a le aoga i le aso 12 o Fepuari 2016.

O le a faagaolo foi feutanaiga ma tapenaga mo se isi feagaiga fou faapea foi ma le vaavaai i le faia o ni feagaiga ma isi kamupani vaalele e pei o le Qantas.

© Samoa Observer 2016

Developed by Samoa Observer in Apia